Урысыем и Къыблэ шъолъыр дзюдомкIэ изэнэкъокъу Адыгэ къэралыгъо университетым физкультурэмрэ дзюдомрэкIэ и Институт щыкIуагъ.

Краснодар краим, Ростов, Волгоград хэкухэм, Къалмыкъым, Къырым, Севастополь, Адыгэ Республикэм ябэнакIохэр алырэгъум щызэIукIагъэх.

Хъулъфыгъэхэм язэнэкъокъу Адыгеим ибэнакIохэм текIоны­гъитIу къыщыдахыгъ. Къуижъ Бислъан, кг 73-рэ, апэрэ чIыпIэм зэрэфэкIуагъэм къыхэдгъэщырэр бэнэгъу пэпчъ шIыкIэ дэгъухэр зэрэщигъэфедагъэхэр ары.

ШъэоцIыкIу Айдэмыр, кг 81-рэ, купэу зыхэтым бэнэкIо цIэрыIохэм яIэпэIэсэныгъэ къыщагъэлъэ­гъуагъ. Урысыем дышъэр къыщызыхьыгъэ ШъэоцIыкIу Рустам, Урысыем истудентхэм язэнэ­къокъу апэрэ чIыпIэр къыщыдэзыхыгъэ Тулпэрэ Айдэмыр, фэшъхьафхэри хагъэунэфыкIырэ чIыпIэхэм афэбэнагъэх. Джыра­къые нарт шъаом кIэух бэнэгъум икъулайныгъэ къыщигъэлъэгъуагъ, лъэшэу къемыхьылъэкIэу текIоныгъэр къыдихыгъ.

Ордэн Заур, кг 81-рэ, Хьакурынэ Хьазрэт, кг 100, джэрзхэр къахьыгъэх.

— СшынахьыкIэ сылъэплъэ, — къытиIуагъ Урысыем дзюдомкIэ ихэшыпыкIыгъэ командэ хэтэу Ордэн Андзаур. — Нэджыкъо Руслъан ары тиапэрэ тренерыр. Лъэшэу ащ тыфэраз. Спортым имызакъоу, ныбжьыкIэхэр щыIэныгъэм фегъасэх.

Адыгэ Республикэм изаслуженнэ тренерэу Беданыкъо Рэмэзан япащэу Къуижъ Бис­лъан, ШъэоцIыкIу Айдэмыр, Ордэн Заур, Хьакурынэ Хьазрэт дзюдом зыфагъасэ.

— Зэнэкъокъухэм тахэлэжьэнэу гъогу тытехьэ зыхъукIэ, адыгэ быракъыр сыдигъуи зыдэтэштэ, — къаIуатэ гущыIэр зэIэпахызэ ШъэоцIыкIу Айдэмыр, Къуижъ Бислъан, Хьакурынэ Хьазрэт. — Мыекъуапэ щыкIохэрэ зэIукIэгъухэм дзюдом, самбэм ащыцIэрыIохэр къарагъэблагъэх. Ащ мэхьанэ ин етэты. Спортым иветеранхэр къытэушъыих, тагъэ­гъуазэ, къэбар гъэшIэгъонхэр къытфаIуатэх.

Урысыем и Къэралыгъо Думэ идепутатэу, дунаим гъогогъу 11 дышъэр къыщыдэзыхыгъэ Хьасанэкъо Мурат, Олимпиадэ джэгунхэм джэрзыр дзюдомкIэ къащызыхьыгъэ Емыж Арамбый, КIуае Хьазрэт, Тулпэрэ Мыхьамэт, Джони Липаридзе, Хъот Юныс, Делэкъо Адам, фэшъхьафхэу гущыIэгъу тызыфэхъугъэхэм Ады­геим испорт псэуалъэхэр на­хьышIу зэрэхъухэрэр хагъэунэфыкIыгъ.

Анахь онтэгъухэм якуп Мэлыщэ Ахьмэд ящэнэрэ чIыпIэр къы­щихьыгъ. Тренерэу Ч. ХьэкIаком ар егъасэ.

Бзылъфыгъэхэм язэнэкъокъу Ульяна Ткаченкэм, кг 48-рэ, Къэлэбый Рузанэ, кг 52-рэ, апэрэ чIыпIэхэр къыщахьыгъэх. Тренерхэу Адзынэ Алыйрэ Беданыкъо Байзэтрэ дышъэр къэзыхьыгъэхэ пшъашъэхэр агъасэх.

Гъунэгъу Краснодар краим ибэнакIохэу Ацумыжъ зэшхэм медалитIу къыдахыгъ. Азэмат дышъэр фагъэшъошагъ, Казбек джэрзыр къыдихыгъ.

ХагъэунэфыкIырэ чIыпIэхэр къэзыхьыгъэхэм Адыгэ Респуб­ликэм физкультурэмрэ ыкIи спортымрэкIэ и Комитет итхьаматэу Дэгужъые Мурат, Къэралыгъо Думэм идепутатэу Хьасанэкъо Мурат, судьяхэм язэхэщэкIо куп хэтэу Къэбэртэе-Бэлъ­къарым къикIыгъэ Бэрэдж Светланэ афэгушIуагъэх, шIухьафтынхэр аратыжьыгъэх. Урысыем икIэух зэнэкъокъоу Iоныгъо мазэм къалэу Назрань щыкIощтым хагъэунэфыкIырэ чIыпIэхэр къыдэзыхыгъэхэр хэлэжьэщтых.

Сурэтхэр зэнэкъокъум къыщытетхыгъэх.