ЗэлъашIэрэ артистэу, драматургэу Мурэтэ Чэпай къызыхъугъэр илъэс 80 мэхъу
Лъэуж нэф къыгъэнагъ, IэпэIэсагъ
Зэчый дахэ зыхэлъыгъэ артист инэу, лъэпкъ искусствэм лъэгъо зэныбжь зэдиштэ пхырызыщыгъэу Мурэтэ Чэпай Исмахьилэ ыкъор мэкъуогъум и 12-м илъэс 80 хъущтыгъэ. Ар Кощхьэблэ районым ит къуаджэу Блащэпсынэ 1939-рэ илъэсым мэкъумэщышIэ унагъо къихъухьагъ.
Гурыт еджапIэр къызеухым, колхозым щылэжьагъ. 1962-рэ илъэсым театрэ искусствэм икъэралыгъо институтэу А. В. Луначарскэм ыцIэ зыхьырэр – ГИТИС-р дэгъу дэдэкIэ къыухыгъ.
Апшъэрэ еджэпIэшхор къызиухыгъэм щегъэжьагъэу, тыдэ Iоф зыщешIи, сценэр зэ IэкIыб ышIыгъэп, щэIэфэкIэ ренэу ащ тетыгъ. Илъэс 50 Iэпэ-цыпэм роль 200 фэдиз къышIыгъ адыгэ, урыс, дунэе классическэ драматургием къыхэхыгъэхэ произведениехэм ахэтхэ образ анахь гъэшIэгъонхэмкIэ. Мурэтэ Чэпае театрэ искусствэмкIэ гъэхъэгъабэу ышIыгъэхэм апае «УФ-м изаслуженнэ артист», «АР-м инароднэ артист» щытхъуцIэхэр къыфагъэшъошагъэх.
Мурэтэ Чэпае драмэхэу «Батыр», «Шъузабэхэр», «Ным игумэкI», «ШIулъэгъур мэшIошху», «IэнатIэм игъэрхэр», «Ер къызэрыкIырэр кIэнкIэ зан» зыфиIохэрэр ытхыгъэх, ахэр театрэхэм ащагъэуцугъэх.
Идрамэхэр зэхэугъоягъэхэу зыдэт тхылъхэу «Шъузабэхэр» (1994), «IэнатIэм игъэрхэр» (2004) къыдэкIыгъэх.
Мурэтэ Чэпае ыцIэ ымышIэу е ар ымылъэгъугъэу Адыгэ шъолъырым зыныбжь икъугъэ цIыф гори имысыгъэу сэгугъэ. Сыда пIомэ ар лъэпкъым анахь илъэпIэ артист цIэрыIуагъ, Iэдэб зыхэлъ цIыф Iушыгъ, гум къинэжьхэрэм ащыщыгъ. Ухэтми уемызэщынэу къэгущыIэми, орэд къеIоми, сценэм тетми, IокIэ-шIыкIэ дахэ хэлъыгъ. ЫшIэщтыгъэм гъуни нэзи иIагъэп, уигъэдэIон ылъэкIыщтыгъ. IэкIыб къэралыгъохэм арысхэ адыгэхэми ахахьэу, алъыIэсэу къыхэкIыгъ, адыгэ дунаим щыцIэрыIуагъ.
Сэри синасып къыхьыгъ ар зыхэт спектаклэ зэфэшъхьафыбэм мызэу, мытIоу сяплъыныр, мэфэкI инхэм иорэд макъи сыкIэдэIукIэу хъугъэ, «Мерэмыкъом иорэд» ащ зэригъэжъынчыщтыгъэм фэдэу гучIэ макъэр екIупэу хэти къыIожьышъущтэп; куп хэсми бэрэчэтыгъ – нэхъоир къыхилъхьэу, цIыфышIу дэдагъ. ГущыIэгъу уфэхъумэ, пшIоигъуагъэм бэкIэ нахьыбэжьэу къыпфыриIотыкIыщтыгъ. Сэри сшIагъэ а зэкIэми яхьатыркIэ зэлъашIэрэ цIыфым ищыIэныгъэ зыфэдагъэри, иунагъо илъыгъэ хабзэри, еджэныр икIасэу, цIыфыным кIэхъопсэу къызэрэтэджыгъэри.
Муратэхэр – бэслъынэих лъэпкъымкIэ, ЧеркесскэкIэ щыпсэущтыгъэхэм къатекIыгъэхэу ары къызэраIуатэщтыгъэр. Чэпае ятэжъ гъукIэ Iазэщтыгъ. Лъэпкъыр лIыцIэу Муратым къытекIыгъ: ащ ыкъор Темыр, ащ къытекIыгъэр ХьакIмаф, етIанэ Пщымаф, Бислъан (ар Чэпае ятэжъыгъ ыкIи ятэ Исмахьил ыцIагъэр), ежь Чэпае яблэнэрэ лIэужэу хъугъэ.
