Адыгэ тхакIоу, драматургэу Джагъупэ Джамбулэт Хьачымэ ыкъор къызыхъугъэр илъэси 110-рэ мэхъу
Лъэпкъ гупшысэр ыгъэбаигъ
Ышъхьэ закъо паеу щымытэу, ежь фэдэ цIыфыбэм, лъэпкъым апае шIур зылэжьэу, ар хьалэлэу зытIупщырэм, хэтми, лъэужышIу къызэригъанэрэр нафэ. Ахэм ащыщ Джагъупэ Джамбулэт.
Хэбзэ къулыкъушIэщтыгъ, ау гукIэ лъэшэу гупшысэн-тхэным — творчествэм фэщэ- гъагъ, Iофышхо ащкIэ гъэзагъэу ышIагъ ыкIи адыгэ тхыгъэ литературэм идрамэхэмкIэ, ирассказхэмкIэ, ироманэу «Хьалимэт ижъуагъу» зыфиIоу адыгабзэкIэ ыкIи «Звезда Галимет» ыIоу урысыбзэкIэ къыдэкIыгъэхэмкIэ чIыпIэ гъэнэфагъэ щызыубытыгъ.
Я XX-рэ лIэшIэгъум ия 50 — 60-рэ илъэсхэр ары итхэн мурад ыкIи ащкIэ иамал кIуачIэ анахь къызынэфагъэр. Непэ Джагъупэм ыцIэ зэрифэшъуашэу раIоу, итхыгъэхэм атефэрэ уасэр аратыгъэу ыкIи агъотыгъэу пфэIощтэп. Ауми, къэIо-гъэн фаер титхэкIо нахьыжъхэу КIэрэщэ Тембот, Кэстэнэ Дмитрий, Iэшъынэ Хьазрэт, нэмыкIхэм къащигъакIэ щымыIэу лъэпкъ гупшысэр зэригъэбаигъэр ары. Джагъупэм игупшысэ лъэуж урыплъэмэ, щэч зыхэмылъыр, икъэлэмыпэ тхыгъэ дэгъубэ — рассказхэр, романитIур, щыIэныгъэ кIочIэ ин зыхэлъ драматургическэ произведениехэр уапIэу, уалэжьэу къызэрэчIэкIыгъэр, гъашIэр нэм къыкIэзыгъэуцохэу, шъыпкъэр зыщыIорышIэхэу ыкIи образ лъэш ыкIи зэфэшъхьафхэр куоу къызыщыриIотыкIыгъэхэу ахэр зэрэщытхэр ары. Джагъупэр урысыбзэкIэ тхэщтыгъэми, лъэпкъ гупшысакIэр иIэрыфэгъоу, ытхырэм икуугъэ-лъэшыгъэ къыплъызгъэIэсыныр зыфэукIочIыщтыгъ. Тхэн амал дэгъу зэрэIэкIэлъыгъэм имызакъоу, илъэпкъкIэ зэрэпсэемыблэжьыгъэм ар ишыхьат. Джагъупэр щыIэныгъэр бгъу пстэумкIи куоу изышIыкIыгъэ тхакIоу, гъашIэ бгъэшIэныр зэрэмыпсынкIэр, ау зэрэгъэшIэгъоныр зэхэзышIагъэу, къин-лъэпэогъубэ зэпичымэ къызэринэкIызэ, цIыф лъэш зафэ пэпчъ игугъэ зэрэфакIорэр зыушэтыгъэ, итхылъхэм къаIуатэрэри щыIэныгъэр ары. Дунэешхом, гъашIэм нэ чанкIэ, нэ IушкIэ, гу пытэкIэ, псэ фабэкIэ ахэтыгъ тхакIор. Сыд фыртынэ хэфагъэми, сыд къин зэпичыгъэми, тхакIом игугъэ къабзэхэр улъыигъэхэп: лъэпкъ гупшысэр зэриухъумэщтым, ащ зэрэхигъэхъощтым, адыгэ гущыIэм ыкIи лъэпкъ гупшысэм ялъэшыгъэ зэхишIэу, гухахъо фэхъоу адыгэ литературэм щылэжьагъ, итхыгъэхэр бгъэм дэлъ шъэфмэ атешIыкIыгъэх.
Джагъупэ Джамбулэт 1909-рэ илъэсым Кощхьэблэ районым ит къуаджэу Еджэркъуае къыщыхъугъ. Шъыпкъэ, къуаджэм итарихъкIэ бэмышIэу Запсэкъо Кимэ къыдигъэкIыгъэ тхылъым тхакIом ыцIэ дэдгъотагъэп. Ащ емылъытыгъэу, тха- кIом игупшысэ зынэсыщтыгъэр, дунэелъэгъукIэ зафэ иIэу Iоф зэришIэщтыгъэр итхылъхэм къаушыхьаты.
