АцIэхэр къыраIуагъэх

Республикэ общественнэ движениеу «Адыгэ Хасэм» и Хэсашъхьэ изэIукIэ Адыгэ Республикэм и Къэралыгъо премие къафагъэшъошэнымкIэ Уджыхъу Марыетрэ Хьакъунэ-Хъуажъ Заремэрэ къыщагъэлъэгъуагъэх.

Уджыхъу Марыет Урысыем изаслуженнэ, Адыгэ Республикэм инароднэ артистк, кIэлэцIыкIу зыгъэсапIэу «Щыгъыжъыем» ихудожественнэ пащ. Культурэм ылъэныкъокIэ Адыгэ Республикэм и Къэралыгъо премие къыфагъэшъошэнэу къагъэлъэгъуагъ.

Хьакъунэ-Хъуажъ Заремэ кIэлэцIыкIухэм, кIэлэегъаджэхэм апае «Ныбджэгъу къысфэхъу» зыфиIорэ тхылъэу къы­дигъэкIыгъэм пае Адыгэ Республикэм и Къэралыгъо премие литературэм ылъэныкъокIэ къыфагъэшъошэнэу къагъэлъэгъуагъ.

Хьакъунэ-Хъуажъ Заремэ ытхыгъэ усэхэм атехыгъэ орэдхэр композиторхэм аусыгъэх. Жанрэ зэфэшъхьафхэм арылъ тхыгъэхэр журналхэу «Зэкъошныгъэм», «Жъогъобыным», гъэзетэу «Адыгэ ма­къэм» къащыхаутыгъэх.

Уджыхъу Марыети, Хьакъунэ-Хъуажъ Зареми республикэм иобщественнэ щыIакIэ чанэу хэлажьэх, ныдэлъфыбзэр, лъэпкъ шэн-хабзэхэр кIэлэцIыкIу­хэм, ныбжьыкIэхэм зэрагъэшIэнхэмкIэ зэхэщэн Iофыгъохэр агъэцакIэх.

ЕмтIылъ Нурбый.