Спортышхом щызэлъашIэрэ Кобл Якъубэ фэгъэхьыгъэ шIэжь зэнэкъокъур Мыекъуапэ яблэнэрэу щыкIуагъ.Камчаткэ, Санкт-Петербург, Воронеж, Махачкала, нэмыкIхэм къарыкIыгъэхэр дзюдомкIэ зэбэныгъэх. Олимпиадэ джэгунхэм дышъэр къащызыхьыгъэ Мудрэнэ Бислъан, Урысыем и Къэралыгъо Думэ идепутатэу Хьасанэкъо Мурат, спортышхом щашIэхэрэ Емыж Арамбый, Рудольф Бабоян, ЕмкIуж Мухьамэд, нэмыкI­хэри зэнэкъокъум еплъыгъэх, къэбархэр къаIотагъэх.

— ЗэкIэми тафэраз. Алырэгъумэ бэнэгъухэр зэращыкIохэрэм тяплъызэ, тыгу къэ­кIы­жьыгъэр макIэп, — къытиIуагъ Адыгэ Республикэм дзюдомкIэ ибэнапIэу Кобл Якъубэ ыцIэ зыхьырэм ипащэу, спортымкIэ дунэе класс зиIэ мастерэу КIуае Хьазрэт. — Кобл Якъубэ иIахьылхэр зэнэкъокъум щыт­лъэгъугъэх. ЗэхэщакIохэм гъэзетымкIи «тхьа­шъуегъэпсэу» ара­Iожьы ашIоигъу.

— Хэгъэгум ишъолъырхэм къарыкIыгъэхэр Мыекъуапэ щызэIукIагъэх, — зэдэгущыIэгъур лъегъэкIуатэ Кобл Якъубэ ишъхьэ­гъусэу Джарэт. — Хьазрэт къызэриIуагъэу, зэхэщакIохэм, спортыр зышIогъэшIэгъонхэм тиунагъокIэ тафэраз…

Джарэт къэгущыIэныр къызэрехьылъэкIырэр, гукъэкIыжьхэр жъы зэрэмыхъухэрэр ЕмкIуж Мухьамэд къыдилъытэхи, тари­хъым инэкIубгъохэм зафигъэзагъ.

— Кобл Якъубэ Къыблэм дзюдомкIэ и Федерацие ипэщагъ, сэ Къыблэм дзюдомкIэ исудьяхэм яколлегие пэщэныгъэ дызес­хьэщтыгъ, — къеIуатэ ЕмкIуж Мухьамэд. — Тызэгъусэу Iоф зэдатшIэзэ, дзюдом ишъэфхэр нахьышIоу къызгурыIуагъэх. Къэ­бэртэе-Бэлъкъарым дзюдомкIэ, самбэмкIэ еджапIэ къызэрэщызэIуахыгъэм Якъубэ иIахьышхо хэлъ.

— Непи Якъубэ къытхэтэу сэлъытэ, — еIо Урысыем изаслуженнэ тренерэу Сергей Шутовым. – Дзюдор, самбэр нахьышIоу зэрагъашIэ ашIои­гъоу Сыбыр, Ленинград хэкум, нэмыкIхэм къарыкIыгъэхэр Якъубэ ыдэжь къакIощтыгъэх, тренер цIэрыIор упчIэжьэгъу ашIы­щтыгъ.

ИшIушIагъэкIэ непи къытхэтэу тлъытэрэ Кобл Якъубэ фэгъэхьыгъэ шIэжь зэнэкъокъум изэхэщэн хабзэм икъулыкъушIэхэр чанэу хэлэжьагъэх.

Сурэтым итхэр: Кобл Якъубэ иунагъо щыщхэр, спортым Iоф щызышIэхэрэр.