Адыгеим илIыкIо куп мэлылъфэгъум и 25-м къалэу Дюздже нэсыгъ. Адыгеим ибыракъхэр зыщыгъэIэгъэ автомобильхэмкIэ къэлэ дэхьапIэм дэжь лIыкIо купым хэтхэм къащыпэгъокIхи, къэлэ пчэгум нэс къадэкIотагъэх.

Тыркуем щыпсэурэ адыгэхэм ащыщхэр республикэм и ЛIышъхьэу КъумпIыл Мурат пчэгум къыщыпэгъо­кIыгъэх. Адыгеим ибыракъэу дунаим тет адыгэхэм ялъэпкъ тамыгъэу щытыр ахэм аIыгъыгъ.

Адыгеим и ЛIышъхьэ мэфэкIымкIэ ахэм афэгушIуагъ, лъэп­къэу узыщыщыр умыгъэгъо­щэным мэхьанэшхо зэриIэр къыIуагъ.

«Нэгуихыгъэу шъу­къызэрэт­пэ­гъо­кIыгъэм фэшI тхьа­шъуегъэ­псэу. Ку­пышхо ты­хъоу шъуадэжь тыкъэкIуагъ, тыкъы­зышъу­хэхьагъэмрэ Адыгэ Республикэм и Къэралыгъо быракъ и Мафэрэ зэрэзэтефагъэм мэ­хьанэ гъэнэфагъэ иI. Къэралыгъо быра­къыр тилъэпкъ изыкIыныгъэ итамыгъэу щыт. Ныб­джэгъу лъа­­пIэхэр, мэфэ­кIымкIэ сы­шъу­фэ­гушIо», — джащ фэдэ гущы­IэхэмкIэ КъумпIыл Мурат къэзэрэугъоигъэхэм за­фигъэ­загъ.

ЗэIукIэр концертрэ адыгэ джэгурэ­кIэ аухыгъ.

Шъугу къэтэгъэкIыжьы Адыге­им ибыракъ Адыгэ Республикэм икъэралыгъо тамыгъэу зэрэщытыр. Адыгэ Республикэм и Законэу 1992-рэ илъэсым гъэтхапэм и 24-м аштагъэу N 2-р зытетэу «Адыгэ Республикэм и Къэралыгъо быракъ ехьылIагъ» зыфиIорэмкIэ ар аухэсыгъ. 2013-рэ илъэсым шышъхьэIум и 1-м республикэ законэу аштагъэм мэлылъфэгъум и 25-р Адыгэ Республикэм и Къэралыгъо быракъ и Мафэу щагъэ­нэфагъ.

Илъэс къэс мы мафэм Адыгеим, нэмыкI шъолъырхэм, адыгэхэр зыщыпсэурэ хэгъэгу­хэм ялъэпкъ общественнэ движениехэм Iофтхьэбзэ зэфэшъхьафхэр зэхащэх. Мыгъэ ащ фэгъэхьыгъэу проектэу «Хэгъэ­гуищ, чIынэлъищ — зы дунай» зыфиIорэр рагъэжьагъ. Респуб­ликэм и Адыгэ Хасэ илIыкIохэмрэ Адыгеим иальпинистхэмрэ мэлылъфэгъум и 5-м Адыгеим ибыракъ Мыекъуапэ, вулканхэу Килиманджаро, Орисаба ащагъэIагъэх. Проектым хэлажьэхэрэм ахэхъуагъ. Непэ адыгэхэм Адыгеим ибыракъ Урысыем ишъолъыр, дунаим ихэгъэгу заулэмэ, Тыркуери ахэм зэрахэтэу, ащагъэIагъ.

Адыгэ Республикэм и ЛIышъхьэ ипресс-къулыкъу