Къалмыкъым изаслуженнэ артистэу, Адыгэ Республикэм искусствэхэмкIэ изаслуженнэ IофышIэшхоу, Лъэпкъ театрэу Цэй Ибрахьимэ ыцIэ зыхьырэм ирежиссерэу Хьакъуй Аслъан АР-м и Лъэпкъ тхылъеджапIэ рагъэблагъи, мастер-классэу «Театр+книга» зыфиIорэр ныбжьыкIэхэм афызэхащагъ.

Лъэпкъ тхылъеджапIэм иIофышIэу Кучмэз Аминэт Iоф­тхьабзэм кIэщакIо фэхъугъ ыкIи зэрищагъ. Ащ къызэрэтфиIотагъэмкIэ, Лъэпкъ тхылъеджапIэмрэ Лъэпкъ театрэмрэ зэпхыныгъэ азыфагу илъэу Iоф зэдашIэ. Мыщ щызэхащэхэрэ Iофтхьабзэхэм театрэм иIофы­шIэхэр чанэу ахэлажьэх.

— Театрэм спектаклэу щагъэуцухэрэм IэубытыпIэу афэ­хъурэр тхылъыр ары. Ар зычIэ­лъыр тхылъеджапIэр ары. Мы зэпхыныгъэр ныбжьыкIэхэм агурыдгъэIон, тхылъымрэ театрэмрэ зы лъагъо тетхэу Iоф зэрашIэрэр алъыдгъэIэсэныр пшъэрылъ шъхьаIэу Iофтхьабзэм иIэмэ ащыщ, — къыIуагъ Кучмэз Аминэт.

Тхылъым дэт произведением театрэм «псэ» къыпигъэкIэн елъэкIы. Узэджагъэр нэрылъэгъоу плъэгъун, ар нахь куоу зэхэпшIэн амал театрэм уегъэ­гъоты. ЛъэныкъуитIур зэгъусэ зыхъукIэ, Iофэу агъэцакIэрэр нахь бай, цIыфымкIэ гурыIо­гъошIу мэхъу.

— КъыткIэхъухьэхэрэ ныбжьыкIэхэр театрэм фэтщэнхэм мыщ фэдэ Iофтхьабзэхэр фэIорышIэх, — къытфеIуатэ Хьа­къуй Аслъан. — Непэрэ мафэм социальнэ хъытыур тищыIэныгъэ пытэу къыхэуцуагъ. Ащ кIэлэцIыкIухэм дэгъоу щалъэгъурэм фэдиз дэеуи ралъагъо. ЯзэхашIэ нахьышIум ылъэныкъокIэ зигъэ­зэным пае мыщ фэдэ зэIукIэгъухэр тищыкIагъэх.

Адыгэ республикэ ыкIи я 5-рэ гимназиехэм якIэлэеджакIохэр зэхахьэм рагъэблэгъагъэх. Урыс театрэм иактерхэм Хэгъэгу зэ­ошхом фэгъэхьыгъэ пычыгъо кIэлэеджакIохэм къафагъэлъэгъуагъ. Нэужым ныбжьыкIэхэм викторинэ афызэхащагъ. Театрэм фэгъэхьыгъэ шIэныгъэу аIэкIэлъыр ащ щаушэтын алъэ­кIыгъ. ТапэкIэ тхылъымрэ театрэмрэ нахь ашIогъэшIэгъон хъуным, шIэныгъэу аIэкIэлъым хагъэхъоным Iофтхьабзэм изэ­хэщакIохэр пылъыгъэх.

ЗэIукIэгъур гъэшIэгъонэу, ныб­жьыкIэгумэ анэсэу рекIо­кIыгъ. Режиссер цIэрыIом гущы­Iэгъу зыфэхъухэ нэужым уп­чIэхэр ратыгъэх, ахэм Хьакъуй Аслъан игуапэу джэуапхэр къариты­жьыгъэх.

Гъонэжьыкъо Сэтэнай.