Тарихъ куум иухъумакIох
Уилъэпкъ ышъхьэ епхыгъэр зэкIэ – ичIыопс зыфэди, итарихъ чыжьи, благъи, инепэрэ мафэхэри зэхэугуфыкIыгъэу пшIэнхэмкIэ музейхэр IэпыIэгъушIух.
Адыгэ хэку музеир 1925-рэ илъэсым зэхащэгъагъ. Ау ащ ыпаIокIэ, 1908-рэ илъэсым, къытэшIэкIыгъэ дунаим лъыплъэнхэр, ащ ишъэфхэр зэгъэшIэгъэнхэр зикIасэхэм «Общество любителей природы» зыфиIорэр зэхащэгъагъ. Игъорыгъоу, нэмыкI гухэлъ гъэнэфагъэхэри къэуцугъэх, ахэм къапкъырыкIыгъ лъэпкъым музей иIэ зэрэхъугъэри. Музей Iофыгъо иныр зыпшъэ ифагъэхэр тарихълэжьэу, этнографэу, Адыгэ хэку музеим изэхэщакIоу Наурзэ Ибрахьимэрэ мы упчIэмкIэ ащ упчIэжьэгъу фэхъугъэ БрантI Зэчэрые-хьаджэмрэ. УиIэм уфэсакъэу кIэуухъумэн зэрэфаер мы нэбгыритIуми дэгъоу къагурыIощтыгъ; акъыл- къулайкIэ, зэупчIыжь-зэдэIужьрэ хэлъэу музей зэхэщэным фежьагъэх ыкIи апэрэ адыгэ музеир агъэпсыгъ. Лъэпкъ IэшIагъэхэр, лъэпкъ шэн-хабзэхэр, зекIокIэ-зэхэтыкIэхэр къыриIотыкIхэу ар зэрашIыщтым лъэшэу дэулэугъэх. Ежь БрантI Зэчэрые- хьаджэм ыIэшъхьитIукIэ ышIыгъэ унэгъо хъызмэт фэIо-фашIэхэмкIэ пкъыгъохэри, нэмыкI IэрышI пкъыгъохэу лъэпкъым ищыIакIэ епхыгъэхэри етIупщыгъэу зэрагъэгъотхэмэ зэIуагъакIэхэу фежьагъ. Апэу аIэ къырагъэхьагъэмэ ащыщыгъэх: адыгэ Iэнэ лъэкъуищыр, лъэхъучыр, онджэкъ машIор, хьакъу- шыкъухэу пэсэрэ адыгэхэм агъэфедэщтыгъэхэр, пхъэм хэшIыкIыгъэхэ лэгъэ куухэу апсхэр, пхъэ къашыкъ зэфэшъхьафхэр, тхъууалъэр, мыжъо ыкIи пхъэшъхьал зэтетхэу зэрыхьаджэщтыгъэхэр.
ЧIыгулэжь-былымахъоу игъашIэм къырыкIорэ адыгэ лъэпкъым пхъэр къышIыщтыми, псыр къыхьыщтыми бэ пкъыгъоу ыгъэфедэщтыгъэхэр – ощы, обзэгъу, уатэ, шъэжъый, шIуанэ, къазгъыр, пхъэIаш зыфэпIощтхэр.
Шым адыгэмкIэ мэхьанэшхо иIагъ: адыгэлIым шы дэгъу иIэн фэягъэ ыкIи ащ ифэныкъуагъэр зэкIэ — уанэри, нахътэри, шылъэрыгъхэри гъэдэхэгъэ-гъэкIэрэкIагъэу щытынхэ фэягъэх. Ащ фэшъхьафэу унэгъо IофшIэныбэ шыку зэкIэтымкIэ зэшIуахыщтыгъэ.
Ежь адыгэ хъулъфыгъэми игъэпсыкIэ-шIыкIи, ишъуаши мэхьанэ яIагъ: лIы фэдэм адыгэ шъуашэр – цыер, адыгэ паIор, тыжьын бгырыпх дэгъур, шъо щырыкъу лъэшъхьэ кIыхьэхэр апэрагъэх. БзылъфыгъэхэмкIи адыгэ шъошэ-теплъэм сыдигъуи уасэ фашIыщтыгъ: Iэ нэсыгъэр умышIэнэу, шэкI лъапIэм – дэнэ Iужъум, къэтэбэ куплъым, чэрэзышъо чIапцIэм, уцышъом ахэшIыкIыгъэ саеу тыжьын бгъэгупэ кIыIум къыгъэкIэракIэу, зиIашъхьэ бэлагъэхэр, зылъапэ ыкIи зыIупэхэр дышъэидэкIэ зэлъыпкIэгъагъэр зыщыгъ пшъашъэр е бзылъфыгъэр лъэшэу бжьышIо-шIыкIашIоу къэлъагъощтыгъ. Аузэ ежь адыгэхэм илъэс минхэм зэIуагъэкIэгъэ нахьышIур зэкIэ аугъоижьымэ зэрагъэзафэзэ, апэрэ музеир зэтырагъэуцогъагъ. ЕтIанэ нэмыкIхэри мы ехьыжьэгъэ Iофым къыхахьэхэ хъугъэх; Адыгэ хэку музеим зэо ужым изэтегъэуцожьын-зэтегъэпсыхьажынкIэ Iофышхо зышIагъэу, гупшысэшхо зылэжьыгъэу, лъэпкъым итарихъ культурэ кIэзыугъоягъэр Азэмэтэ Мин-Къутас, етIанэ ащ пыдзагъэу, 1964 – 1984-рэ илъэсхэм Адыгэ хэку музеим пэщэныгъэ дызезыхьагъэу, Адыгеим музейхэр щыгъэпсыгъэнхэмкIэ Iофышхо зылэжьыгъэр Iэшъхьэмэфэ Люб, я 90-рэ илъэсхэм музеим идиректорыгъэу, тарихъ ыкIи бзэ шIэныгъэлэжьэу Абрэдж Альмир адыгэ лъэпкъ лъапсэр, тарихъыр ухъумэгъэнымкIэ шIоу ашIагъэр тщыгъупшэ хъущтэп.
