Гум къылъыIэсырэр зэхэщэкIошIу
ШIушIэ пчыхьэзэхахьэу «Дунаим итеплъ» зыфиIоу адыгэхэм афэгъэхьыгъэр гъэшIэгъонэу Мыекъуапэ щыкIуагъ.
Къырым Урысыем къыхэхьажьыгъэу мэпсэу. Адыгеим игъунэгъоу Къырым ишIэныгъэлэжьхэр, тхакIохэр, зекIо Iофыгъохэм апылъхэр кIэщакIо фэхъухи, альманахэу «Дунаим итеплъэр» едзыгъуи 7 хъоу къыдагъэкIынэу рахъухьагъ.
— Урысыем лъэпкъыбэ щэпсэу, — къыщиIуагъ пчыхьэзэхахьэм тхакIоу, альманахым икъыдэгъэкIын чанэу хэлэжьэрэ Андрей Осташко. — Адыгэхэм ятарихъ нахь игъэкIотыгъэу дунаим щядгъашIэ тшIоигъу.
Къыблэ шъолъырым, Темыр Кавказым адыгэхэр ащэпсэух. Краснодар, Ставрополь крайхэм, Адыгэ Республикэм, Къэбэртэе-Бэлъкъарым, Къэрэщэе-Щэрджэсым адыгэхэр бэшIагъэу арысых. Лъэпкъыр итэкъухьагъэ хъугъэшъ пчъагъэу зэрэхъурэр къэлъытэгъуаеми, Урысыем ишъолъырхэм ямызакъоу, Тыркуем, Сирием, Иорданием, Израиль, США-м, Германием, нэмыкI IэкIыб къэралыгъохэм ащыпсэухэзэ зэлъэкIох.
Ныдэлъфыбзэр, шэн-хабзэхэр адыгэхэм къаухъумагъэх, лъэпкъ анахьыжъэу дунаим тетхэм ащыщых. Культурэм, искусствэм, спортым, щыIэныгъэм илъэныкъо зэфэшъхьафхэм закъыщызэIуахын алъэкIы.
IэкIыбым къикIыгъэх
— Адыгэ Республикэм и ЛIышъхьэу КъумпIыл Мурат мыгъэ Тыркуем къызэрэкIуагъэм, къэралыгъом ипащэхэм зэраIукIагъэм тигъэгушIуагъ, — къытиIуагъ къалэу Измир къикIыгъэ тиныбджэгъоу ЛIыхъужъыкъо Хьакан. — Дунаим щыцIэрыIо ансамблэу «Налмэсым» иконцерт Тыркуем сыщеплъыгъ. Республикэм иорэдыIоу Кушъэкъо Симэ тадэжь щыIагъ. Мыекъуапэ лъэпкъ культурэм ехьылIагъэу щыслъэгъугъэр Тыркуем згъэзэжьмэ къафэсIотэщт.
ЛIыхъужъыкъо Хьакан тиреспубликэ къэкIожьынышъ, щыпсэун имурад.
— Купышхо тыхъоу Сирием тыкъикIыгъэу Адыгеим зыщытэгъэпсэфы, — тизэдэгущыIэгъу лъегъэкIуатэ СтIашъу Борисэ. — Сиунэкъощхэр сигъусэх. Хъан, Мунэ, Шахирэ, нэмыкIхэм концертыр ашIогъэшIэгъон. Адыгэхэм ятарихъ нахь дэгъоу зэдгъэшIэнымкIэ мыщ фэдэ зэIукIэгъухэр тищыкIагъэх.
Бзылъфыгъэ ныбжьыкIэ ищыгъэу Задэ лъэкъуацIэу ыхьырэм сыкIэупчIэнэу игъо сифагъэп. Ащ къытиIуагъэр лъэпкъ гупшысэм къыпкъырэкIы. Адыгэхэр тыдэ щыIэхэми, зы бзэкIэ зэдэгущыIэнхэ алъэкIы. Яорэдхэр, къашъохэр дахэх, лъэпкъыр зэфащэ.
