IэкIыбым щыпсэурэ тилъэпкъэгъухэр
Хышхор тазыфагу, ау…
УсакIоу Еутых Турхьан Тыркуем Кайсэр къалэ пэгъунэгъу Хьатикъое чылэм щыщ. БэмышIэу ащ итхылъэу «Гум ипыткIуафэхэр» зыфиIорэр Тыркуем къыщыдэкIыгъ.
Тхылъым къыдэхьэгъэ усэ заулэрэ профессорэу Унэрэкъо Рае ахэм къариIолIэрэ гупшысэхэмрэ мыщ къыкIэлъыкIоу къыхэтэутых.
Учыжьэми укъыспэблагъ псэкIэ, синыбджэгъу. ТызэнэIуасэп, ау усэхэм гупсэ тызэфашIыгъ. Моу сыплъэмэ — Шъхьэгощэ Iушъо уIут. Ныбжьи умылъэгъугъэ Мыекъуапэ удэт къэлэ урамхэм атекIутэгъэ нэфыпсыр къызэпщэкIыгъэу.
Сыомыджэзэ укъызэплъэкIыщт, сыкъэпшIагъэу гукIэ, а зыбзэм тырэпсалъэшъ, а зы нэхэмкIэ тыхэплъэшъ дунаим.
Хымэ шъофхэм уарыт, синыбджэгъу, ау Iошъхьэмафэ уипкIыхьэлъэгу. Лэбэпс иты- жьын жъгъырыу макъэ уиусэхэм къахэIукIы. Хьатыкъоябзэу Хэкужъым щыпсэхыжьрэм псэ Iоолъхьажьы.
Гум ипыткIуафэх уиусэхэр: нэшхъэих, ау нурэр ашъхьарехы. Адыгэ гъашIэр гукIэ зэогъэзафэ. Нэ чанкIэ КъэкIощтым упэплъэ, блэкIыгъэм псэкIэ уедао.
Ары шъхьае, синыбджэгъу, умыгъэшIагъо, джыри Истамбыл гъогужъым тызэрэтет. Сыд къытажэрэр? Нэфынэ маха, хьауми шIункIы гуиха? УсакIом нэмыкIэу хэт зэхишIэна тызэкIурэ Чыжьэр зыфэдэр. Къэдгъотрэм нахьыб тшIокIодрэр. ТазыкIэлъэныкъо гозыгъэу зы тамэм зетэгъэIэты. Ау чыжьэу тынэсрэп. ХыкIыбым щыIэри лъэсы-лъэбыIоу имыгъогухэм атет, зыдежьагъэм нэмысышъоу. Ауми тыщыI. ТэщыIэ.
Тыхэт тэ, адыгэр? ТиIэп джэуап. Игъо тифэрэп зытшIэжьынэу. Зыбзэрэ зихабзэрэ щызынэжьхэрэм уагъэтхьауе. Тэри тикъин ар, тигухэкI. Сыдэу тыхъущта зэрэдунаеу агъэшIагъо икъун кIуачIэ зыхэлъ адыгагъэр тшIокIодмэ? Джынэс лъэпкъыр къезыхьакIыгъэ адыгабзэмрэ адыгэ хабзэмрэ якъарыу мэкIуасэ. Хэт кIэгъэкъон афэхъущтыр?
Тэщ нахь лъэш Лъэхъанэу тезыхьыжьагъэр. Тызхилъэсагъэр — хыуай, нахьыпэрэм фэдэу. Тщымыщхэм тызэрашIошIрэр идгъэкъоу тэпсэу, гуныкъоу.
Ары шъхьае, синыбджэгъу, орырэ сэрырэ хышхор тазыфагуми тыгухэр къызэдытеох. Зы щэчалъ тызэрытыр. ТигумэкIхэм зы напэ яI, тигушIуагъохэри зы джэныкъо зэдыIусых. Еутых Аскэрырэ орырэ афэдэу «тигупшысэхэр зэхэлъэу зэдэпсэух».
