«Зэкъошныгъ» Мыекъуапэ – «Спартак» Налщык – 0:2. ЖъоныгъуакIэм и 11-м Адыгэ республикэ стадионым щызэдешIагъэх. Зезыщагъэхэр: А. Чистяков – Азов, Д. Степанищев, Д. Мезенцев – тIури Воронеж. «Зэкъошныгъ»: Ковалев, Кирьян, Бровчук (Катаев, 46), Кадимов, Черов (Юрченко, 83), Къонэ (Шъхьэлахъо, 87), Ещенко, Ахмедханов, Хьагъур, Iащэ (Делэкъу, 46), Крылов (Мамонов, 70). Къэлапчъэм Iэгуаор дэзыдзагъэхэр: Мэщыкъу – 5 (пенальти), Хьачыр – 83.

Ощхыр къещхызэ зэIукIэгъур аублагъ. «Спартакыр» ыпэкIэ къызелъым, тиешIакIомэ ащыщ ошIэ-дэмышIэу Iэгуаор ыIэ те­фагъ. Судьям ыгъэунэфыгъ пенальтир. Мэщыкъо Ислъам къэлапчъэм Iэгуаор дидзагъ – 0:1. «Зэкъошныгъэр» пчъагъэм ымыгъэразэу бэрэ ыпэкIэ лъыкIуатэщтыгъ. Ризван Ахмедхановыр, Къонэ Амир, Iащэ Анзор, нэмыкI­хэм «Спартакым» иухъумакIохэр агъэгумэкIыщтыгъэх, ау хъагъэм Iэгуаор радзэн алъэкIыгъэп.

ЗэIукIэгъум иятIонэрэ едзыгъо «Зэкъошныгъэм» итренер шъхьа­Iэу Ешыгоо Сэфэрбый ешIэкIо заулэ зэблихъугъ, тикомандэ нахь шъуамбгъоу ешIэу ыублагъ. Де­лэкъо Аскэр гъогогъуитIо къэлап­чъэм шъхьэкIэ дэуагъ, ау цыхьэ­шIэ­­гъоу ешIэрэ къэлэпчъэIутэу Шэуджэн Борисэ шIокIын ылъэ­кIыгъэп.

Я 9-рэ такъикъым судьям ятIонэрэу тиешIакIоу Хьагъур Руслъан фигъэпыти, зэIукIапIэм ригъэкIыгъ. «Спартакым» хэтэу Мэщыкъо Ислъам шапхъэхэр зэриукъохэрэм къыхэкIэу судьям ыгъэпщынагъ, я 22-рэ такъикъым ешIапIэм ригъэкIыгъ.

Ахэр къыхэтэгъэщми, ешIа­кIохэр бэрэ дысэу зекIуагъэхэу тлъытэрэп. ЗэIукIэгъур кIэухым зыщыфэкIорэ уахътэм «Зэкъошныгъэм» иухъумакIохэри апэкIэ илъыщтыгъэх. ЕшIапIэм игупчэ изакъоу итыгъэ А. Хьачырым Iэгуаор къызыратым, тиухъума­кIохэр пэчыжьагъэх. Хьачырыр тикъэлэпчъэIутэу Р. Ковалевым благъэу къекIуи, хъагъэм Iэгуаор ридзагъ. «Зэкъошныгъэр» гуIэм хэтэу ыпэкIэ илъыщтыгъ, ау а мафэм дэгъоу ешIэгъэ Б. Шэуджэным тиешIакIохэр шIокIыгъэхэп.

Пресс-зэIукIэр

«Зэкъошныгъэм» итренер шъхьа­Iэу Ешыгоо Сэфэрбый къы­хигъэщыгъ ешIакIохэм пшъэры­лъэу афишIыгъэр икъоу зэрамыгъэцэкIагъэр.

«Спартакым» итренер шъхьаIэу Сергей Трубициным къыIуагъ илъэс 18 – 20 зыныбжь кIалэхэр командэм зэраштагъэхэр. Апэрэ купым хэхьанхэу загъэхьазырырэп, республикэм ифутбол зыкъе­гъэIэтыгъэным пылъых, ащкIэ пащэхэр IэпыIэгъу къафэхъух.

Я 27-рэ зэIукIэгъухэр

«Мэщыкъу» — «Урожай» — 1:2, «Спартак» Вл – «Краснодар-3» — 1:1, «Динамо» — «Волгарь» — 1:0. Тыгъуасэ «Чайкэр» «Черноморец» Новороссийск IукIагъ.

ЧIыпIэхэр

1. «Урожай» — 60 2. «Чайка» — 58 3. «Волгарь» — 52 4. «Черноморец» — 43 5. «Зэкъошныгъ» — 39 6. «Спартак» Нч – 36 7. «Легион» — 37 8. «Биолог» — 34 9. «Динамо» — 30 10. «Спартак» Вл – 30 11. «Мэщыкъу» — 28 12. «Краснодар-3» — 25 13. СКА – 21 14. «Ангушт» — 15 15. «Академия» — 9. Я 28-рэ ешIэгъухэр 18.05 «Ангушт» — «Чайка» «Биолог» — СКА «Волгарь» — «Мэщыкъу» «Краснодар-3» — «Легион» «Спартак» Нч – «Динамо» «Урожай» — «Спартак» Вл «Черноморец» — «Зэкъош­ныгъ».