Нэгъой Яшар гражданствитIу иI. Тыркуем къикIыгъэу пчыхьэзэхахьэм зэрэхэлэжьагъэр щыгъупшэжьыщтэп. Къырым итхакIохэм альманахэу къыдагъэкIыгъэр шIогъэшIэгъон. КIэщакIохэм зэхэщэн IофыгъохэмкIэ IэпыIэгъу афэхъунэу гухэлъ иI.
ТыркубзэкIи къыдарэгъэкI
— Адыгэхэм ятарихъ, ящыIакIэ хэшIыкI фыряIэу альманахыр зэрагъэфагъ. Тхылъэу къыдагъэкIыгъэр Урысыем ишъолъырхэм, IэкIыб къэралыгъохэм алъыIэсыщт. Альманахыр тыркубзэкIи къыдагъэкIы тшIоигъу. Тыркуем тхылъеджапIэу къыщызэIуахыгъэм адыгабзэкIэ къыхаутыхэрэр шъхьафэу къыщагъэлъагъох. Альманахым тилъэпкъ ехьылIэгъэ къэбархэу къыщыхаутыгъэхэм уагъэгъуазэ. Лъэпкъым итарихъ шэн-хабзэхэр къизыIотыкIыхэрэ тхыгъэхэр тищыкIагъэх.
Рагъэжьагъэр лъагъэкIотэщт
Литераторэу, журналистэу, драматургэу Ольга Мельчукрэ Андрей Осташкэрэ зэхахьэм къызыщэгущыIэхэм, альманахым иятIонэрэ къыдэкIыгъо Iоф зэрэдашIэрэр хагъэунэфыкIыгъ.
Пчыхьэзэхахьэр зэращагъ журналистэу Ахэджэго Рузанэрэ артист ыкIи орэдус цIэрыIоу Лъачэ Альбертрэ. Лъэпкъым ехьылIэгъэхэ тхыгъэхэу альманахым къыщыхаутыгъэхэм ащыщ пычыгъохэм зещакIохэр IупкIэу къяджагъэх.
Концертыр
Адыгэ Республикэм и Къэралыгъо академическэ лъэпкъ ансамблэу «Налмэсым» «ЗэфакIор», «Налмэсыр къэшъор», IэкIыбым щыIэхэ тилъэпкъэгъухэм якъэшъо зэхэтхэр, Тыркуем щыпсэухэрэм афэгъэхьыгъэ къашъор, нэмыкIхэри къашIыгъэх. Къашъохэр къэзышIыгъэхэ Хьакъуй Анжеликэ, Бэрзэдж Дианэ, Ахътэо Бэлэ, Къулэ Алый, Абрэдж Алинэ, Едыдж Гушъао, Симболэт Бислъан, фэшъхьафхэм бэрэ Iэгу афытеуагъэх. Артист цIэрыIохэу Быщтэкъо Азэмат, Дзыбэ Мыхьамэт, Лъачэ Альберт яорэдхэр гум къылъыIэсыгъэх.
Боджэкъо Бэлэрэ Цурмыт Рузанэрэ адыгэ шъуашэхэу ашIыгъэхэр пчэгум игъэкIотыгъэу къыщагъэлъэгъуагъэх. Сэе фыжьыр зыщыгъ пшъашъэр кIэракIэу зэрэплъэгъурэм уегъэгушхо, уилъэпкъ дунаим нахьышIоу щашIэ пшIоигъоу хэкIыпIэхэм уягупшысэ.
КIэлэцIыкIу ансамблэу «Мыекъуапэ инэфылъэхэм» икъашъохэр зыплъэгъухэкIэ, лIэужхэм язэпхыныгъэхэр зэрэпытэхэр нэгум нахьышIоу къыкIэуцо.
Узэкъотмэ — улъэш. Пчыхьэзэхахьэм адыгэхэр, урысхэр, украинцэхэр, къэндзалхэр, нэмыкIхэри хэлэжьагъэх. Концертым еплъыгъэхэм альманахым иапэрэ едзыгъоу къыдэкIыгъэр ащэфыгъ. «Налмэсым» ихудожественнэ пащэу Хъоджэе Аслъан къызэрэтиIуагъэу, рагъэжьэгъэ лъэпкъ Iофыр лъагъэкIотэщт.
ЕмтIылъ Нурбый.
Сурэтхэр зэхахьэм къыщытетхыгъэх.