Республикэм футболымкIэ изэнэкъокъу хэлажьэхэрэ командэхэм зичэзыу ешIэгъухэр блэкIыгъэ тхьамафэм яIагъэх.

ЗэIукIэгъухэр

Красногвардейскэ район — Теуцожь район — 4:4, Кощхьэблэ район — Шэу­джэн район — 5:3, «Герта» Ханскэр — «Адыгэ­къал» — 0:9. ­Мыекъопэ районыр Кощ­хьэблэ районым 3:0-у те­кIуагъ.

Красногвардейскэ районыр 4:2-у Теуцожь районым текIощтыгъ, ау ешIэгъур къыхьын ылъэкIыгъэп. Теуцожь районым иешIакIохэм гъогогъуитIо бысымхэм якомандэ икъэлапчъэ Iэгуаор дадзагъ.

— Мыекъопэ районым икоман­дэ зэкIэми анахь лъэшэу тэлъытэми, зэнэкъокъум текIо­ныгъэр къыщыдэзыхыщтыр къэшIэгъуае, — къытиIуагъ Адыгэ Республикэм футболымкIэ и Фе­дерацие итхьаматэу Николай Походенкэм. — Теуцожь, Кощхьэблэ, нэмыкI районхэм якомандэхэм ныбжьыкIабэ ахэт. ЯIэпэIэсэныгъэ хэпшIыкIэу хагъахъо.

Адыгэ Республикэм и Кубок къыдэхыгъэным фэгъэхьыгъэ ешIэгъухэр шIэхэу аублэщтых. Республикэм изэнэкъокъу шъхьа­фэу кIощт. Спортым пыщагъэхэр, анахьэу футболыр зикIа­сэхэр, ешIэгъу гъэшIэгъонхэм яплъыщтых.

ЕМТIЫЛЪ Нурбый.