ЦIэр – Чэпаер фаусынэу зэрэхъугъэри къыIуатэщтыгъ. Ятэшыпхъум ыпхъоу Саудэт пшъэшъэ чэфылэ-нэутхэу, орэдыIоу, къэшъуакIоу, илъэси 9 – 10 горэкIэ ежь нахьыжъэу иIагъ. Ащ КIубэ Щэбанэ иорэдэу «Чэпай лIы къызэрыкIоп» зыфиIорэр къыIощтыгъ. ЗэдапIугъэхэу ыкIи зэфэщагъэхэу щытыгъэх. ЦIэу «Чэпай» ащ къыфиусыгъ, лIыгъэ хэлъэу, цIэрыIо хъунэу фэягъ. ЯунэгъокIоцI Iуи, шIи имылъэу, тынчыпIэу, рэхьатэу зэрэщытыгъэр, пIуныгъэ дахэ ны-тыхэм зэрэрагъэгъотыгъэр сыдигъуи кIигъэтхъыщтыгъ. Янэрэ ятэрэ псэогъу зэрэзэфэхъугъэхэ шIыкIэми щыгъозагъ, янэжъ-ятэжъхэр дунаим зехыжьхэм, ятэ бын Iужъум анахьыжъэу, зикъэмыщэу къызэрэнагъэр ыкIи ятэшыпхъу Хьабидэт ыш къыщэщтыр осыет къызэришIыжьыгъагъэр, ар ежь якъуаджэ щыщэу, Къошымэ япхъоу, бзылъфыгъэ шъабэу, цIыфышIоу ны фэхъущтыр арэу къызэрэчIэкIыгъэр Чэпае къыIуатэщтыгъ. Янэ ежь ятэ къымыщэзэ, гъогу закъор азыфагоу щысыгъэхэ Къулэхэм илъэс 16 зэрянысагъэр, бын зэримыIагъэр, илI зэлIэм ращыжьи, ытыщ зэращэжьыгъагъэр ышIэщтыгъ. Ау ятэ апэ ар къыщэнэу зыраIом, «Арэп, ар жъыIоба?» зэриIогъагъэри Чэпае къыIожьыщтыгъ. Ау ныбжьымкIэ зэрагъэхь шIагъо щыIагъэп, Исмахьилэ Iаби къыщагъ. АщкIэ ятэ ныбжьи зэрэкIэмыгъожьыгъэр, ныр гукIэгъушIэ къэбзэ-лъабзэу, IэпкIэ-лъапкIэу, унагъуи колхози зэдиIыгъынхэр зыфэукIочIыгъэу зэрэщытыр кIигъэтхъыщтыгъ. Чэпае къыIуатэщтыгъ: «Мэзэгъо чэщми хатэри сянэ ыпкIэщтыгъ. Сятэ лIы Iэтыгъагъ, «Исмахьил кIыхь» — аIощтыгъ. Заом защэм илъэсрэ ныкъорэ сыныбжьыгъ – къыгъэзэжьыгъэп».
Шъачэ пыим язымыгъэштагъэхэм Чэпае ятэ, Мурэтэ Исмахьилэ ащыщыгъ, Краснэ Полянэм дэжь чъэпыогъум и 20-м, 1942-рэ илъэсым щыфэхыгъэхэ дзэкIолI 250-мэ ащыщ хъугъэ. Зэо ужым мы чIыпIэм саугъэт ахэм ацIэкIэ щагъэуцугъ, чIыпIэ еджапIэм имузей цIыкIу Iоф ешIэ, туристхэр плъакIо бэу къэкIох, Чэпае ятэ исурэт ащ чIэт, мамырныгъэр зыухъумагъэхэм яшIэжь агъэлъапIэ.
Зэошхоу хьазабыр цIыф лъэпкъыбэу хэгъэгум исхэм языгъэщэчыгъэр уцужьыгъэ, а илъэсхэр псынкIагъэхэп, ау ны Iушым, Чэпае янэ, ыкъо цIыкIу игукIэгъу мыухыжькIэ а къиныгъохэм ащиухъумэныр фызэшIокIыгъ; янэ шъаом фиIуатэщтыгъэ ятэ зыфэдагъэр, ригъэшIагъ ыкIи шIу ригъэлъэгъугъ. Ежь бзылъфыгъэ Iушри къарыогъу зыфэхъужьын ылъэкIыгъ, илъфыгъэ щыгъынкIи, шхынкIи зыми щигъэкIагъэп. Чэпае кIигъэтхъыщтыгъ: «Сянэ колхозницагъ, Iоф пстэуми ыIэ якIущтыгъ. Чэм мыгъужь тиIагъ, шъоу балон тиунэ имытэу хъугъэп. Тятэ зэпсаум зыфэдагъэр шIу зыфишIагъэу, IэпыIэгъу зыфэхъугъэ тигъунэгъухэм ялIыжъэу хьафизэ хъугъэм бэрэ къыIотэжьэу зэхэсхыгъэ: «зимыIэм кIэIэн, деIэн ылъэкIыщтыгъ а уахътэр хьашхъурэIу щынэгъуагъэми», етIанэ къыпигъэхъожьыщтыгъ: «уятэ джэнэтым кIощт» ыIозэ, лIыжъым Iэ къысщифэщтыгъ».
