«Урыгушхонэу, узыкIырыплъынэу щыт»
МэщбэшIэ Исхьакъ ытхыхэрэм яджэх, адыгэхэм ацIэ зэриIэтыгъэу, дунаим лъэпкъыр зэрэщаригъэшIагъэмкIэ жъи кIи лъэшэу къыфэраз, лъытэныгъэ-гъэшIоныгъэ фыряI ыкIи къэралыгъо тын лъапIэу «Урысыем IофшIэнымкIэ и ЛIыхъужъ» зыфиIорэмкIэ къыфэгушIохэзэ, хэти ыгу къикIырэ гущыIэр пегъохы.
Къош республикэхэу Къэрэщэе-Щэрджэсым, Къэбэртэе- Бэлъкъарым, Дагъыстан Республикэм илIыкIоу Краснодар краим щыIэм, Абхъазым итхакIохэм яассоциацие итхьаматэу, Абхъазым илъэпкъ усакIоу, АНА-м иакадемикэу М. Ласуриа, УФ-м и Общественнэ палатэ и Комиссие итхьаматэу, Заполярьем ыкIи Темыр Чыжьэм якъалэхэм я Союз и Президентэу И. Шпектор ямэфэкI тхылъхэм гуфэбагъэр, шъэбагъэр, шъыпкъагъэр къахэщэу, щытхъу иныр зылэжьыгъэм къэралыгъо шIухьафтыныр къызэрэфагъэшъошагъэр лъэшэу гуапэ зэращыхъугъэр къыщаIуагъ, агу къикIэу МэщбэшIэ Исхьакъ къыфэгушIох.
Зэшъхьэгъусэхэ тхылъ къыдэгъэкIакIохэу Марие ыкIи Виктор Котляровхэм (Налщык) ягущыIэ фабэхэр зэрыт тхьапэр Исхьакъ къыIукIагъ.
Ингуш Республикэм ианахь лъэпкъ гъэзетыжъэу «Сердало» («Свет») иредактор шъхьаIэу, тхакIохэм ыкIи журналистхэм я Союз хэтэу, тхылъ 30 фэдиз къыдэзгъэкIыгъэу Патиев Якъуб СултIан ыкъор къэралыгъо наградэмкIэ титхэкIо цIэрыIоу МэщбэшIэ Исхьакъ къыфэгушIуагъ. Итарихъ романхэу «Жернова», «Из тьмы веков» зыфиIохэрэм зэряджагъэр, ыгу зэрэрихьыгъэхэр кIигъэтхъызэ, МэщбашIэр анахь тарихъ романист инэу Темыр КавказымкIэ зэралъытэрэр, ежь ышъхьэкIи зэрэдыригъаштэрэр къыщиIуагъ.
Урысые Федерацием и Къэралыгъо Думэ идепутатэу В. М. Резник имэфэкI телеграммэ къыщеIо илъэсыбэ творческэ IофшIэгъэшхо куум ащ фэдэ уасэр зэрепэсыгъэр, МэщбашIэм ипроизведениехэр акъыл-IэшIэгъэшхо тхыпхъэхэу зэрилъытэрэр, цIыфым ыкIи лъэужыкIэхэм пIуныгъэ-гъэсэныгъэ дэгъу агъотынымкIэ ахэр зэрэIэубытыпIэхэр.
«МэщбэшIэ Исхьакъ фэдэу тиIэр зы: зэбгъэпшэни зыфэбгъэдэни щыIэп. Итхылъхэр сикIасэх, иусэхэр лъэшых, ипрозэшъ, гъэшIэгъон закI. Тырыгушхон ыкIи дгъэлъэпIэн фае пстэуми ащ фэдэ цIыфышIур». (Т.Н.)
«Лъэпкъым къыхэкIыгъэ тхэкIо инэу МэщбэшIэ Исхьакъ ипроизведениехэр (усэхэр, поэмэхэр, прозэм щыщ пычыгъохэр) зэрэрагъэджэрэ тхылъхэу а I – III-рэ классхэм ыкIи я 4 – 5-рэ классхэм адыгабзэр ыкIи адыгэ литературэр зэращебгъэшIэщт программэм хэтых, ежь тхылъхэми ахэр ащыгъэфедагъэх. ТхакIом ыбзэ идэхагъэ, игупшысэ зынэсырэр кIэлэеджакIохэм агурыдгъаIозэ, лъэпкъ пIуныгъэ-гъэсэным, анахьэу ныдэлъфыбзэм ыкIи адыгэ литературэм акIуачIэ зынэсырэр ятэгъашIэ, ежьхэри адыгэ гущыIэм, ащ кIоцIылъым фэтэщэх».
Апыщ Ф., педагогическэ шIэныгъэхэмкIэ кандидат, Адыгэ къэралыгъо университетым икIэлэегъадж.
Адыгеим иапшъэрэ еджэпIэшхохэу Адыгэ къэралыгъо университетым ыкIи Мыекъопэ къэралыгъо технологическэ университетым я Научнэ тхылъеджапIэхэм тхакIоу МэщбэшIэ Исхьакъ итворчествэ янэплъэгъу зэритыр кIагъэтхъэу итхылъхэмкIэ лъэтегъэуцохэр, зэIукIэгъухэр, литературнэ зэнэкъокъухэр зэхащэх. Ахэм яшIуагъэкIэ студентхэр зэлъашIэрэ тхакIоу, «Урысыем IофшIэнымкIэ и ЛIыхъужъ» щытхъуцIэ лъагэр бэмышIэу къызыфагъэшъошагъэр нахь апэблагъэ мэхъу, ягуапэу иусэхэр езбырэу зэрагъашIэх.
Адыгеим ианахь еджэпIэжъэу Адыгэ кIэлэегъэджэ колледжэу Хъ. Андырхъуаем ыцIэ зыхьырэм икIэлэегъаджэу, филологие шIэныгъэхэмкIэ кандидатэу Ламыкъо Бэлэ лъэпкъ тхэкIошхоу МэщбэшIэ Исхьакъ итворчествэ пIуныгъэ-гъэсэныгъэ мэхьанэ зэриIэр къыIуагъ, егъэджэн программэм хэтэу адыгэбзэ ыкIи литературэ урокхэм зэрэщакIурэм гъэсэпэтхыдэ ухэтми ахэпхэу ылъытагъ.
МэщбэшIэ Исхьакъ ышъхьэ къырыкIуагъэр, творчествэм зэрэфэкIуагъэр къызыщиIотэгъэ тхылъхэу иIэхэм ашIогъэшIэгъонэу зэряджэхэрэр тхылъеджэхэм ащыщхэм кIагъэтхъыгъ.
НыбжьыкIэхэм тарихъ романхэр нахь зышIогъэшIэгъонэу зыIуагъэхэр ахэтых.
Щэч зыхэмылъыр, тхакIоу МэщбэшIэ Исхьакъ игупшысэ лэжьыгъэ адыгэ лъэпкъым къызэрэфэфедэщтыр, адыгабзэр зэриухъумэрэр, лъэпкъ акъылым хахъо зэрэфишIырэр, ини цIыкIуи зыкъагъотын амал зэраритырэр ары.
Мамырыкъо Нуриет.