ШIушIэ концертым шъукъеблагъ
Мэкъуогъум и 6-м дунаим щыцIэрыIо ансамблэу «Налмэсым» и Унэ шIушIэ концерт щыкIощт.
Адыгэ Республикэм и Къэралыгъо академическэ къэшъокIо лъэпкъ ансамблэу «Налмэсыр» кIэлэцIыкIу къэшъокIо купэу «Мыекъуапэ инэфылъэхэр», зэлъашIэхэрэ орэдыIохэу Быщтэкъо Азэмат, Дзыбэ Мыхьамэт, Лъэчэ Альберт шIушIэ пчыхьэзэхахьэм хэлэжьэщтых.
— Тигуапэу концертым тыщыуджыщт, тикъашъохэмкIэ цIыфхэр дгъэгушIохэ тшIоигъу, — къытиIуагъ «Налмэсым» ихудожественнэ пащэу, Пшызэ изаслуженнэ артистэу, Адыгеим, Абхъазым янароднэ артистэу Хъоджэе Аслъан.
Пчыхьэзэхахьэм къыхахыщт ахъщэр альманахэу «Дунаим иобразхэр» зыфиIоу адыгэхэм афэгъэхьыгъэу Къырым икъалэу Симферополь къыщыдагъэкIырэм пэIуагъэхьащт.
Апэрэ едзыгъор шъо зэфэшъхьафхэмкIэ гъэкIэрэкIагъэу къыхаутыгъ, тучанхэм ачIэлъ. Концертым рычIэхьанэу сомэ 2000-кIэ билетитIу зыщэфыхэрэм апэрэ едзыгъор къаратыщт.
Альманахым икъыдэгъэкIын Iоф дэзышIэу, тхакIоу, шIушIэ концертым изэхэщэкIо куп хэтэу Андрей Осташко тыщигъэгъозагъ альманахым иятIонэрэ едзыгъо игъэхьазырын зэрэпылъхэр. Адыгэхэу дунаим тетхэм ятарихъ, якультурэ, яшэн-хабзэхэм, шIэныгъэмрэ гъэсэныгъэмрэ, спортым, нэмыкIхэм яхьылIагъэу едзыгъуи 7 къыдагъэкIынэу мурад яI.
— Ныдэлъфыбзэм, лъэпкъым итарихъ язэгъэшIэн мэхьанэу яттырэр къэIэтыжьыгъэныр типшъэрылъ шъхьаIэхэм ахэтэлъытэх, — зэдэгущыIэгъур лъегъэкIуатэ республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзан.
— Андрей Осташко, ащ иIофшIэгъухэр тиныбджэгъушIух. Едгъэжьэгъэ Iофыр тызэгъусэу лъыдгъэкIотэщт.
Адыгеимрэ Къырымрэ язэфыщытыкIэхэр гъэпытэгъэнхэм, мамыр псэукIэр нахьышIу шIыгъэным, шъолъырхэр зэрэзэлъыкIохэрэм хэхъоныгъэхэр фэшIыгъэнхэм, нэмыкIхэм яхьылIэгъэхэ тхыгъэхэр альманахым къыщыхаутынхэу агъэхьазырых.
Концертым изэхэщакIохэм лъэпкъ Iофхэм агъэгумэкIыхэрэр, искусствэр зышIогъэшIэгъонхэр зэхахьэм рагъэблагъэх.
Сурэтым итхэр: «Налмэсыр» мэуджы.