Орэдышъор агъэжъынчы
Адыгэ Республикэм и Къэралыгъо филармоние и Къэралыгъо симфоническэ оркестрэ ия 26-рэ илъэс IофшIэгъур бэрэскэшхом зэфашIыжьыгъ.
Дунаим щыцIэрыIо композиторэу Л. Бетховен ия 4-рэ симфоние оркестрэм къыригъэIуагъ. К. Дженкинс ыусыгъэу «УIэшыгъэ цIыф» зыфиIорэр пчыхьэзэхахьэм щыIугъ.
Адыгеим икомпозиторэу Тхьабысымэ Умарэ спектаклэу «Лэукъаным» фэгъэхьыгъэу ыусыгъэр оркестрэм ыгъэжъынчыгъ. Пчыхьэзэхахьэр зезыщэгъэ лектор-музыковедэу Хьакъуй Заремэ къызэрэхигъэщыгъэу, У. Тхьабысымэр иорэдхэмкIэ искусствэм щызэлъашIэ. Ар къызыхъугъэр илъэси 100 мыгъэ хъущт. Композиторым иIофшIагъэ тэгъэлъапIэ, концертхэр тапэкIи фызэхащэщтых.
Республикэм искусствэхэмкIэ иколледжэу У. Тхьабысымэм ыцIэ зыхьырэм истудентхэм яхор классикэм хэхьэгъэ произведениер къыIуагъ. Адыгэ Республикэм культурэмкIэ изаслуженнэ IофышIэу Анна Гребень хорым ипащ. Концертым еплъыгъэхэр студентхэм, А. Гребень бэрэ Iэгу афытеуагъэх, къэгъагъэхэр аратыгъэх. Студентхэр дахэу, зэкIужьэу зэрэфэпагъэхэм дакIоу, искусствэм ясэнаущыгъэ къыщызэIуахынымкIэ шIыкIэшIухэр къагъэлъэгъуагъэх. Анахьэу тынаIэ зытетыдзагъэр макъэр Iэтыгъэу зэрагъэIорышIэрэр, зэдырагъэштэн зэралъэкIырэр ары.
Симфоническэ оркестрэм идирижер шъхьаIэу, Адыгэ Республикэм изаслуженнэ артистэу Аркадий Хуснияровым тызэрэщигъэгъозагъэу, илъэс IофшIэгъур оркестрэм дэгъоу рихыгъ. Композитор зэфэшъхьафхэм аусыгъэхэр репертуарым хэтых. Артистхэм яIэпэIэсэныгъэ хагъахъо, искусствэр зышIогъэшIэгъонхэр нахьыбэрэ агъэгушIонхэ ямурад.
Сурэтхэм арытхэр: оркестрэр, хорыр пчыхьэзэхахьэм хэлажьэх.
ЕМТIЫЛЪ Нурбый.