Уиусэхэр Iэзэгъух. Угу ипыткIуафэхэм къагъэущыни къэхъущт. КъэкIощт лIэужхэм тащыгъэгугъ. ТегъэлъэIу ти Тхьэшхо о уихъохъукIэ:
Титхьэу Тхьэшхо, КъэгъэшIыгъэу щыIэр зэкIэ КъэзгъэшIыгъэу щызыгъаIэу, ЩыIэр зэкIэ зэлъэIоу, Зыми емылъэIужь! Тыбзэ гъэпсалъи, Тыпсэ гъэбагъо, ТицIыф унагъоу, Унагъор хьаблэу, Хьаблэхэр чылэу, Лъэпкъыр зы хэкоу, Хэкур Iодышъэу, Дышъэр тихъоеу, Хъохъур тикIасэу, КIасэр тигъусэу, Гъусэр тигуапэу, Гуапэр тынапэу, Напэр тилъапIэу, ЛъапIэр тилъэпкъэу, Тилъэпкъ адыгэу, Гъэ минкIэ тыгъэпсэу! Типсауи типсэхыгъи О гукIэгъу къафэшI, Тыпщэгугъы, тыкъэухъум, Хъохъур уикIасэшъ, Тихъохъу къыддэгъэхъу!
Лъытэныгъэшхо къыпфэзышIэу Унэрэкъо Рай.
Еутых Турхьан
Адыгабзэ ШъукъэдаIох ныуи, ныси, КъэсIощтэп гущыIэ дыси, Шъуисабыйхэр шъумгъэмысэу ЯжъугъашI ахэм Адыгабзэ.
Бзэ пIумылъэу лъэпкъ ухъуна? Ныдэлъфыбзэр бгъэкIоды хъуна? А кIалэхэр сыдэу хъунха? ЯжъугъашI ахэм Адыгабзэ.
ИIэн фай тыбзэ тетыгъо, Къэсыгъэба хьауми игъо, МэкIодыжы Адыгэ мыгъор, ЯжъугъашI кIалэмэ Адыгабзэ. 12.06.1998
Еутых Аскэр итхылъитIу афэсэтхы
«ТищыIакI» Зы илъэс иIэу Сыкъызыхъущтым Ыгуи хэмылъэу Сыкъызфэхъущтым, Ори умышIэу Илъэс минитIум ЗыщыбгъашIэрэ ГъашIэм щыхъущтыр, Тхылъ цIыкIоу птхыгъэм ФэпшIыгъ цIэ: «ТищыIакI». А тхылъыр, мары, Джы сигужъуакI… ЩыIэкIэжъэу щымыIэжьым КъакIэныгъэу къэоIуатэ Къоджэ лIыжъитIу ящыIакIэ СищыкIагъэу зы щыIакIэ, ХапIэ сфашIыгъэу ХамэчI Лабэ Iушъо сигукъэкIэу, Синылъфыбзэ сыгу имыкIэу, «Хэхэс» аIомэ сыпсэ IукIэу, Сигухэлъхэр сфэмыукIочIэу, Стхыгъэ сэри усэ, кIэкIэу. ЩыIэкIэжъэу щымыIэжьым КъакIэныгъэу къэсэIуатэ Къоджэ лIыжъитIу ящыIакIэ.
Сшынахьыжъ ГъэшIэгъонэу гъэшIэгъуай, ГъэшIэ тхыдэ къэшIэгъуай, Тыхьатыкъуай, Къэбэртай, Тыабадзэ тыабдзах, Зытыугощызэ тэбзэх — Джары Адыгэм ищыIакIэ. УмышIэрэ пшынахьыкIэ Хамэ чIылъэ щэусэ, ИмыIахэу зы гъусэ Хэхэсышъ агъэмысэ, Илэгъумэ загъэгусэ, АIумылъэу ныдэлъфыбзэ, Ахэмылъыжьэу хабзэ, Ори ащ фэдэкъабзэ КъыуашIагъэу, Сшынахьыжъ, Къетхы Мыхьамэт Къуныжъ. ТитIуи ты Еутых, Ох, ох, ох, Тигупшысэхэр зэхэлъэу зэдэпсэух, О упсэхыгъ, уигуи псэфыгъ, Сэри сыпсау, ау Сыпсэурэп. Сигъэгупсэфырэп тищыIакIэ, СШЫНАХЬЫЖЪ.