Адыгэ Республикэм самбэмкIэ, дзюдомкIэ иеджапIэхэм лъапсэ афэзышIыгъэу, СССР-м изаслу­женнэ тренерэу, я XX-рэ лIэшIэгъум Урысыем дзюдомкIэ итренер анахь дэгъоу Кобл Якъубэ фэ­гъэхьыгъэ шIэжь зэнэкъокъур мэкъуогъум и 15 — 16-м Мыекъуапэ щыкIощт.

— Къыблэм, Темыр Кавказым, Воронеж ыкIи Саратов хэкухэм, нэмыкIхэм ябэнакIохэр зэIукIэгъухэм ахэлэжьэщтых, — къытиIуагъ республикэм дзюдомкIэ иеджапIэу Кобл Якъубэ ыцIэ зыхьырэм ипащэу, спортымкIэ дунэе класс зиIэ мастерэу КIуае Хьазрэт. — Бэнэгъухэм апэрэ чIыпIэхэр къащыдэзыхыхэрэр Урысыем спортымкIэ имастер хъущтых. Зэнэкъокъум мэхьэнэ ин етэты. Кобл Якъубэ ыгъэ­сагъэхэр, щыIэныгъэм нэIуасэ, ныбджэгъу къыщыфэхъугъэхэр зэIукIэгъухэм яплъыщтых.

— Спортым имызакъоу, ис­кус­ствэм, лъэпкъ шэн-хабзэхэм афэ­гъэхьыгъэ Iофтхьабзэхэри зэ­хэтщэщтых, — зэдэгущыIэгъур лъегъэкIуатэ Адыгэ къэралыгъо университетым физкультурэмрэ дзюдомрэкIэ и Институт ипащэу Бгъуашэ Айдэмыр. — Адыгэ къа­шъохэр зэхахьэм къыщагъэлъэ­гъощтых, хагъэунэфыкIырэ чIыпIэхэр къыдэзыхыгъэхэм шIухьафтынхэр аратыжьыхэ зыхъукIэ, саехэр зыщыгъ пшъашъэхэр зэ­хэщакIохэм IэпыIэгъу афэхъущтых.

Зыныбжь икъугъэхэр алырэ­гъум щызэбэныщтых. Кобл Якъу­бэ ыцIэ зыхьырэ спорт Унэшхом зэнэкъокъур мэфитIум щыкIощт. Шъукъеблагъэх, спортыр зышIогъэшIэгъонхэр.