IэнатIэм лъыбанэрэр къэошIэжьы
ТхакIоу, драматургэу, артистэу Мурэтэ Чэпай ипьесэу «IэнатIэм игъэрхэм» атехыгъэу «ощхым ор еукъэбзыжьы» зыфиIорэ спектаклэр республикэм и Лъэпкъ театрэу Цэим ыцIэ зыхьырэм къыщагъэлъэгъуагъ.
Режиссерэу Нэгъой Инвер спектаклэр икIэрыкIэу ыгъэуцужьыгъ. ЩыгъынхэмкIэ сурэтышIыр Даур Людмил, сурэтышIыр Сихъу Рэмэзан.
IофшIэнэу яIэр дэгъоу амыгъэцакIэрэми, IэнэтIэ иным кIэхъопсых. Районым къикIыжьынхэшъ, Мыекъуапэ щыпсэунхэу фаех. КъэшIыныр комедиеу щытми, пьесэр щыIэныгъэм къыхэхыгъэу гъэпсыгъэшъ, псынкIэу узыIэпещэ.
Роль шъхьаIэр Ахьмэт Артур къешIы — ар IэнэтIэшхом Iут. Бысымхэм ярольхэм афэгъэзагъэх КIэмэщ Разыетрэ Къэбэхьэ Анзоррэ. Артистхэм хъугъэ-шIагъэхэр IупкIэу къаIуатэх. Республикэм иминистрэхэр, Iэшъхьэтетхэм ащыщхэр нэгум къыкIагъэуцох. Артистхэм шIукIэ афэтлъэгъурэр пащэхэм ацIэхэр къырамыIохэми, якъэбархэмкIэ цIыф хэхыгъэхэр къытагъэшIэн зэралъэкIырэр ары.
Мурэтэ Рустем, Хьакъуй Андзаур, Бэгъушъэ Анзор, Болэкъо Адамэ ярольхэм куоу ахэхьанхэмкIэ макIэп къадэхъугъэр. Театрэм иIофшIэн нахь зыхэгъуазэхэкIэ комедиер щыIэныгъэм къыхэхыгъэу зэрэгъэпсыгъэр нахьышIоу нэгум къыкIэуцощт. Пащэм зэрэщытхъугъэхэм, ахъщэ къуалъхьэ зэрэратыгъэм рыкIэгъожьынхэу чIыпIэ зэриуцуагъэхэм, зыфэулэугъэхэ пащэм нахь IэнэтIэ ин къызыратым, аIуагъэмрэ ашIагъэмрэ режиссерым гъэшIэгъонэу зэригъэфагъэх, едзыгъохэр щхэных нахь мышIэми, щыIэныгъэм уфагъасэ.
Мурэтэ Чэпай ыгу къытеоу къытхэтыгъэмэ, ыныбжь мэкъуогъум и 12-м илъэс 80 хъущтыгъэ. Артист цIэрыIоу зэрэщытыгъэм дакIоу, театрэм фэгъэхьыгъэу ытхыгъэхэмкIэ IофшIэгъэшхо иIэу тэлъытэ. 2019-рэ илъэсыр театрэм и Илъэс. Драматургым
итхыгъэхэм атехыгъэ къэгъэлъэгъонхэр Адыгеим икъалэхэм, районхэм ащыкIощтых.
Сурэтыр къэгъэлъэгъоным къыщытетхыгъ.