Чэпае янэ ищыIэныгъэ чIыпIэшхо зэрэщыриIагъэр мыгъуащэу, ащ идэгъоу, идахэу къыIуатэщтыгъэр бэдэд: «Сянэ ыпсэ къызэрэсIуилъхьэрэри слъэгъущтыгъэ, зэхасшIэщтыгъэ. Сэри ежьым ыгу зэрэхэзгъэхъощтым нахь такъыр сызэхъум сыпылъыгъ; еджэным сегугъущтыгъ, цIыфы сыхъумэ сшIоигъуагъ».
Чэтунэм (Лабинскэ) тхъу, къуае, кIэнкIэ зыфэпIощтхэр ыхьыхэти, Чэпае янэ бэдзэрым кIощтыгъэ, ежьыри зыдищэу къыхэкIыгъ. «IэшIу горэ къэщэф» ыIуи зэ соми 2 къызыретым, «Ленин» тетхагъэу тхылъ къызэрищэфыгъагъэр ыкIи ар иапэрэ тхылъэу зэрэхъугъэр щыгъупшэщтыгъэп. Чэпае кIэлэцIыкIу IупкIэу, нэутхэу, чанэу сыдрэ общественнэ IофшIэни хэлажьэрэ еджакIощтыгъ. Зэ я 6-рэ классым исэу Кощхьэблэ районымкIэ пионер нэбгырэ 20 хъухэу Мыекъуапэ, хэку слетым къащэгъагъэх, ежьыр быракъзехьагъ. Ащ ыужым районымкIэ пионерхэм я Унэ ипащэу Сарэ игъусэу край слетым, етIанэ Краснодар кIогъагъэх. Ежь кIалэм ыгукIэ шIоигъоу, Андырхъое Хъусенэ иусэу «Живи наш Сталин» зыфиIорэр, ежь-ежьырэу ялъэIуи, сценэшхом дэкIуаий къыщиIогъагъ, апэрэ чIыпIэр къыфагъэшъошэгъагъ, тхылъ Iэтэ зэтелъ къыратыгъагъ. Чэпае ренэу апэрэ спектаклэу кIэлэцIыкIу пшысэу «Аленький цветочек» зыфиIорэм Мыекъуапэ слетым зэкIом зэрэщеплъыгъагъэри ыгу къыдэоежьыщтыгъ. МэкIэ-макIэу сэнэхьатымкIэ фэщэныгъэр, гухэлъыр къэущыгъэх. ШIукIэ ыгу къэкIыжьыщтыгъ Iэтахъозэ Мацхэм адэжь илъыгъэ тхылъ шIуцIэшхоу пшысэхэр зыдэтым къызэрэрагъаджэщтыгъэри, макъэм игъэуцун-гъэпсынкIэ ащ ишIуагъэ къызэрэкIуагъэри. Къуаджэм дэсыгъэхэ IорIотэкIо Iазэхэм, Щыкъ Осмэн фэдэ тхыдэIотэ дэгъухэм зэрядэIугъэми ишIуагъэ къекIыгъ.
Илъэсхэр псынкIэу кIуагъэх, еджапIэр къызеухым зы илъэсрэ къуаджэм дэсыгъ, колхозым Iоф щишIагъ.
Пчыхьэ зыгъэпсэфыгъохэм клубым ныбжьыкIэхэр кIощтыгъэх. Мы уахътэм апэрэу пьесэу «Къуаджэр зэщыгъо» зыфиIорэр Мурэтэ Чэпае ытхыгъ ыкIи ар чылэм щагъэуцугъагъ. Ыужым, Москва ГИТИС-м чIахьэ зэхъум, ащ икъэбар щыгъуазэхэу щытыгъэхэ КIэрэщэ Тембот, Къуныжъ Мыхьамэт апкъ къикIэу итхэн Iоф Еутых Аскэр рагъашIи, еджэпIэшхом чIэхьанымкIэ пьесэм ишIуагъэ къекIыжьыгъагъ. «Музыкэ Iэмэ-псымэу сыда къызэбгъаIорэр?» аIуи къызеупчIыхэм, «патефон» ариIогъагъ.
