Адыгэ «Фиксикхэм» яплъыгъэх
КIэлэцIыкIухэм якъэухъумэн и Дунэе мафэ ехъулIэу «Фиксики» зыфиIорэ мультфильмэу адыгабзэкIэ къыдагъэкIыгъэм иапэрэ пычыгъуитф еплъыгъэх.Мыщ фэдэ шIухьафтын сабыйхэм къафагъэхьазырыгъ. «Зеркало» / «Гъундж», «Детектор лжи» / «ПцIыгъэунэф», «Команда» / «ДжэгокIо куп», «Пятно» / «Бжьыгъэ», «Лом» /Къуталъ зыфиIохэрэр ныдэлъфыбзэмкIэ зэдзэкIыгъэхэу кIэлэцIыкIухэм апагъохыгъэх.
Мыекъопэ къэлэ зыгъэпсэфыпIэ паркым шIоигъоныгъэ зиIэ пстэури къекIолIагъ. ПроекторышхомкIэ мультфильмыр къагъэлъэгъуагъ.
Пычыгъо 52-рэ пстэумкIи мультфильмыр мэхъу. Ащ Iоф дашIэныр лъагъэкIуатэ. Гуманитар ушэтынхэмкIэ Адыгэ къэралыгъо институтым адыгабзэкIэ щызэрадзэкIыгъ, Лъэпкъ театрэм иартистхэм амакъэкIэ геройхэр къэгущыIэх. Адыгеим и Къэралыгъо филармоние мультфильмыр щытыратхэ.
Проектыр зыфэгъэхьыгъэр адыгабзэр нахь зэрагъэшIэнэу, IэкIыбым щыIэ тилъэпкъэгъухэм адытиIэ зэпхыныгъэр гъэпытэгъэныр ары.