Урысыем и Воздушнэ-космическэ кIуачIэхэм самбэмкIэ язэнэкъокъу Адыгэ Республикэм испорт Унэшхоу «Ошъутенэм» апэрэу щыкIуагъ.

— Адыгеим самбэмкIэ иеджапIэ дунаим зэрэщыцIэрыIор пащэхэм къыдалъыти, зэIукIэгъухэр Мыекъуапэ щызэхащагъэх, — къытиIуагъ зэнэкъокъум исудья шъхьаIэу, Урысыемрэ Адыгеимрэ язаслуженнэ тренерэу Хъот Юныс. – Командэ 22-рэ Мые­къуапэ щызэIукIагъ.

Краснодар краимрэ Адыгэ Республикэмрэ ябэнакIохэр зы командэм зэдыхэтых. Апэрэ мафэм Адыгэ Республикэм ибатырхэм тагъэгушIуагъ. Дэхъу Азэмат, кг 62-рэ, ПашIо Алый, кг 68-рэ, Ингъуш Владимир, кг 90-рэ, дышъэ медальхэр зэнэ­къокъум къыщахьыгъэх.

Адыгеим испортсменхэм алырэгъум щытхъуцIэхэр къызэрэщыдахырэм дакIоу, титренерхэр, судьяхэр зэнэкъокъум изэхэщэн чанэу хэлажьэх. Къуекъо Аслъан, Чэтыжъ Алый, Хьабый Байзэт, Хьабэхъу Адам, ГуIэтыжь Хъалид, фэшъхьафхэу гущыIэгъу тызы­фэхъугъэхэм зэнэкъокъур шэпхъэ лъагэхэм адиштэу Мыекъуапэ зэрэщыкIорэр къыхагъэщыгъ.

Бэнэгъухэр алырэгъум зэрэщыкIуагъэхэм, зэхэщакIохэм яеплъыкIэхэм афэгъэхьыгъэ тхыгъэхэр «Адыгэ макъэм» къыщыхэтыутыщтых.

Сурэтым итхэр: зэнэкъокъур зэрэкIорэм судьяу Къуекъо Аслъан лъэплъэ.