Апшъэрэ юридическэ гъэсэныгъэ иIагъ. 1937-рэ илъэсым лажьи, хьакъи зимыIэу агъэпщынагъэхэм афэдэу хьапс ашIыгъэхэм ащыщыгъ. Илъэс 20-м лагерьхэм ащыIагъ, шъхьафит зэхъужьым, Адыгэ хэкум къыгъэзэжьыгъагъ. Ныбжьи щыIэныгъэм е цIыфхэм гумышIуныгъэ афыриIагъэп, еджэгъэ-гъэсагъэу, чыжьэу плъэщтыгъ. Литературэм, творчествэм зызафегъазэм, акъыл чъэпхъыгъэ куукIэ щыIэныгъэр ыгъэунэфыным фежьагъ, къыдэхъугъ игухэлъ. Адыгэ щыIакIэм, лъэпкъым игъэшIэ гъогу, ащ щыпэкIэкIыгъэ пстэур къиIотыкIыгъэныр, зэгурыIоныгъэр, зэфэгумэкIыжьныгъэр, зэрэлъытэныгъэр, ныбджэгъуныгъэр, къошныгъэр, шIулъэгъур кIигъэтхъыхэу тхэщтыгъэ. Ирассказхэу «Щыдыбжьым къыIукIыгъэ цIыфыр», «Неукротимый», «Хьамтыкъ» зыфиIохэрэр ыкIи мыхэм анэмыкIхэу адыгэ ыкIи урыс хэку гъэзетхэм къащыхиутыгъэхэм шIэныгъэ ыкIи пIуныгъэ мэхьанэ яIагъ.
Джагъупэм тхэнымкIэ къулайныгъэу, IэпэIэсагъэу IэкIэлъхэр къызыщынэфагъэхэр идрамэхэр арых. Творческэ мэшIочэ ин ахэлъэу тхыгъэх «Возмездие» (1958), «Сюзан» (1965) зыфиIохэрэр. Мыхэр Адыгэ къэралыгъо драмтеатрэм ыкIи Краснодар край театрэм ясценэхэм ащагъэуцугъэх. Ахэм яплъын амал зиIэгъэ нэбгырэ зырызхэу къэнагъэхэм Джагъупэм итхыгъэхэмкIэ спектаклэхэм ядэгъугъэ къаIотэжьы екъу. Ауми, тхакIом ыцIэ анахь зэрашIагъэр ироманэу «Звезда Галимет» зыфиIорэр ары. Ащ нэмыкIэу «Поединок на поляне» зыфиIорэ романэу Бзыикъо заом ехьылIагъэм итхын ыухыгъагъэми, къыдигъэкIынэу игъо имыфагъэу 1973-рэ илъэсым дунаим ехыжьыгъ. Ау Джагъупэм тхэнымкIэ амалышIухэр зэрэIэкIэлъыгъэхэр идрамэхэми, ирассказхэми, ироманэу «Хьалимэт ижъуагъу» зыфиIорэми къахэщыгъ. Мы зы романым нахь ымытхыгъэу щытыгъэми, ар произведение куу ыкIи лъэш, адыгэ лъэпкъым ышъхьэ къырыкIуагъэр, шIункIым къыхэкIи, нэфым къызэрэфэкIуагъэр къызыщыIотагъ. ГупшысэкIэ гъэшIэгъон, художественнэ псалъэм игъэпсын зэрэфэIэпэIэсагъэм образ зэфэшъхьафыбэу романым хэтхэр ящысэх. ЩыIэныгъэм шъобж инэу ыгу къытырищагъэр умышIэнэу, гуфэбагъэр, нэхъоир, гукIэгъур, шIулъэгъур, лъэпкъ шъхьэлъытэжьыр, лIыгъэр, цIыфыгъэр къыгъэгъунэу, кIигъэтхъэу, творческэ кIочIэ ин хэлъыгъ, щэч хэлъэп, Джагъупэ Джамбулэт лъэпкъ гупшысэр ыгъэпытагъ ыкIи ыгъэбаигъ. Джащ пае тэри нахьыбэрэ шIукIэ ыцIэ къетIон фае итхэкIо чIыпIэ гъэнэфагъэ едгъэгъотыжьэу.
Мамырыкъо Нуриет.