Музыкальнэ Iэмэ-псымэхэр афащэфых
Адыгэ Республикэм искусствэхэмкIэ икIэлэцIыкIу еджэпIэ 19-мэ пианинэхэр афащэфыгъэх.
«Тулэ ипщын» зыфиIорэ фабрикэм музыкальнэ Iэмэ-псымэр къыщашIы. Урысыем имызакъоу, къалэу Тулэ иIэпэIасэхэр Европэм щыцIэрыIох. Классикэм хэхьагъэхэ произведениехэр, тикомпозиторхэм аусыхэрэр еджакIохэм агъэжъынчынхэмкIэ яамалхэм хэхъоныгъэхэр афэхъугъэх.
Iофыгъор щыIэныгъэм щыпхырыщыгъэным фэшI Урысыем промышленностымкIэ и Министерствэрэ Адыгэ Республикэм иминистрэхэм я Кабинетрэ къэралыгъо шапхъэхэм адиштэу зэзэгъыныгъэ зэдашIыгъ. Сомэ миллиони 7-м къехъу пианинэхэм апэIуагъэхьагъ.
— ЕджапIэхэм ямузыкальнэ Iэмэ-псымэхэр жъы хъугъэх, гъэкIэжьыгъэнхэ фае, — къытиIуагъ Адыгэ Республикэм культурэмкIэ и Министерствэ иотдел ипащэу, Адыгеим культурэмкIэ изаслуженнэ IофышIэу Шэуджэн Бэлэ. – Музыкальнэ Iэмэ-псымэхэм япроцент 44-м нахьыбэ жъы зэрэхъугъэхэм къыхэкIэу зэблэхъугъэнхэм афэгъэхьыгъэ Iофыгъохэр зетэхьэх.
Фортепианэхэр, пщынэхэр, скрипкэхэр, гитарэхэр, нэмыкI лъэпкъ музыкальнэ Iэмэ-псымэхэр япчъагъэкIэ 400-м къыщымыкIэхэу искусствэхэмкIэ еджапIэхэм ящыкIагъэх.
Шэуджэн Бэлэ изэфэхьысыжьхэм къащыхигъэщыгъ федеральнэ Iофтхьабзэу «Культурнэ средам» хэхьэрэ лъэпкъ проектэу «Культурэм» игъэцэкIэн зэрэпылъхэр. Сэнаущыгъэ зыхэлъ кIэлэцIыкIухэр къыхагъэщыщтых, музыкальнэ искусствэм пыщагъэхэм япчъагъэ хагъэхъощт. Музыкэм пIуныгъэ мэхьанэу иIэм зыкъырагъэIэтынымкIэ еджапIэхэм яамалхэр нахьыбэ хъущтых.
Адыгеим икуп цIэрыIохэу «Ислъамыер», «Налмэсыр», «Русская удалыр», Симфоническэ оркестрэр, Камернэ музыкальнэ театрэр IэкIыб къэралыгъохэм ащашIэх. «Ошъутеным», «Ошъадэм», кIэлэцIыкIу ансамблэхэу «Мыекъуапэ инэфылъэхэм» «Майкопчанкэм», «Казачатэм», «Зэрдахэм», «Сюрпризым», «Абрекхэм», фэшъхьафхэм искусствэм нахь зыкъыщызэIуахынымкIэ непэ хабзэр IэпыIэгъу зэрафэхъурэм зыкъигъэшъыпкъэжьыщт.