Сэшхор топым пэшIуекIо
Къэбэртэе-Бэлъкъар Лъэпкъ музеим ипащэу Накуэ Феликс гъэзетеджэхэм ябгъэшIэжьынэу щытэп. Зидиссертацие адыгэ Iашэм фэгъэхьыгъэ шIэныгъэлэжьым иинтервьюхэмрэ ыгъэхьазырыгъэхэ къэгъэлъэгъонхэмрэ цIыфхэр дэгъоу ащыгъуазэх. Ау, гъэшIэгъоныр, адыгэ Iашэм непэ икъу фэдизэу уасэ фэзышIышъухэрэр Кавказ заом игъом ащ иIэрфэгъугъэ зыгъэунэфыгъэ къэзэкъхэр ары. Александр Андреевым иIофшIагъэу адыгабзэм итлъхьажьыгъэ «Сэшхор топым пэшIуекIо» зыфиIорэр ащ изы щыс.
НэгъэупIэпIэгъум псэр хэзыхын зылъэкIыщтыгъэ мы Iашэр ыпэкIэ (сэ) къызэрыкIоу щытыгъ. Ащ къыхэкIэу мы Iашэм икъарыу зэ нэмыIэми зыгъэунэфыгъэ пстэуми, Псыжъ Iушъо Iусхэ къэзэкъхэм адэжь къыщегъэжьагъэу тырку осмэнхэм анэсыжьэу, зэкIэми ежь ялъэпкъ IашэкIэ алъытэ. 1881-рэ илъэсым пачъыхьэм адыгэ сэшхор урысыдзэм щагъэфедэн алъэкIынэу унашъо ыштэгъагъ. Тэ тилъэхъани ар урыс офицерхэр зэрагъэлъэпIэрэ саугъэтэу щыт. Урыс шыухэм сэшхор шIудэдэ зыкIалъэгъурэри, ныбджэгъу дэгъоу зыкIалъытэрэри джары къызхэкIыгъэр.
Адыгэ Iашэхэр зэгъэпэшыжьыгъэнхэмкIэ, зэгъэфэжьыгъэнхэмкIэ Iофышхо зышIэрэ БжьыхьэлIэкъо Мэдин икIыщ Краснодар пэмычыжьэу щыт. «Сэшхор машэм фэдэу чанэу, къамзыим фэдэу псынкIэу, чым фэдэу лантIэу щытын фае, — еIо Мэдин. — Ихьылъагъэ грамм 300 — 500-м шIокIы хъущтэп».
Я XX-рэ лIэшIэгъум Iэшэ чанхэр умыгъэфедэжьхэми хъущтыгъэ. Ау, уахътэм къызэригъэлъэгъуагъэмкIэ, зэокIэ амалыкIэу къэнэфагъэхэм нахь ахэзэгъэнэу щытыгъэр, къызэрэчIэкIыгъэмкIэ, кавказ сэшхор арыгъэ.
«Къамэмрэ сэшхомрэ ахэм аIэпкъ-лъэпкъ изы Iахь!» — аIощтыгъэ къушъхьэчIэсхэм апае Кавказ заом игъом. Сыда мы Iашэр ащ фэдизэу зыкIагъэлъапIэрэр ыкIи ащ фэдиз чIыналъэм щагъэфедэнэу къызыхэкIыгъэр? «Шашка» зиIокIэ адыгабзэкIэ «шъэжъые кIыхь» (сэшхо, сэ кIыхь) къекIы. Накуэ Феликс зэриIорэмкIэ, сэшхор къызтекIыгъэр пчъэхэм яшIын агъэфедэрэ чыхэр зэрэпаупкIырэ шъэжъые (сэ) къызэрыкIор ары. Ащ къыщегъэжьагъэу зэолIхэр рагъасэхэу сэшхор зэрагъэбзэрэ амал щыI «чы пыупкIыкIэ амал» раIоу.
Iэшэ чанхэр тIоу зэтефыгъэх: апэрэ купыр маисэм (острый меч) къытекIыгъ, ятIонэ- рэ купыр къызтекIыгъэр — шъэжъый. Зыбгъуцэ нахь зимыIэ маисэр — палаш, ар къэбгъэщмэ чатэ мэхъу. Шъэжъые къызэрыкIом сэшхор къытекIыгъ. «Сэшхом, чатэм елъытыгъэмэ, зы шIуагъэ пылъ, — еIо Накуэ Феликс. — Ар уон зыхъукIэ зэрэIэрыфэгъур, зэрэпсынкIэр ары. Чатэр сапIэм къеохы, ар огъэчэрэгъу, етIанэ оо къодые ныIэп. Сэшхор къыдэгъэзыегъахэу чэтапIэм илъышъ, бгъэчэрэгъужьын ищыкIагъэп. Ар зы. ЯтIонэрэмкIэ, чэтапIэм икъихыни, итегъэпсыхьани, иогъуи зы Iэбэгъу».
Шхончхэр къызежьэхэм, Iэшэ чанхэр лыехэ фэдэу хъугъагъэх. Чатэхэр хьылъагъэх, къызфэбгъэфедэнхэкIи IэшIэх дэдагъэхэп. Мы лъэхъаным адыгэ сэшхор зыгъэфедэхэрэм ялъэшыгъэ нэрылъэгъугъ: тхылъыпIэри, пыим ыIэпкъ-лъэпкъхэ- ри зэфэдэу нэгъэупIэпIэгъукIэ зэгуигъэзынхэ ылъэкIыщтыгъ.
«Мы урыс самурайхэм тябгъукIон тлъэкIырэп», — къетхыжьы 1904 — 1905-рэ илъэсхэм екIокIыгъэ заом хэтыгъэ япон дзэкIолIым. маисэр егъашIи анахь Iэшэ дэгъоу ыкIи нахь псынкIэу ары зэралъытэщтыгъэр. Ау, джы къызэрэчIэкIыгъэмкIэ, адыгэ сэшхор ащ нахьи нахь псынкIэжь.