Урысыем икIэлэеджакIохэм я Спартакиадэ хэхьэрэ зэIукIэгъухэр гандболымкIэ Звенигород щыкIуагъэх. Мыекъуапэ икомандэу «Адыиф-2-м» дышъэр къыфагъэшъошагъ.

Мыекъуапэ испорт еджапIэу N 1-у Джэнчэтэ СултIан ыцIэ зыхьырэм зыщызыгъэсэрэ пшъашъэхэр Волгоград, Челябинскэ хэкухэм, нэмыкIхэм ате­кIуа­гъэх. Финалныкъом Самарэ икомандэ 28:23-у дешIагъ. Ды­шъэм икъы­дэхынкIэ ешIэгъур 30:28-у Астрахань къикIыгъэхэм къа­шIуахьыгъ.

Мыекъуапэ испорт еджапIэу Джэнчэтэ СултIан ыцIэ зыхьырэм тыгъуасэ зэхахьэу щыкIуагъэм «Адыиф-2-м» щыIукIагъэх.

Тренерэу Никита Голуб Спартакиадэр зэрэкIуагъэм къытегущыIагъ, командэм къыфэгумэкIыхэрэм «тхьашъуегъэпсэу» къариIожьыгъ.

Мыекъуапэ иадминистрацие физкультурэмкIэ ыкIи спортымкIэ и Комитет ипащэу Дмирий Щербаневым зэрищэгъэ зэхахьэм Адыгэ Республикэм и Парламент и Комитет итхьаматэу Шэуджэн Тимур къыщиIуагъ типшъашъэхэм тапэкIи гъэхъагъэ ашIынымкIэ Спартакиадэм лъэпсэшIу зэрэщашIыгъэр.

Мыекъуапэ инароднэ депутатхэм я Совет итхьаматэу Джарымэкъо Азмэт къалэм иадминистрацие ипащэ ыцIэкIи «Адыиф-2-м» къыфэгушIуагъ. Зэхахьэм къыщыгущыIагъэх «Адыиф-2-м» итренер шъхьаIэу Никита Голуб, командэм иешIэгъухэр зыщыкIохэрэ спорт Унэшхоу «Ошъутенэм» ипащэу Джэнчэтэ СултIан илъэсыбэрэ Iоф дэзышIагъэу Джарымэкъо Юсыф, республикэм гандболымкIэ и Федерацие ипащэу Кочева Сусаннэ, нэмыкIхэри.

«Адыиф-2-м» щытхъу тхылъхэр, кубокхэр фагъэшъошагъэх, спорышхом щылъыкIотэнэу фаIуагъ.

Дышъэр къэзыхьыгъэхэр: къэлэпчъэIутхэр: Пивнева Екатерина, Скнарь Юлиана, ешIакIохэр: Баева Юлия, Казиханова Диана, Кожубекова Юлия, Куцевалова Ангелина, Кучеренко Мария, Лагвиненко Валерия, Морозова Алина, Морозова Софья, Никуклина Дарина, Провоторова Полина, Суворова Ксения.

Дышъэр къэшъухьи лъэпсэшIу зэрэшъушIыгъэм фэшI тышфэгушIо!