Анахьэу музейхэр бэу щыIэ зыхъугъэр икIыгъэ я XX-рэ лIэшIэгъум ыкIэм адэжь: ахэр зэфэдэкIэ къалэу Мыекъуапэ, псэолъэшI фирмэу «Зэкъошныгъэм» культурэмкIэ и Унэ, профтехучилищэу А. К. ТхьакIущынэр зидиректорыгъэм, станицэу Дондуковскэм культурэм и Унэу дэтым, къуаджэу Джамбэчые дэт еджапIэм (кIэлэегъэджагъэу, Бахъукъо Ерэджыбэ этнографическэ музееу щигъэпсыгъэр) ачIэлъхэ пкъыгъохэмкIэ, къаIуатэрэмкIэ, зэрэзэIухыгъэхэмкIэ уагъэгушхоу щытыгъэх, непи ахэр зэIухыгъэх, шъыпкъэ а цIыф Iуш патриотхэр щыIэжьхэп, ау лIэужхэм зэрафэлъэкIэу музей Iофыр лъагъэкIуатэ.
Общественнэ ыкIи «народнэ» цIэ иныр зиIэхэм анэмыкIэу, къэралыгъо музейхэри хэкум илъэс 40-кIэ узэкIэIэбэжьмэ къыщызэIуахыгъэх: 1980-рэ илъэсым адыгэ усэкIо цIэрыIоу Теуцожь Цыгъо илитературнэ комплекс — Унэ-музеир ыкIи усакIом исаугъэт Теуцожь Цыгъо къызыхъугъэр илъэси 125-рэ зэрэхъурэм ипэгъокIэу икъуаджэу Гъобэкъуае къыщызэIуахыгъагъ. Ащ ыуж къикIыгъ Советскэ Союзым и ЛIыхъужъэу, усакIоу, журналистэу Андырхъое Хъусен илитературнэ музей, ащ ыпашъхьэ ит саугъэтыр. Мыщ дэжьым къыхэзгъэщымэ сшIоигъу Теуцожь Цыгъо ыкIи Андырхъое Хъусен ялитературнэ музейхэм ягъэпсын-гъэхьазырын къызэIухын, ахэмкIэ къэIотэн-текстхэм ятхын Адыгэ къэралыгъо кIэлэегъэджэ институтым филологиемкIэ иадыгэ отделение къэсыухыгъэ къодыеу, Адыгэ хэку музеим научнэ IофышIэу Iофыр щезгъэжьагъэу, яшIын-гъэпсын сызэрэхэлэжьагъэр. Андырхъуаем илитературнэ музей Адыгэ автоном хэкур загъэпсыгъэр илъэс 60 зэрэхъурэм ипэгъокIэу, 1982-рэ илъэсым, бэдзэогъум къызэIутхыгъагъ. Мы музейхэр лъэпкъ тарихъым ихъугъэ-шIэгъэ гушIуагъохэу хъугъэх, мэфэкI шIыкIэм тетэу къызэIуахыгъэх.
ЫужыIокIэ, 2002-рэ илъэсым, Адыгэ Республикэри щыIэ хъугъэу, АР-м и Лъэпкъ музей Абрэдж Альмир идиректорэу, адыгэ тхыгъэ литературэм илъэпсэгъэуцоу, тхэкIо цIэрыIоу КIэрэщэ Тембот къызыхъугъэр илъэси 100 зэрэхъурэм епэсыгъэу илитературнэ музей, ежь тхакIор зыщыпсэугъэ унэ шъыпкъэм къыщызэIуахыгъ. Мы литературнэ музеищми къэралыгъо статус яI, непэ къызнэсыгъэм зыцIэкIэ къызэIуахыгъэхэр цIыфхэм арагъашIэхэу, ныбжьыкIи, кIэлэцIыкIуи, хьакIи, нэмыкIи якIуапIэх. Лъэпкъым пае зышъхьамысыжьыгъэхэ тхакIохэм, усакIохэм, лIыхъужъхэм ащ фэдэ лъытэныгъэ-гъэшIоныгъэр ежь-ежьырэу къызыфалэжьыжьыгъэ шъыпкъэу щыт.
Непэ Адыгэ Республикэм и Лъэпкъ музей гупшысакIэхэм зэлъаIыгъэу, лъэпкъым игъогууанэ ыкIи инепэрэ щыIакIэ къигъэлъэгъукIыгъэным дахэу Iоф дешIэ. Музеим ипащэр тарихълэжь-археологэу Джыгунэ Фатим, ащ шIэныгъэ IофыгъохэмкIэ игуадзэр Шэуджэн Налмэс, коллектив зэтеуцуагъэм хэтхэм зэдырагъаштэу ямурад пхыращы.
Музейхэм я Дунэе мафэкIэ тафэгушIозэ, адыгэ лъэпкъыр псэ пытэу, лъэпытэу, ежь фэдэ цIыф лъэпкъхэм ямыхъуапсэу, сыдрэ лъэныкъокIи амали, акъыли хэлъэу щыIэнэу, музеим лъэбэкъушIухэр ышIынхэу фэтэIо. Мамырыкъо Нуриет.