Лъэпкъым ихъишъэ пхырыщыгъ
Адыгеим инароднэ сурэтышIэу, ювелирэу Еутых Асе улэпэ ритоныр икIэрыкIэу ышIыгъ. Ащ гупшысэу хилъхьагъэм, пкъыгъор ышIыным къызэрэфэкIуагъэм тащигъэгъозагъ.
Ритоныр дышъэм ыкIи тыжьыным ахэшIыкIыгъ. ЗытыришIыкIыгъэм елъытыгъэмэ, сурэтышI цIэрыIом ыIапэ къычIэкIыгъэм изэу шъон ибгъэхъуагъэми, ушъорэкIырэп, пытэу щыт.
— Апэрэу улэпэ ритоныр зысэлъэгъум Краснодар апшъэрэ еджапIэм сыщеджэщтыгъ. Краснодар дэт художественнэ музееу Ф.А. Коваленкэм ыцIэкIэ щытым сыблэкIызэ ритоныр къагъотыжьыгъэу, апэрэ къэгъэлъэгъонэу щыслъэгъугъ, — къытфеIуатэ Еутых Асе.
Ритоным псэушъхьэ е нэмыкIхэр хэшIыхьагъэхэ фэдэу, зыбгъэуцукIэ пытэу щытын фае. Лъакъохэр чIэуплъэнкIагъэхэу е нэмыкI шIыкIэкIэ гъэпсыгъэми, ар укIорэирэп. Къыхэгъэщыгъэн фае ритоным псы е нэмыкI шъон пытэ арагъэхъуагъэми зэрэмыушъорэкIырэр.
— Улэпэ ритоныр шъон игъэхъуагъэу амыгъэфедэщтыгъэу, ар дэхэфэшIэу ашIыгъагъэу бэрэ зэхэсхыщтыгъэ, — пкъыгъор ышIынэу зэрэхъугъэм Еутых Асе тыщегъэгъуазэ. — Ащ ишIын къин палъэгъуагъэу, нэужым ар агъэфедэным фытемыгъэпсыхьагъэу зэрэхъурэр сыгу къеуагъ. Сэр-сэрэу сшIынэу, сыуплъэкIунэу исхъухьагъ.
Еутых Асе ритоным еплъызэ тыришIыкIыгъ. Пстэури зэрилъэгъурэм фэдэу ышIыгъэу псыр зырегъахъом, пкъыгъор ушIорэкIыгъэ. Сыда аущтэу зыкIэхъурэр? Улэпэ ритоным фэдэу шIыгъэ пкъыгъо зэрэдунаеу тетэп. Ащ лъэкъо цIыкIу иIэр нахь, пстэуми афэдэу пытэу уцурэп. ТигущыIэгъу ышIыгъэ ритоным изэу шъон рагъэхъоным фытегъэпсыхьэгъэным охътабэ текIодагъ. Мыщ екIолIакIэу щагъэфедагъэр макIэп. Зэрэщытын фаер, пкъыгъор зыхэшIыкIыгъэм иIужъуагъэ, пстэуми мэхьанэшхо яIагъ.
— Улэпэ ритоныр сэ сшIыгъэм нахь ин. Ар килограммитIум ехъу, сэ сипкъыгъо килограмм зэрэхъурэр, — икъэIотэн лъегъэкIуатэ тигущыIэгъу. — Мыщ ишIын, игъэдэхэн къин къыныгъэп. Шым ышъхьэ, ынэхэр, тет сурэтхэр псынкIэу сшIыгъэх. ИщытыкIэ бэрэ тыпылъыгъ. Ар зэрифэшъуашэу зытэшIым, шхор зэрэгъэпсыгъэщтыр къин къысщыхъугъ. ЫпэкIэ сшIыгъэ ритонхэм ажэхэр зэфэшIыгъэх. Улэпэ ритоныр сэшIыфэ шым ыбзэгу зыфэдэри зэзгъэшIэн, ыцэхэри къэслъытэнхэ фаеу хъугъэ. Iушхор жэм тэрэзэу дэлъыным, шъхьадж шапхъэм тетэу чIыпIэ гъэнэфагъэу иIэм щылъыным сыпылъыгъ.
Улэпэ ритоныр тарихъым къыхэнэныр, лъэпкъым икIэн лъапIэу къыфэнэныр ары Еутых Асе гупшысэ шъхьаIэу зыдиIыгъыгъэр. Фаехэм зэкIэми ар зэрагъэгъотын амал яIэщт, ау пстэуми анахь шъхьаIэр адыгэ лъэпкъым ихъишъэ зыпхырыщыгъэ пкъыгъоу тиIэхэм джыри зы къазэрахэхъуагъэр ары.
Гъонэжьыкъо Сэтэнай. Сурэтхэр Артур Лаутеншлегер тырихыгъэх.