ТырэгущыIэ, дунаим щагъэлъапIэ
Урысыбзэм и Мафэ фэгъэхьыгъэ зэхахьэхэр Адыгэ Республикэм тыгъуасэ щыкIуагъэх.
Республикэм итеатрэхэм Iоф зыщашIэрэ унэм ыпашъхьэ Александр Пушкиным исаугъэтэу щытым нэбгырабэ къыщызэрэугъоигъ. Пчэдыжьым кIэлэеджакIохэр, кIэлэегъаджэхэр, поэзием пыщагъэхэр саугъэтым ыпашъхьэ щытлъэгъугъэх. Усэхэм къяджэхэзэ, нэпэеплъ сурэтхэр ныбжьыкIэхэм атырахыгъэх.
— Урысыбзэр, литературэр кIэлэеджакIохэм язгъашIэхэзэ илъэсыбэрэ Iоф сшIагъэ, — къеIуатэ Антонина Крючковам. — Бзэр дэгъоу зышIэрэм щыIэныгъэр нахьышIоу къыгурэIо. Александр Пушкиным исаугъэт сыкIэрытэу IофшIэным иветеранхэм, ныбжьыкIэхэм сигуапэу гущыIэгъу сафэхъугъ. Урысыбзэр зэрагъэлъапIэрэр къахэщэу тхэкIо цIэрыIом шъхьащэ фашIы.
Хэгъэгум икоммунистическэ партие икъутамэу Адыгэ Республикэм щыIэр кIэщакIо фэхъуи, урысыбзэм и Мафэ фэгъэхьыгъэ зэхахьэ А. Пушкиным исаугъэт ыпашъхьэ щызэхащагъ. КПРФ-м и Адыгэ реском иапэрэ секретарэу Евгений Саловыр Iофтхьабзэм къыщыгущыIагъ. Александр Пушкиным урысыбзэм лъапсэ зэрэфишIыгъэр хигъэунэфыкIыгъ.
Партием и Мыекъопэ къэлэ комитет иапэрэ секретарэу, Адыгэ Республикэм и Парламент идепутатэу Елена Москаленкэр, комсомолым и Адыгэ республикэ комитет иапэрэ секретарэу, Мыекъуапэ инароднэ депутатхэм я Совет идепутатэу Марина Ситниковар, адыгэхэм ядунай щыцIэрыIо археологэу Тэу Аслъан, нэмыкIхэри зэхахьэм хэлэжьагъэхэм гущыIэгъу афэхъугъэх.
— Бзэр цIыфлъэпкъым ыпс, — къеIуатэ Адыгэ Республикэм культурэмкIэ изаслуженнэ IофышIэу, Урысыем ижурналистхэм я Союз хэтэу, адыгэ ашугэу Теуцожь Цыгъо июбилейнэ медаль къызыфагъэшъошагъэу Тэу Аслъан. — Тэ урысыбзэм тырыгущыIэ зыхъукIэ Александр Пушкиным ишIушIагъэ мэхьэнэ ин етэты. Ащ иусэхэм тяджэзэ, щыIэныгъэм зыфэдгъэсагъ. Урысыбзэмрэ адыгабзэмрэ язэпхыныгъэхэр къыдэтлъытэхэзэ тиныдэлъфыбзэ ишъэфхэр зэтэгъашIэх.
Коммунистхэм, комсомолым хэтхэм гъусэ афэхъухи, Александр Пушкиным исаугъэт екIолIагъэхэм усакIом лъытэныгъэ зэрэфашIырэр къагъэшъыпкъэжьыгъ. Александр Пушкиным псэ къызыпигъэкIэгъэ урысыбзэу непэ дгъэфедэрэр къэралыгъуабзэу тиI, дунаим щырэгущыIэх.
Сурэтыр зэхахьэм къыщытетхыгъ.