Москва щызэды­ряIэгъэхэ зэIукIэгъу­хэм атегъэпсыхьагъэу Федеральнэ гъогу агентствэм (Росавтодорым) ипащэу Андрей Костюкрэ Адыгеим и ЛIышъхьэу КъумпIыл Муратрэ республкэм игъогу-транспорт инфраструктурэкIэ анахь зигъо Iофы­гъоу къэуцугъэхэм ахэплъагъэх.

Мы зэIукIэгъум хэлэжьагъэх Адыгэ Республикэм и Премьер-министрэу Адлександр Наролиныр, Адыгэ Республикэм псэолъэшIынымкIэ, транспортымкIэ, унэ-коммунальнэ ыкIи гъогу хъызмэтымкIэ иминистрэу Валерий Картамышевыр, джащ фэдэу Росавтодорым иструктурнэ подразделениехэм япащэхэр.

Федеральнэ ведомствэм ипащэ зэрэхигъэунэфыкIыгъэмкIэ, гъогу хъызмэтым ихэхъоныгъэ гъэпсынкIэгъэнымкIэ, лъэпкъ проектэу «Автомобиль гъогухэр дэгъухэу ыкIи щынэгъончъэу щытынхэр» зыфиIорэр пхырыщыгъэнымкIэ, гъогу инфраструктурэр гъэкIэжьыгъэнымкIэ 2024-рэ илъэсым нэс къызэлъызыубытырэ планыр гъэцэкIэгъэнымкIэ Урысые Федерацием и Президент пшъэ­рылъ гъэнэфагъэхэр къыгъэуцугъэх.

«Мы IофшIэным икIэухэу хъун фае гъогу инфраструктуракIэм игъэпсын. Урысыем щыпсэухэрэ цIыфхэмкIэ ар Iэрыфэгъоу щытын фае. КъызэрэсщыхъурэмкIэ, Адыгэ Республикэми а лъэныкъомкIэ гъэхъэгъэшIухэр ышIынхэ ылъэкIыщт», — къыIуагъ Андрей Костюк.

Республикэм и ЛIышъхьэ Росавтодорым ипащэ ыгъэгу­гъагъ пшъэрылъхэм атегъэпсы­хьагъэу гъогу отраслэм тапэкIи хэхъоныгъэ ышIыным пае ищыкIэгъэ Iофтхьабзэхэр зэкIэ рес­публикэм зэрэщырахъухьащтхэмкIэ.

ГущыIэм пае, Iофышхоу зэшIуахыщтым къыдыхелъытэ Мыекъуапэ иавтомобиль гъогухэм, джащ фэдэу республикэ ыкIи чIыпIэ мэхьанэ зиIэхэ гъогухэм ягъэцэкIэжьын. 2024-рэ илъэсым нэс республикэ мэхьанэ зиIэхэ автомобиль гъогухэр нахьыбэ тшIыщтых, ахэм къатехъухьэхэрэ тхьамыкIагъохэр амал зэриIэкIэ нахь макIэ шIыгъэнхэм телъытэгъэ Iофтхьабзэхэр ыкIи нэмыкIхэр зэшIотхыщтых. Лъэпкъ проектэу «Автомобиль гъогухэр дэгъухэу ыкIи щынэгъончъэхэу щытынхэр» зыфиIоу 2024-м нэс къыз­хиубытэрэр гъэцэкIэгъэным сомэ миллиарди 3,3-м ехъу пэIуагъэхьанэу щыт.

«Республикэм игъогу хъыз­мэт IэпыIэгъу етыгъэным фытегъэ­псыхьэгъэ къэралыгъо программэхэм адиштэу федеральнэ мылъкоу къыфыхагъэкIыгъэр зэкI пIоми хъу­нэу республикэм аIэ къыщы­рагъэ­хьагъ. Мы илъэс­ми джащ фэдэ гъэхъагъэхэр тшIынхэ тимурад, ащ къыхеубытэ гъогу­хэр щынэгъон­чъэу щытынхэм телъытэгъэ проектри», — кIигъэтхъыгъ КъумпIыл Мурат.

Ащ нэмыкIэу мы зэIукIэм къыщаIэтыгъэхэ Iофыгъохэм ащыщых проект инитIумэ ягъэ­цэкIэн – Мыекъуапэ къыщызыухьащт автомобиль гъогумрэ псыхъоу Шъхьащэфыжь те­лъыщт лъэмыджымрэ яшIын. А гухэлъхэм апае мы илъэсым федеральнэ бюджетым сомэ миллион 300 къыхагъэкIыгъ.

Республикэ гъогухэм ащыщхэр федеральнэ гупчэм фэгъэ­загъэхэу шIыжьыгъэнхэм лъэныкъохэр тегущыIагъэх. ГущыIэм пае, республикэ автомобиль гъогоу Мыекъуапэ – ТIуапсэ (километри 137,8-рэ) 2028-рэ илъэсым нэс федеральнэу хъу­жьынэу ары.

ЗэIукIэгъум икIэухым магистральнэ инфраструктурэм игъэкIэжьынкIэ ыкIи изегъэ­ушъомбгъункIэ Iофтхьабзэхэу республикэм щызэрахьащтхэм атегущыIагъэх. Зэрагъэнэфа­гъэмкIэ, транспорт гъогу зэхэ­кIыпIэу я 103-рэ километрэм дэжь щагъэпсырэр 2024-рэ илъэсым нэс аухыщт, федеральнэ гъогоу Р-217 «Кавказ» зыфиIорэм изы Iахьэу щыт екIолIапIэу къалэу Мыекъуапэ ылъэныкъокIэ щыIэр икIэрыкIэу зэтырагъэпсыхьажьыщт.