Щэч зыхэмылъыр ГИТИС-м щезыгъэджагъэхэ кIэлэегъэджэ цIэрыIохэм артист сэнэхьат ялыер ыгу зэрэрагъэхьыгъэр, сценэр шIу зэрэрагъэлъэгъугъэр ары. Ежь Чэпае режиссурэмкIэ икIэлэегъэджагъэу Мария Осиповна Кнебель, актер IэпэIэсэныгъэмкIэ езыгъэджагъэу Александр Дмитриевич Поповым, нэмыкIхэм ыкIи янэу мыпшъыжьэу зыгъэгушхоу сыдигъуи къыготыгъэм гъунэнчъэу къыдэхъугъэ пстэумкIи зэрафэразэр къыIощтыгъ. Ауми, янэ «артистым» къикIырэр зэримышIэщтыгъэр, зэрэзэхимыфыщтыгъэр, ащ къыхэкIэу зыфеджэрэмкIэ ныр къызеупчIыкIэ, врачэу, кIэлэегъаджэу, агрономэу, тхьаматэу къычIэкIыщтэу риIощтыгъ, ролыбэу къышIыщтхэр зэкIэ къызэхилъхьэщтыгъэх. Ары ыкIи къызэрэчIэкIыгъэри: бэ инасып къыхьыгъэр, кIэлэегъэджэ дэгъу дэдэхэми Iоф къыдашIэщтыгъ.
Адыгеим къызагъэзэжьым, ныбжьыкIэ купышIоу Адыгэ драмтеатрэм исценэ къытехьагъэх, лъэпкъ драматургием ипьесэ анахьышIухэм атехыгъэхэ спектаклэхэу «Дэхэбаринэ ихьакIэщ», «Ее последняя ставка», «Счастье само не приходит», Шъхьаплъэкъо Хьисэ ипьесэу «Шэуджэн Мос» — Мосэ ироль, Ч. Айтматовым иеу «И дольше века длится день», ШекспиркIэ – Отелло, ежь идрамэхэу «Шъузабэхэм», «Ным игумэкI», «IэнатIэм игъэрхэм», мыхэм анэмыкIхэм роль зэфэшъхьафхэр дэгъу дэдэу къащишIыгъэх. Къулайныгъэм готэу гухахъори къэкIуагъ, IэпэIэсэныгъэми зэригъэжагъэп. Мафэхэр, илъэсхэр кIощтыгъэх, Мурэтэ Чэпае театрэр ежь щыщ шъыпкъэ, ищыIэныгъэ ин хъущтыгъэ. Театрэм готэу Адыгэ радиом творческэ гъусэныгъэ пытэ дыриIагъ, художественнэ тхыгъэхэм къяджэщтыгъэ, зарисовкэхэр, очеркхэр ыгъэхьазырыщтыгъэх. Итворчествэ нахь зыкъызэIуезыгъэхыгъэмэ ащыщ зекIон-зыплъыхьан гъогухэу ышIыгъэхэри: Америкэм, Германием, Сирием, Тыркуем, Израиль ащыIагъ, ылъэгъуи, зэхихи игуапэу джащыгъум тхьапэм ригъэкIугъ, тхэным ыгъэрэхьатыщтыгъ, гупшысэныр лъэшэу икIэсагъ. Орэд усыгъэхэри гучIэм къиIукIхэу иIэх. Чэпае къэралыгъо IэнэтIэзехьэуи хъугъэ – АР-м культурэмкIэ иминистрагъ. А зэкIэми щыIэныгъэр нахь зэхэугуфыкIыгъэу ыкIи цIыфхэр (Iэтыгъэ-хэхыгъэхэр ыкIи къызэрыкIохэр – лэжьакIохэр) нахь рагъэшIагъэх, гухэлъхэр ежь-ежьырэу къэущыщтыгъэх, лъэпкъ гупшысэм ренэу удэлэжьэн, удэулэун зэрэфаер ышIэщтыгъэ, ренэу икIэсэ Адыгэ къэралыгъо драмтеатрэм иIофшIэн ышъхьэкIэ хэлажьэщтыгъ, гъашIэр жъотыгъ. Иунэгъо шIагъэ къыкIэхъухьэщтыгъ: ыпхъуищ унагъохэр ашIагъ, сэнэхьатхэр агъотыгъэх, ахэм ялъфыгъэ дахэхэр нэбгыри 9 хъугъэх… Мурэтэ Чэпае ишIугъошхуагъ, илъэс 74-м итыгъ идунай зехъожьым. Лъэуж нэф къыгъэнагъ артист цIэрыIоу, тхэкIо гъэшIэгъонэу Мурэтэ Чэпай Исмахьилэ ыкъом ыкIи ишIушIагъэкIэ ар лъэпкъым къыхэнэщт.
Мамырыкъо Нуриет.