Адыгэ-абхъаз театрэхэм я Дунэе фестивалэу «Кавказский меловой круг» зыфиIорэр мэлылъфэгъум и 22 — 28-м Мыекъуапэ щыкIуагъ.

Хэгъэгуищ, республики 7 Дунэе зэIукIэгъум хэлэжьагъ. Адыгэ Республикэм культурэмкIэ иминистрэу Аулъэ Юрэ ти ЛIышъхьэу КъумпIыл Мурат ыцIэкIэ театрэхэм яIофышIэхэм закъыфигъази, лъэпкъхэр зэфэзыщэгъэ Дунэе фестивалым зызэриушъомбгъурэр хигъэунэфыкIыгъ. Искусствэм ыбзэкIэ Дунэе зэхахьэм щызэдэгущыIагъэхэм яIофшIагъэ осэ ин министрэм фишIыгъ.

Абхъаз къэралыгъо театрэу С. Чанбэ ыцIэ зыхьырэм ипэщэ шъхьаIэу Нодар Чанбэ, Адыгэ Республикэм и Лъэпкъ театрэу И. Цэим ыцIэ зыхьырэм ихудожественнэ пащэу ХьакIэгъогъу Къэсэй, нэмыкIхэм зэхахьэм къыщаIуагъ театрэхэм яартистхэм яIэпэIэсэныгъэ зыкъыра­гъэIэтынымкIэ, драматургием хэ­хъоныгъэ фашIынымкIэ ащ фэдэ фестивальхэр егъэджапIэ зэрафэхъухэрэр.

«Кавказский меловой круг» зыфиIорэ Дунэе фестивалым инэпэеплъ тамыгъэ уегъэгу­пшы­сэ. Щэрэхъыр зэпымыоу мэчэ­рэгъу, къекIокIы. Куцэм уеплъы­зэ, щыIэныгъэм изэхъокIыны­гъэхэр зэфахьысыжьых. Фестивалым итамыгъэ зытешIыхьэгъэ сыхьатхэр зэхахьэм хэлэжьагъэхэм шIухьафтын зэрафашIырэр Къ. ХьакIэгъогъум къыIуагъ.

Къыхагъэщыгъэхэр

Къыблэ Осетием и Къэра­лыгъо драматическэ театрэу

К. Хе­тагуровым ыцIэ зыхьырэм иактрисэу Зарина Бекоевам хэушъхьафыкIыгъэ шIухьафтын фагъэшъошагъ спектаклэу «Антигонэм» Антигонэ ироль къызэрэщишIыгъэм пае.

Авар музыкальнэ-драматическэ театрэу Г. Цадасэ ыцIэ зы­хьырэм иартистэу Ибрахьим Муртазалиевым шIухьафтын фашIыгъ. «Деляфруг ипсэлъы­хъуиплI» зыфиIорэ спектаклым Исмахьилэ ироль артистым къыщишIыгъ.

Лъэпкъ шэн-хабзэхэр, бзэр къызэриухъумэхэрэм фэшI Чэ­чэн къэралыгъо театрэм Щытхъу тхылъ фагъэшъошагъ.

Дунэе классикэмрэ лъэпкъ шэн-хабзэхэмрэ зэпхыныгъэ­хэмкIэ спектаклэу «Кавказский меловой круг» зыфиIорэр зыгъэ­уцугъэ Къ. ХьакIэгъогъур къы­хагъэщыгъ, Щытхъу тхылъ ратыжьыгъ.

«Актер ансамблэ анахь дэгъу» зыфиIорэр Къэбэртэе къэ­ралыгъо драматическэ театрэу А. ШэуджэнцIыкIум ыцIэ зыхьырэм фагъэшъошагъ. Спектаклэу «Таланты и поклонники» артистхэм къагъэлъэгъуагъ.

ЯтIонэрэ бзылъфыгъэ ролым икъэшIынкIэ Щытхъу тхы­лъыр республикэ Лъэпкъ теат­рэу И. Цэим ыцIэ зыхьырэм иартисткэу Шэрамыкъо Фатимэ фагъэ­шъошагъ.

Абхъаз къэралыгъо театрэм «Сценографие анахь дэгъу» зыфиIорэмкIэ Щытхъу тхылъыр фагъэшъошагъ. «Бернальд Альбэ иун» зыцIэ къэгъэлъэгъоным Виталий Кацбэ къыщы­хагъэщыгъ.

Бзылъфыгъэ ролыр анахь дэгъоу къэзышIыгъэу къыхахыгъэр Уайкъокъо Асыет. Респуб­ликэ Лъэпкъ театрэм ар ­иактрис.

Хъулъфыгъэ ролыр анахь дэгъоу къэзышIыгъэр Дамалоев Казбек, Щэрджэс театрэм иартист.

Режиссер Iофыгъохэр анахь дэгъоу зыгъэпсыгъэу алъыта-гъэр Тамерлан Дзутцов — Къы­блэ Осетием ирежиссер.

Фестивалым ипащэу Къуижъ Нэфсэт щытхъуцIэхэр къыдэзы­хыгъэхэм афэгушIуагъ, шIухьафтынхэр аритыжьыгъэх. Фестивалым икIэухым артистхэм концерт къатыгъ.

ЕмтIылъ Нурбый.

Сурэтым итхэр: Аулъэ Юр, Нодар Чанба, ХьакIэгъогъу Къэсэй.