ДжэгокIо шъыпкъэхэр Адыгеим щырагъэджэщтых
Гуманитар ушэтынхэмкIэ Адыгэ республикэ институтэу Т. М. КIэращэм ыцIэ зыхьырэм адыгэхэм яджэгу шэн-хабзэхэмкIэ Iэнэ хъурае щызэхащэгъагъ.
Iофтхьабзэр къызэIуихыгъ институтым идиректорэу, философие шIэныгъэхэмкIэ докторэу ЛIыIужъу Адам.
ЗэхэгущыIэгъум республикэм иныбжьыкIэхэр къырагъэблэгъэгъагъэх, ащ хэлэжьагъэх шIэныгъэлэжьхэу, профессорэу Унэрэкъо Рае, МКъТУ-м тарихъымрэ культурэмрэкIэ икафедрэ идоцентэу, тарихъ шIэныгъэхэмкIэ кандидатэу Цэй Заремэ, Урысыем исурэтышIхэм я Союз хэтэу ГъукIэ Замудин; АР-м изаслуженнэ журналистэу Кушъу Светэ, филологие шIэныгъэхэмкIэ докторэу, гуманитар ушэтынхэмкIэ Адыгэ республикэ институтэу Т. М. КIэращэм ыцIэ зыхьырэм ипащэ шIэныгъэмкIэ игуадзэу Биданыкъо Марзият ыкIи нэмыкIхэри.
Iэнэ хъураем адыгэ джэгум къешIэкIыгъэ упчIабэм щатегущыIагъэх: хъярым гъэпсыкIэ-шапхъэу хэлъыр, ныбжьыкIэхэм ыкIи ны-тыхэм ащ чIыпIэу щыряIэр, адыгэ шэн-хабзэхэм адиштэхэу ахэр агъэтIысыха, нысэмрэ кIалэмрэ къахаплъэ- хэу зэрэщысхэр, тортыр зэрабзырэр ыкIи къэгъэгъэ Iэрамыр нысэм къызэрахидзэрэр, етIанэкIэ нысэм иджэгу джанэ хэта къэзыщэфын фаер, адыгэ хабзэмкIэ укъикIымэ, хэта джэгум къыщышъон фитыныгъэр зиIэхэр, мыхэм анэмыкIхэри институтым щыIэгъэ Iофтхьабзэм къыщыраIотыкIыгъэх.
Iэнэ хъураем изэфэхьысыжьхэмкIэ унашъо горэхэр ашIыгъэх, ахэр ныбжьыкIэхэу ыкIи ахэм янэ-ятэхэу джэгу фэIо-фашIэр зыгъэхьазырынхэр къызпыщылъхэм агъэфедэхэмэ къашъхьапэщтых. ГущыIэм пае, зэкIэ джэгу мэфэкIым зэкIэлъыкIокIэ гъэнэфагъэу хэлъын фаер къыдэлъытагъэу сценариер тхыгъэныр, джащ фэдэу джэгокIо сэнэхьатыр зыгъэцакIэхэрэм апае семинар зэхэщэгъэныр ямурад. Блогерхэу социальнэ хъытыухэм ащыIорышIэхэрэм джэгу къэгъэлъэгъон материалхэм нахь афэсакъхэу, анаIэ атырагъэтын зэрэфаер Iэнэ хъураем щыкIагъэтхъыгъ, янэкIубгъохэм къарагъэуцохэрэм адыгэ хабзэм димыштэрабэ зэрахэтыр къыщаIуагъ.
(Тикорр.).