Асыет Москва кIощт
«Адыгэ макъэм» къызэрэхиутыгъагъэу, «Пачъыхьэ гуащ» зыфиIорэ зэнэкъокъур джырэблагъэ Краснодар щыкIуагъ. Адыгеим, Абхъазым язаслуженнэ артисткэу Уайкъокъо Асыет шIухьафтын шъхьаIэр зэхэщакIохэм къыфагъэшъошагъ.
— Асыет, тигъэзетеджэхэм ацIэкIэ тыпфэгушIо.
— Тхьауегъэпсэу.
— Краснодар краим изэIухыгъэ зэнэкъокъу ухэлэжьэнэу зэрэхъугъэм тыщыгъэгъуазэба.
— Ащ шъэф хэлъэп. Къэбарыр зызэхэсэхым, сыкIэупчIагъ. ЗэхэщакIохэм къысфаIотагъэр сшIогъэшIэгъоныгъ.
— ШIухьафтын шъхьаIэр къыдэзыхы зышIоигъуагъэр макIэп. Хэта е сыда зэнэкъокъум уфэзыщагъэр?
— Бзылъфыгъэм щыIэныгъэм чIыпIэу щыриIэм, бзылъфыгъэмрэ унагъомрэ язэпхыныгъэхэм, нэмыкIхэм афэгъэхьыгъэу зэрэщытым сыдихьыхыгъ. (Асыет мэщхы, зэнэкъокъум зыфигъэхьазырыныр гукIэ къызэрэхихыгъэм рыкIэгъожьырэп. Е. Н.).
— ЗэхэщакIохэм ащыщ бзылъфыгъэм уигъэгушхуагъэу уиIофшIэгъухэм къысаIуагъ.
— ОшIэ-дэмышIэу ар къызэпыфагъ. Татьяна Нисковскаям кIэли 5 епIу. Ным иобраз тхакIохэм къыраIотыкIы, артистхэм спектаклэхэм къащагъэлъагъо зыхъукIэ зэгъэпшэнэу ашIырэр макIэп. Зэнэкъокъум ипроект ипащэу Татьяна Нисковскаям ащ фэдэ къэбархэу къытфиIотагъэхэм сэркIэ мэхьанэ яIагъ.
— Нэбгырэ 18 зэнэкъокъугъ. Апэрэ чIыпIэм узэрэфэкIогъэ шIыкIэм тытегъэгущыIэба.
— Ны дэгъум унагъом нэIуасэ зэрэфишIыхэрэмкIэ зэнэкъокъур тыублагъэ. ЯтIонэрэ едзыгъом бысымгуащэр пщэрыхьаным, Iанэр зэгъэфагъэу къызэIухыгъэным зэрафэгъэсагъэм фэгъэхьыгъагъ.
— Iэдэб пхэлъэу пщэрыхьапIэм узэрэщызекIорэм уиIофшIэгъухэр къытегущыIэхэу зэп зэрэзэхэсхыгъэр.
— ОсэшI купым хэтхэр тадэжь къакIохи, лылыбжьэр, щыпс-пIастэр зэрэзгъэхьазырыхэрэм къылъыплъагъэх. Адыгэ шхыныгъохэр хьакушъхьэм зэрэтетхэу гъэтхэ къэгъагъэм фэдэу мэ IэшIоу къапыкIырэр осэшIхэм агъэшIэгъуагъ, ежьхэми лъэпкъ шхыныгъохэр агъэхьазырхэ ашIоигъоу упчIэхэр къысатыгъэх.
— ЯтIонэрэ едзыгъом ыуж зэнэкъокъум текIоныгъэ къызэрэщыдэпхыщтыр нафэ хъугъагъэу осэшIхэм къаIуагъ.
— Зэфэхьысыжьхэр зашIыхэхэм, бэкIэ апэ сишъыгъэу зэнэкъокъум къыщылъэгъуагъ. Ащ пае къэсымыгъанэу ящэнэрэ едзыгъом, зэIукIэгъухэм сахэлэжьагъ.
— Футболым зыфэбгъазэмэ, командэр ары зыцIэ къыраIорэр. Уайкъокъо Асыет… КъызгурыIуагъ къапIомэ пшIоигъор. Адыгэ Республикэм, республикэм и Лъэпкъ театрэу Цэй Ибрахьимэ ыцIэ зыхьырэм ялIыкIоу сыщытыгъ. Адыгэ Республикэм и ЛIышъхьэу КъумпIыл Мурат, республикэм культурэмкIэ иминистрэу Аулъэ Юрэ, Лъэпкъ театрэу И. Цэим ыцIэ зыхьырэм ихудожественнэ пащэу ХьакIэгъогъу Къэсэй, нэмыкIхэу зэхэщэн IофыгъохэмкIэ къызгоуцуагъэхэм, гукIэ сыфэзыгъэчэфыгъэхэм гъэзетымкIэ «тхьашъуегъэпсэу» ясIожьы сшIоигъу.
Зэнэкъокъум гъусэ къыщыпфэхъурэм, уиIоф утезыгъэгушхорэм пэшIорыгъэшъэу уегъэрэхьаты, гумэкIыгъохэр щыбгъэзыенхэмкIэ амалхэр къэогъотых.
— Орэдхэр къэшъуIуагъэх, шъукъэшъуагъ, дахэу зышъуфапэзэ бзылъфыгъэм исэнаущыгъэ къыхэжъугъэщыгъ.
