Искусствэм ыбзэкIэ зэдэгущыIэх
Кавказ заоу я XIX-рэ лIэшIэгъум титарихъ чIыгу щыкIуагъэм фэгъэхьыгъэ къэгъэлъэгъоныр Мыекъуапэ къыщызэIуахыгъ.
Адыгэ Республикэм культурэмкIэ и Министерствэрэ республикэм исурэт къэгъэлъэгъуапIэрэ зэхащэгъэ Iофтхьабзэм кIэлэеджакIохэр, ныбжьыкIэхэр къырагъэблэгъагъэх. Сурэт къэгъэлъэгъуапIэм ипащэу, зэлъашIэрэ сурэтышIэу, архитекторэу Бырсыр Абдулахь ипэублэ гущыIэ къыщыхигъэщыгъ Шъыгъо-ШIэжь Мафэм зыфагъэхьазырызэ, фондым къыхахыгъэ сурэт 60 къызэрагъэлъагъорэр. Къэбэртэе-Бэлъкъарым, Ставрополь краим, Адыгеим ясурэтышI 28-мэ яIофшIагъэхэр гъэпсыкIэу яIэхэмкIэ зэфэшъхьафых. Арэу щытми, ахэр искусствэм ыбзэкIэ зэдэгущыIэх, зэгурэIох. ЗэкIэми къыхагъэщырэр мамыр псэукIэм игъэдэхэн зэрэпылъхэр, тарихъым инэкIубгъохэр цIыфхэм нахьышIоу ашIэн зэрэфаер ары. Адыгэ Республикэм культурэмкIэ и Министерствэ иотдел ипащэу Шэуджэн Бэлэ сурэтышIхэм яIэпэIэсэныгъэ осэ ин фишIыгъ. Лъэпкъым икультурэ къаухъумэзэ, щыIэныгъэм щылъагъэкIуатэ.
Бырсыр Абдулахь исурэтэу къашъоу «Ислъамыем» фэгъэхьыгъэр гум «къегущыIыкIы». Республикэм иартист цIэрыIохэу Алыбэрд Адамрэ НэмытIэкъо Римэрэ «Ислъамыер» къызэдашIы. ШIулъэгъу къабзэм къыпкъырыкIыхэзэ, щыIэныгъэм идэхагъэ къыраIотыкIы.
Кавказ заом лIыхъужъныгъэ щызезыхьагъэхэ тилъэпкъэгъухэм афаусыгъэ гъыбзэ орэдхэр тарихъым зэрэхэмыкIокIэщтхэм Б. Шэуджэныр, А. Бырсырыр къытегущыIагъэх.
Республикэм иобщественнэ движениеу «Адыгэ Хасэм» игъэцэкIэкIо комитет хэтэу Хъот Юныс лъэпкъ шIэжьым зыкъегъэIэтыгъэным, тарихъыр ныбжьыкIэхэм нахьышIоу ягъэшIэгъэным мэхьэнэ ин зэриIэм иеплъыкIэхэр къыриIолIагъэх.
СурэтышIхэу А. Къуанэм, З. ГъукIэм, А. Бырсырым, Ю. Кириченкэм, Къат Теуцожь, ПэтIыуащэ Феликс, А. Манакьян, нэмыкIхэм яIофшIагъэхэр непэрэ щыIакIэм зэрэдиштэхэ- рэм еджакIохэм анаIэ тырадзагъ.
Сурэтым итхэр: Бырсыр Абдулахь, Шэуджэн Бэлэ, Хъот Юныс къэгъэлъэгъоным икъызэIухын фэгъэхьыгъэ зэхахьэм хэлажьэх.