Дунэе спортышхом щызэлъашIэрэ Кобл Якъубэ фэгъэхьыгъэ шIэжь зэнэкъокъур яблэнэрэу дзюдомкIэ Мыекъуапэ щыкIуагъ.Спорт Унэшхоу Кобл Якъубэ ыцIэ зыхьырэм шIэжь зэнэкъо­къур игъэкIотыгъэу къыщызэIуа­хыгъ. Зэхахьэр зезыщэгъэ Мэ­къулэ Руслъан зэфэхьысыжьхэм къащыхигъэщыгъэм уегъэгушхо. Кобл Якъубэ Олимпиадэ джэгунхэм, дунаим, Европэм ячемпионхэр ыгъэсагъэх. Адыгеим самбэмкIэ, дзюдомкIэ ибэнэпIэ еджапIэ лъапсэ фишIыгъ.

Урысыем и Къэралыгъо Думэ идепутатэу, дунаим самбэмкIэ гъогогъу 11 дышъэр къыщыдэзыхыгъэ Хьасанэкъо Мурат, Олимпиадэ джэгунхэм ячемпионэу Мудрэнэ Бислъан, Олимпиадэм джэрзыр къыщызыхьыгъэ Емыж Арамбый, Урысыем дзюдомкIэ и Федерацие илIыкIоу Дмитрий Новиковыр, Къыблэм дзюдомкIэ и Федерацие ипащэ игуадзэу Рудольф Бабоян, Урысыем изаслуженнэ тренерэу ЕмкIуж Мухьамэд, спортымкIэ дунэе класс зиIэ мастерэу, Кобл Якъубэ ыцIэ зыхьырэ спорт еджа­пIэм ипащэу КIуае Хьазрэт, Адыгэ къэралыгъо университетым иректорэу Мамый Даут, физкультурэмкIэ ыкIи дзюдомкIэ Институтым ипащэу Бгъуашэ Айдэмыр, Кобл Якъубэ ишъхьэ­гъусэу Джарэт, физкультурэмкIэ ыкIи спортымкIэ АР-м и Комитет ипащэу Дэгу­жъые Мурат, фэшъхьафхэри зэ­нэ­къокъум икъы­зэIухыгъо хэлэжьагъэх.

Хьасанэкъо Мурат шIэжь зэнэкъокъум хэлажьэхэрэм къа­фэгушIуагъ. Кобл Якъубэ ыцIэ дунэе спортым зэ­рэ­хэхьагъэр зэхахьэм къыщыгущыIагъэхэм хагъэунэфы­кIыгъ. Мэкъуогъум и 15 — 16-м бэнакIохэр зэнэкъокъугъэх. Къыб­лэм, Темыр Кавказым, Владимир, Воронеж, Вологодскэ хэкухэм, Къырым, Севастополь, Санкт-Петербург, Камчатскэ, фэшъхьаф­хэм къарыкIыгъэхэр зэнэкъо­къугъэх.

Адыгэ Республикэм ибэ­на­кIохэм медали 6 къыдахыгъ. Республикэм самбэмкIэ иеджапIэ зыщызыгъэсэрэ Мерэм Дамир дзюдомкIи мэбанэ. Нарт шъаор килограмм 60-м нэс къэзыщэ­чыхэрэм янэкъокъуи, дышъэр къыдихыгъ. Д. Хьакурынэмрэ М. Акъущэмрэ ащ итренерых.

ШъэоцIыкIу Айдэмыр, кг 81-рэ, дышъэм пэблэгъагъ. КIэух бэнэгъум джыракъые кIалэм ухьазырыныгъэ дэгъу къыщигъэлъэ­гъуагъ. Ау текIоныгъэр къыди­хынэу хъугъэп, тыжьыныр къы­фагъэшъошагъ. Тренер цIэрыIоу Беданыкъо Рэмэзан ары А. Шъэ­оцIыкIум ипащэр.

Къуижъ Бислъан, кг 73-рэ, Ордэн Заур, кг 73-рэ, Вардек Акопян, зэхэпхъэгъэ онтэгъугъэ зиIэмэ якуп, ящэнэрэ чIыпIэхэр къыдахыгъэх.

Къэбэртэе-Бэлъкъарым, Санкт-Петербург, Ставрополь краим, Чэчэным, Дагъыстан, нэмыкIхэм ябэнакIохэм яIэпэIэсэныгъэ дэгъоу къагъэлъэгъуагъ, медальхэр къыдахыгъэх.

Илъэс зэфэшъхьафхэм спортышхом нэIуасэ щызэфэхъугъэхэр Мыекъуапэ щызэIукIагъэх. Джарымэкъо Юсыф, Къадыр Аслъан, Цэй Аслъанчэрый, Джарымэкъо Азмэт, ЕмкIуж Мухьамэд, Емыж Арамбый, Аристотель Спировым, Мэрэтыкъо Сахьидэ, Тулпэрэ Мыхьамэт, Галина Нестеровам, Къуекъо Асфар, Пщыкъаныкъо Долэтыкъо, Нэпсэу Бислъан, Бастэ Сэлым, нэмыкIхэм шIэжь къэбарэу къаIотагъэхэм къафэдгъэзэжьыщт, анахь гъэшIэгъонхэм гъэзетеджэхэр ащыдгъэгъозэщтых.

Сурэтхэр зэнэкъокъум къыщытетхыгъэх.