Адыгэ Республикэм и Къэралыгъо филармоние пчыхьэзэхахьэу щыкIуагъэм классикэм хэхьэгъэ произведениехэр, республикэм икомпозиторхэм аусыгъэхэр щыIугъэх.

Филармонием и Къэралыгъо симфоническэ оркестрэ идириже­рэу СтIашъу Къэплъан япащэу артистхэм къырагъэIогъэ произве­дениехэм къахэтэгъэщы Адыгэ Республикэм иапэрэ профессиональнэ композиторэу Нэхэе Аслъан иоперэу «Бзыикъо заом» щыщ едзыгъохэр. ОрэдыIохэу Тыгъужъ Асыетрэ Дзыбэ Руслъан­рэ оперэм къыхэхыгъэ пычыгъо­хэр агъэжъынчыгъэх.

Оркестрэм хэтэу СтIашъу Мэдинэ кларнетымкIэ къыригъэIогъэ произведениер классикэм хэ­хьагъ. Кармен ехьылIэгъэ мэкъамэхэм уагъэгушIо.

Оркестрэу «Русская удалым» Анастасия Истамуловам лъэпкъ орэдхэр къыщиIуагъэх, художественнэ пащэр Андрей Ефименко.

Эстрадэ купэу «Ошъутенэм», художественнэ пащэр ХьакIэко Алый, адыгабзэкIи, урысыбзэкIи орэдыбэ къыIуагъ. Даутэ Сусанэ, ПIатIыкIо Маринэ, Мамхыгъэ Маринэ, Жарэкъо Руслъан, Юрий Конжиным, Хьазэщыкъо Мосэ орэд пэпчъ купкIэу хэлъыр къытлъагъэIэсыгъ, артистхэм янэшанэхэр дэгъоу агъэфедагъэх.

Филармонием иорэдыIохэу Баджэ Дзэхъан, Нэгъой Маринэ, Сергей Трудневым, Хъут Рустам, нэмыкIхэм ярепертуар гъэшIэгъо­нэу гъэпсыгъагъэ. Тхьабысым Умарэ, Сэмэгу Гощнагъо, фэшъхьафхэм яорэдхэм къэIокIэ хэхыгъэхэр къафагъотыгъэх.

Адыгеим имузыкальнэ искусствэ хэхъоныгъэхэр зэришIыхэрэр пчыхьэзэхахьэм къыщылъэгъуагъ.