Стамбул ирайонэу Бейликдюзю мэфэкI шIыкIэм тетэу мэлылъфэгъум и 27-м адыгэ культурэм и Унэ къыщызэ­Iуахыгъ. Мэхьанэшхо зиIэ мыщ фэ­дэ культурэ хъугъэ-шIагъэмкIэ Тыркуем щыпсэурэ адыгэхэм афэгушIонхэу къэкIогъагъэх Урысыем и Генеральнэ консулэу Стамбул щыIэ Андрей Подъелышевыр, Адыгеим и ЛIышъхьэу КъумпIыл Мурат, Адыгэ Республикэм илIыкIо купэу Тыркуем щыIэр.

Кавказ ассоциациехэм яфедерацие итхьаматэу Йылдыз Шекерджи, Бейликдюзю имэрэу Мехмет Мурат Челык, Стамбул и Адыгэ Хасэ хэтхэр мы Iоф­тхьабзэм хэлэжьагъэх.

Адыгеим и ЛIышъхьэ мы хъугъэ-шIэгъэшхомкIэ адыгэхэм афэгушIуагъ, проектым игъэцэкIэн зэкIэ хэлэжьагъэхэм «тхьашъуегъэпсэу» ари­Iуагъ. Къалэм щыпсэурэ адыгэ­хэм яобщественнэ организа­циехэр кIэщакIо зэ­рэфэхъугъэхэм тетэу адыгэ культурэм и Унэ агъэпсыгъ. Хэ­бзэ чIыпIэ къулы­къухэри ащкIэ Iэпы­Iэгъу къафэхъугъэх, ахэм мылъкурэ чIыгу Iахьрэ къафыхагъэкIыгъ.

«Адыгэ Респуб­ликэмрэ Тыркуемрэ бэшIагъэ культурэмкIэ ыкIи ис­кусствэмкIэ зэпхыныгъэ пытэ зызэ­дыряIэр. Тыркуем щы­псэурэ адыгэхэр нахь зэкъоуцон­хэмкIэ, адыгабзэм, тарихъым, лъэпкъ шэн-хабзэхэм язэ­гъэшIэн тегъэпсы­хьэгъэ общественнэ проектхэм язегъэ­ушъомбгъункIэ мы хъугъэ-шIагъэр мэхьанэшхо зиIэ лъэ­бэкъоу хъугъэ», — хигъэунэфыкIыгъ Адыгеим и ЛIышъхьэ.

Мы проектым адыгэ лъэп­къыр нахь зэрипхынэу, адыгэ хэхэсхэм тарихъ чIыгужъым зэпхыныгъэу къыдыряIэр нахь ыгъэпытэнэу, язэдэлэжьэныгъэ нахь зыригъэушъомбгъунэу зэрэщыгугъырэр КъумпIыл Мурат къыхигъэщыгъ.

«IэкIыб къэралыгъохэм ащыпсэурэ тилъэпкъэгъу пэпчъ адыгэ лъэпкъым зэрэщыщыр зэхишIэным, илъэпкъ­рэ тарихъ чIыгужъымрэ къа­рыкIощтым ыгъэгумэкIыным тэркIэ мэхьанэшхо иI», — ­къыIуагъ КъумпIыл Мурат.

Адыгэ культурэм и Унэ къы­зызэIуахы нэуж ащ идиректорэу Омар Чоток илъэсым къыкIоцI проектыр зэрагъэцэкIа­гъэм фэгъэхьыгъэу къафиIотагъ. Зы къатэу зэтет унэ агъэпсыгъ, адыгэхэм анэмыкIэу, лъэпкъым итарихърэ икультурэрэ нэIуасэ зафэзышIы зышIоигъохэми сыдигъуи ащ ипчъэхэр афызэIу­хыгъэщтых. Мыщ Iофтхьэбзэ зэфэшъхьафхэр, Адыгэ Хасэм изэхэсыгъохэр щызэхащэщтых, адыгабзэм изэгъэшIэнкIэ курс­хэм, кIэлэцIыкIухэм апае кружокхэм Iоф щашIэщт.

Урысыемрэ Тыркуемрэ 2019-рэ илъэсыр культурэмрэ туризмэмрэ я Илъэсэу зэрагъэ­нэфагъэм адыгэ культурэм и Унэ мыгъэ къызэрэзэIуахыгъэм мэхьанэшхо зэряIэр Адыгеим и ЛIышъхьэ хигъэунэфыкIыгъ. КъумпIыл Мурат зэрилъытэрэмкIэ, адыгэ культурэм и Унэ Стамбул щыпсэурэ адыгэхэм яобщественнэ проектхэмрэ культурэмкIэ, гъэсэныгъэмкIэ япроектхэмрэ щыпхыращыщтхэм имызакъоу, хэгъэгу зэфэшъхьафхэм ялIыкIохэми мыщ щызэIукIэнхэ алъэкIыщт.

МыщкIэ щысэшIоу къэбгъэ­лъэгъон плъэкIыщт Адыгеим лъэпкъ къашъомкIэ и Къэралыгъо академическэ ансамблэу «Налмэсымрэ» лъэпкъ орэдым­рэ къашъомрэкIэ и Къэралыгъо ансамблэу «Ислъамыем­рэ» концертышхо мыщ къызэрэщатыгъэр. АщкIэ Адыгеим илIыкIо куп зыхэлэжьэгъэ Iоф­­­тхьа­бзэхэр Тыркуем щаухыгъэх.

«Ащ фэдэ мэфэкIышхо къызэрэтфишIыгъэм, икультурэ бай нэIуасэ тызэрэфи­шIыгъэм апае Адыгеим лъэшэу тыфэраз. КультурэмкIэ ащ фэдэ Iофтхьабзэхэу мэхьанэшхо зиIэхэм адегъэштэгъэн ыкIи зягъэушъомбгъу­гъэн, ащ фэдэ концертхэр нахь чIыпIэ хэхыгъэхэм ащызэхэщэгъэн фае», — ариIуагъ Урысые Федерацием и Генеральнэ консулэу Стамбул щыIэм концертыр зэхэзыщагъэмрэ ащ хэлэжьагъэхэмрэ.

Адыгэ Республикэм и ЛIышъхьэ ипресс-къулыкъу