Адыгеим и ЛIышъхьэу КъумпIыл Мурат Урысыем и Генеральнэ консулэу Стамбул щыIэ Андрей Подъелышевым тыгъуасэ IукIагъ.

ЗэдэгущыIэгъухэм ахэлэжьагъэх Урысые Федерацием сатыумкIэ и ЛIыкIоу Тыркуем щыIэ Айдар Гашигуллиныр, Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэу ТхьакIущынэ Мурат, Адыгэ Республикэм ивице-премьерэу Сапый Вячеслав, Адыгэ Республикэм и ЛIышъхьэ инвестиционнэ политикэмкIэ иIэпыIэгъоу Петр Гарнага, Тыркуем кавказ обществэхэмкIэ ифедерациеу КАФФЕД-м ипащэхэр.

Урысыемрэ Тыркуемрэ язэфыщытыкIэхэр нахьышIу шIыгъэнхэм тегъэпсыхьэгъэ Iофыгъохэм атегущыIагъэх. Генераль­нэ консулым зэрэхигъэунэфыкIы­гъэмкIэ, бэшIагъэ къэралыгъуитIум дипломатическэ зэфыщытыкIэхэр зызэдыряIэхэр, Урысые Федерацием и Генеральнэ консульствэу Стамбул щыIэм илъэсыбэрэ Урысыем ипосольствэ чIэтыгъ. ЗэIукIэм хэлэжьагъэхэр Урысыем и ЛIыкIохэм ягалерееу Урысые Федерацием илIыкIоу Тыркуем щыIэгъэ Андрей Карловым имыжъобгъу зытетым рыкIуагъэх.

«Непэ Урысыемрэ Тыркуемрэ япащэхэм хэгъэгуитIум язэфыщытыкIэ нахьышIу шIыгъэным яшъыпкъэу акIуачIэ рахьылIэ. Мы аужырэ лъэхъаным Урысыем ишъолъыр зэфэшъхьафхэм, Тыркуем ябизнесменхэр зэлъыIэсынхэмкIэ нахь загъэчаны зэрэхъугъэр къэлъагъо. Зэпхыныгъэхэм язегъэушъомбгъун детэгъаштэ, зэдэгущыIэгъухэм тахэлэжьэнэу тыхьазыр. Мы лъэныкъомкIэ организациеу КАФФЕД-р Адыгеим IэпыIэгъушIу къыфэхъун ылъэкIыщт», — хигъэунэфыкIыгъ Генеральнэ консулым.

Республикэм ынаIэ къызэрэтыригъэты­рэм фэшI Генеральнэ консулым зэрэфэра­зэр Адыгеим и ЛIышъхьэ ри­Iуагъ, Тыр­куем щалъэгъугъэхэм, зэIукIэгъухэу адыряIагъэхэм афэгъэхьыгъэу къыфиIотагъ.

КъумпIыл Мурат зэрэхигъэунэфыкIыгъэмкIэ, хэгъэгуитIум язэдэлэжьэныгъэ нахь зырагъэушъомбгъу ашIоигъу, Адыгеими хэхъоныгъэ ышIынымкIэ джащыгъум амалыкIэхэр иIэщтых. ГущыIэм пае, Тыркуем ибизнесменхэм зэзэгъыныгъа­кIэхэр задишIхэкIэ, Адыгеим экспортымкIэ амалхэу иIэхэм заригъэушъомбгъун ылъэкIыщт. Лъэпкъ проектхэмрэ Урысыем и Президент ижъоныгъокIэ унашъорэ ягъэцэкIэнкIэ ар лъэбэкъушIу хъущтыгъэ.

«Лъэныкъо пстэумкIи тизэдэлэжьэныгъэ зедгъэушъомбгъунымкIэ непэ амалхэр тиIэх. Лъэпкъ зэгурыIоны­гъэм игъэпытэн тегъэпсыхьагъэхэ проектхэмкIэ, бизнесым ылъэныкъокIэ зэзэгъыныгъэхэр адэшIыгъэнхэмкIэ адыгэхэу мыщ щыпсэухэрэр IэпыIэгъушIу къытфэхъунхэ алъэкIыщт. Тарихъ чIыгужъым – Адыгеим ахэм зэдэлэжьэныгъэ къыдыряIэ, Урысыемрэ Тыркуемрэ язэпхыныгъэхэм зарагъэушъомбгъу ашIоигъу», — хигъэунэфыкIыгъ КъумпIыл Мурат.

2019-рэ илъэсыр культурэмрэ туриз­мэм­рэ я Илъэсэу Урысыемрэ Тыркуемрэ зэрэщагъэнэфагъэм елъытыгъэу культурэмрэ гъэсэныгъэмрэ япхыгъэхэ проектхэм, гуманитарнэ проектхэм япхырыщын мэхьанэшхо зэриIэр зэдэгущыIэгъухэм щахагъэунэфыкIыгъ.

Адыгэ Республикэм и ЛIышъхьэ ипресс-къулыкъу