Урысыем икIэлэеджакIохэм яя IX-рэ Спартакиадэ хэхьэрэ зэнэкъокъухэр Анапэ районым ипсэупIэу ШIуикъо щыкIуагъэх.

Къыблэ шъолъырым икIэлэеджакIохэм язэхахьэ Адыгэ Республикэм атлетикэ онтэгъумкIэ испорт еджапIэ зыщызыгъасэхэрэр хэлэжьагъэх, ха­гъэунэфыкIырэ чIыпIэхэр къыдахыгъэх.

Хьабый Хъусен, кг 81-рэ, дышъэр къыфагъэшъошагъ. Хьатыгъужъыкъое батырым апэрэ чIыпIэр къыдихыным фэшI икъулайныгъэ дэгъоу ыгъэфедагъ. Краснодар краим, Ростов хэкум, нэмыкIхэм къарыкIыгъэхэр пхъашэу къе­нэкъокъугъэх. Хъ. Хьабыим нахьыпэкIэ зэIукIэгъу инхэм медальхэр бэрэ къащимыхьыщтыгъэми, иIэпэIэсэныгъэкIэ къахэщыгъ. Нарт шъаом игуетыныгъэ тренер цIэрыIохэм агъэшIэгъуагъ.

Елизавета Толмачевам, кг 76-рэ, дышъэр къыхьыгъ. Артем Горловым, кг 73-рэ, тыжьыныр къызэрэдихыгъэм имызакъоу, Урысыем спортымкIэ имастер хъунымкIэ шапхъэхэр зэрэригъэ­къугъэхэм фэшI тигъэгушIуагъ. Батырыр ышнахьыжъэу Александр егъасэ.

ХьакIэмызэ Сыхьатбый, кг 49-рэ, Чэужъ Астемир, кг 67-рэ, Семен Егоровым, кг 89-рэ, ящэнэрэ чIыпIэхэр къахьыгъэх, джэрз медальхэр къафагъэшъошагъэх.

Тренерхэу Чэмбэхъу Анзор, Сихъу Аслъан, Александр Горловым, Владимир Драневым, Хьагъур Хьалимэ тиныбжьыкIэхэр агъасэх. Республикэм атлетикэ онтэгъумкIэ испорт еджапIэ ипащэу, спортымкIэ дунэе класс зиIэ мастерэу Сихъу Рэмэзан зэнэкъокъум исудьяу щытыгъ. Ащ къызэрэтиIуагъэу, 2002 — 2004-рэ илъэсхэм къэхъугъэ кIэлэеджакIохэр Анапэ районым щызэIукIагъэх. НыбжьыкIэхэм яIэпэIэсэныгъэ хагъэхъонымкIэ зэхэщакIохэм яIофыгъохэр дэгъоу агъэцэкIагъэх.

Краснодар краим ихэшыпыкIыгъэ командэ апэрэ чIыпIэр къыдихыгъ, Ростов хэкур ятIонэрэ хъугъэ. Адыгэ Республикэм ящэнэрэ чIыпIэр къы­фагъэшъошагъ. ЯIэпэIэсэныгъэкIэ къа­хэщыгъэ спортсменхэр Урысыем и Спартакиадэ икIэух зэнэкъокъу хэлэжьэщтых.