Лэгъупышхор Мыекъуапэ къащэжьыгъ
1982-рэ илъэсым музеим иэкспедицие хэтхэм Улапэ къыщагъотыгъэгъэ лэгъупышхор джырэ нэс Москва щыIагъ. Адыгэ лъэпкъым итарихъ епхыгъэ хьалэмэтыр Мыекъуапэ къащэжьыгъ.
КъокIыпIэм щыпсэухэрэ лъэпкъхэм яискусствэкIэ Къэралыгъо музеим иэкспедицие 1982-рэ илъэсым лэгъуп зэфэшъхьафхэр Улапэ къыщигъотыгъэх.
— Нарт къэбархэм яхьылIагъэу ХьадэгъэлIэ Аскэр я 7-рэ томым къыщитхыгъ урым та-рихъ шIэныгъэлэжьэу Геродот изэфэхьысыжьхэр, — къытиIуагъ Адыгеим иархеолог цIэрыIоу Улапэ Iоф щызышIэгъэ экспедицием хэтыгъэ Тэу Аслъан. — Джэрз щэбзапэмэ ахэшIыкIыгъэ лэгъупышхор адыгэмэ ячIыгу къыщагъотыгъ, адыгэмэ яй.
Илъэс 2500-кIэ узэкIэIэбэжьмэ, лэгъупышхор тилъэпкъэгъухэм ашIыгъагъ. 1982-рэ илъэсым экспедицием пэщэныгъэ дызезыхьэгъэ Александр Лесковыр зэхэщэн Iофыгъохэм апылъыгъ. Лэгъупышхом фыкъуагъэ фэмыхъоу Москва нагъэсыным фэшI Тэу Аслъан къыIуагъэм дырагъашти, машинэ щэрэхъитIумэ лэгъупышхор атепхыхьагъэу Москва нагъэсыгъагъ.
КъокIыпIэм щыпсэухэрэ лъэпкъхэм яискусствэкIэ Къэралыгъо музееу Москва дэтым ипащэу Александр Седовым республикэ общественнэ движениеу «Адыгэ Хасэр» фэтхагъ. ЛъэIу тхылъым къыщиIощтыгъ лэгъупышхор итарихъ чIыгу ащэжьынышъ, музеим икъу- тамэ чIагъэуцо зэрашIоигъор.
Мыекъуапэ дэт музеим ипащэу Кушъу Нэфсэт, Адыгэ Хасэр, нэмыкIхэм зэхэщэн Iофыгъохэр агъэцэкIагъэх. Къэралыгъо телерадиокомпаниеу «Адыгеим» ижурналистхэм Тэу Замирэ япащэу «Нартхэм ялэгъуп хьалэмэт» зыфиIорэ фильмэр тырахыгъ, телевидениемкIэ къагъэлъэгъуагъ. Лэгъупышхом ехьылIэгъэ тхыгъэхэр гъэзетэу «Адыгэ макъэм» къыхиутыгъэх, къэбарым цIыфхэр щагъэгъозагъэх.
Илъэс 37-рэ тешIагъэу лэгъупышхом итарихъ чIыгу рагъэгъотыжьыгъ. Музеим тыгъуасэ зэIукIэу щыкIуагъэм Кушъу Нэфсэт, Тэу Аслъан къыщыгущыIа- гъэх. Адыгэхэм ятарихъ куоу хэхьэгъэ пкъыгъор лъэгъупхъэу музеим чIэтыщт. СурэтышI модельер цIэрыIоу СтIашъу Юрэ къызэрэтиIуагъэу, лэгъупышхом музеим икъэгъэлъэгъонхэр къыгъэбаищтых.
Джэрз лэгъупышхор джэрзым зэрэхашIыкIыгъэр дахэу къэлъагъо. КъокIыпIэм щыпсэухэрэ лъэпкъхэм яискусствэкIэ Къэралыгъо музееу Мыекъуапэ дэтым непэ сыхьатыр 3-м зэIукIэу щыкIощтым лэгъупышхом ехьылIэгъэ шIэжь къэбархэр къыщаIотэщтых, тарихъыр зышIогъэшIэгъонхэр зэхэщакIохэм музеим рагъэблагъэх.
ЕмтIылъ Нурбый.
Сурэтым итхэр: лэгъупышхор музеим къызащэжьым апэу еплъыгъэхэм ащыщхэр.