— Ящэнэрэ едзыгъор ары тызытегущыIэрэр. Адыгэ саер сщыгъэу пчэгум сыкъызехьэм, IэгутеошхокIэ къыспэгъокIыгъэх.
Уайкъокъо Асыет телефоныр къышти, Краснодар щыкIогъэ зэнэкъокъум къыщытыритхагъэм тыригъэплъыгъ. ЗэлъашIэрэ сурэтышI-модельерэу СтIашъу Юрэ «Адыгэ Республик» зыфиIоу ышIыгъэ адыгэ джанэр А. Уайкъокъом щыгъэу пчэгум къырыкIуагъ. Саер уцышъу, бзылъфыгъэм къешIэкIыгъ. Асыет ыIэхэр зызэкIещыхэм, адыгэ быракъым къыхэлыдыкIыхэрэ жъуагъохэр къэжъыугъэх, щэбзищыр, гущыIэхэу «Адыгэ Республик» зыфиIохэрэр къэшIэтыгъэх.
ОсэшIхэм язакъоп, Асыет къенэкъокъухэрэ бзылъфыгъэхэри мэгушIох, Iэгу къыфытеох. Адыгэ лъэпкъым итарихъ, шэн-хабзэхэр А. Уайкъокъом къыгъэлъэгъуагъэх, орэд къафиIуагъ.
Краснодар краим ишъолъырхэм къарыкIыгъэхэ бзылъфыгъэхэр 17 мэхъух. Ахэри дахэх, нэр пIэпахы. ЯгущыIакIи, якъэшъуакIи узыIэпещэ.
ЕплъыкIэхэр
Адыгэ шъуашэм, адыгэ быракъым ямэфэкIхэр республикэм зэрэщыкIохэрэм, дунаим щыцIэрыIо сурэтышI-модельерэу СтIашъу Юрэ, нэмыкIхэм сигуапэу сакъытегущыIагъ, — А. Уайкъокъом зэдэгущыIэгъур лъегъэкIуатэ. — ЦIыфхэм яеплъыкIэхэр сшIогъэшIэгъоныгъэх. Тиреспубликэ къызэрэщытхъугъэхэм сэри сигъэгушIуагъ.
— 2019-рэ илъэсыр театрэм и Илъэс. Уайкъокъо Асыет имурадхэм защыдгъэгъуазэ тшIоигъу.
— ХьакIэгъогъу Къэсэй сызыфигъазэхэрэ рольхэр къэсшIыщтых, спектаклэхэм сахэлэжьэщт.
— Фестивалэу «Пшызэ театральнэм» гъогогъуитIо, Дунэе фестивалэу «Кавказский меловой кругым» зэ бзылъфыгъэ роль шъхьаIэм икъэшIынкIэ апэрэ чIыпIэхэр къащыдэпхыгъэх.
— Ар сэ сизакъоу сигъэхъагъэу слъытэрэп. СиIофшIэгъухэм сафэраз. Театрэм пыщагъэхэу къытэплъыхэрэм хэушъхьафыкIыгъэу «тхьашъуегъэпсэу» ясэIожьы.
— Асыет, спектаклэхэу «Нысхъапэм», «КъокIасэм», «Шапсыгъэ пшъашъэм», «Мэдэям», «Кавказский меловой кругым» бзылъфыгъэ роль шъхьаIэхэр къащыошIых. Рольхэм гукIэ уахэхьаныр орыкIэ сыда?
— Ар сипшъэрылъ шъхьаIэу сэлъытэ. ЦIыфхэм театрэм ыбзэкIэ япIо пшIоигъор алъыбгъэIэсыныр зымыуасэ щыIэп. — Ролым укъыхэкIыжьыныр…
— Ари IэшIэхэп. «Нысхъапэм» Назикэ, «Кавказский меловой кругым» Асыет, «Шапсыгъэ пшъашъэм» Гулэз ярольхэр къащысшIыхэзэ щыIэныгъэр нахь куоу къызгурыIо хъугъэ.
— Пшъашъэу Гулэз зыцIэр бэп.
— Ар сэри сэгъэшIагъо.
— Спектаклэм еплъыгъэхэм ащыщхэм пшъашъэу къафэхъурэм Гулэз фаусыщтэу къаIоу сырихьылIагъ.
— КIэрэщэ Тембот адыгагъэм, адыгэ шъуашэм, фэшъхьафхэми афэгъэхьыгъэу ытхыгъэхэм уяджэзэ, упчIэу уиIагъэхэм яджэуапхэр къэогъотых.
Сыфай нахьыбэрэ ащ фэдэ къэгъэлъэгъонхэм сахэлэжьэнэу.
— Пшызэ и Сэтэнэе-Гуащэ узэрэхъугъэм тигъэгушIуагъ. Урысыем икIэух зэнэкъокъу сыдигъуа зыщыIэщтыр?
— Iоныгъо мазэм Москва сыкIощт. Адыгэ орэдхэри ащ къыщысIощтых, тиреспубликэ ыцIэ нахь лъагэу сIэты сшIоигъу.
— Уимурадхэр къыбдэхъунхэу пфэтэIо. — Тхьауегъэпсэу.
ЕмтIылъ Нурбый. Сурэтым итыр: Пшызэ и Сэтэнэе-Гуащэу Уайкъокъо Асыет.