Адыгэ Республикэм футболымкIэ икомандэхэм 2019-рэ илъэс зэнэкъокъум хэхьэрэ апэрэ зэIукIэгъухэр яIагъэх.

КIэуххэр

Кощхьэблэ район – Джэджэ район – 7:4, Теуцожь район – Адыгэкъал – 4:4, «Герта» Ханскэр – Красногвардейскэ район – 0:2, Мыекъопэ район – Шэуджэн район – 7:0. Теуцожь районыр Адыгэкъалэ икомандэ зэрэдешIагъэр къыхэтэгъэщы. ЗэIукIэгъур аухынымкIэ такъикъи 2 къэнагъэу Теуцожь районым 4:2-у ешIэгъур ыхьыщтыгъ. ТакъикъитIум къыкIоцI Адыгэкъалэ иешIакIохэм хъагъэм Iэгуаор гъогогъуитIо радзи, зэнэкъо­къур 4:4-у аухыгъ.

Республикэм футболымкIэ и Федерацие ипащэу Николай Походенкэм тызэрэщигъэгъозагъэу, ятIонэрэ ешIэгъухэр бэрэскэшхом къыщыублагъэу зэхащэщтых. Шэмбэтым зэIукIэщтхэр: Красногвардейскэ район – Адыгэкъал, Теуцожь район – «Герта» Ханский. Кощхьаблэхэр Мыекъопэ районым дешIэщтых. Физкультурэм пыщагъэхэм япчъагъэ хэгъэхъогъэным, цIыфхэм япсауныгъэ гъэпытэгъэным, зыгъэпсэфыгъо уахътэр нахь гъэшIэгъо­нэу агъэкIоным афэгъэхьыгъэ зэнэкъокъур республикэм ипсэупIэхэм дэгъоу ащэкIо.