Шъукъеблагъэх зэнэкъокъум
Спортышхом щыцIэрыIоу Кобл Якъубэ фэгъэхьыгъэ шIэжь зэнэкъокъур мэкъуогъум и 15 – 16-м Мыекъуапэ щыкIощт.
Урысыем ишъолъырхэм дзюдомкIэ ябэнэкIуи 100-м нахьыбэ Кобл Якъубэ ыцIэ зыхьырэ спорт Унэшхом щызэIукIэщт. Адыгэ Республикэм физкультурэмкIэ ыкIи спортымкIэ и Комитет яблэнэрэу зэхищэгъэ зэнэкъокъур мэкъуогъум и 15-м пчэдыжьым сыхьатыр 10-м аублэщт. Пчыхьэм сыхьатыр 5-м шIэжь зэнэкъокъур игъэкIотыгъэу къызэIуахыщт.
ПэшIорыгъэшъ бэнэгъухэр мэкъуогъум и 15-м мафэм сыхьатыр 10.30-м рагъэжьэщтых. Килограмм 73-рэ, 81-рэ, 90-рэ, 100, 100-м къехъухэрэр шэмбэтым зэбэныщтых.
Мэкъуогъум и 16-м пчэдыжьым сыхьатыр 10-м зэнэкъокъур лъагъэкIотэщт. Килограмм 60, 66-рэ къэзыщэчыхэрэр, яонтэгъугъэкIэ зэхэпхъагъэхэр тхьаумафэм зэбэныщтых.
СССР-м изаслуженнэ тренерэу Кобл Якъубэ фэгъэхьыгъэ нэрылъэгъу IэпыIэгъухэр къызэIуахыщтых, искусствэм иIофышIэхэр щыуджыщтых, спортым иветеранхэм, зэхэщакIохэм къэбархэр къаIотэщтых. Ансамблэу «Нартым» хэтхэр, нэмыкIхэр хагъэунэфыкIхэрэ чIыпIэхэр къыдэзыхыгъэхэм афэгушIощтых, саехэр зыщыгъхэ пшъашъэхэр зэхэщакIохэм IэпыIэгъу афэхъущтых, Iофтхьабзэм лъэпкъ шэн-хабзэхэр щызэрахьащтых.
Физкультурэмрэ дзюдомрэкIэ Институтым ипащэу Бгъуашэ Айдэмыр къытиIуагъ зэнэкъокъум еплъыщтхэм языгъэпсэфыгъо уахътэ гъэшIэгъонэу агъэкIон зэралъэкIыщтыр. Олимпиадэ джэгукIэхэм, дунэе зэIукIэгъухэм медальхэр къащызыхьыгъэхэр спортым пыщагъэхэм аIукIэщтых, сатыушIхэм зэхахьэм Iоф щашIэщт.
ЗэхэщакIохэм спортым пыщагъэхэр рагъэблагъэх.