Тыркуем и Лъэпкъ ЗэIукIэшхо испикерэу Мустафа Шентоп Адыгеим и ЛIышъхьэрэ лIыкIо купым хэтхэмрэ япарламент ригъэблэгъагъэх.

Тыркуе парламентым ипащэ Тыркуем и Президентэу Реджеп Эрдоган ыцIэкIэ ахэм шIуфэс къарихыгъ.

Политикэ лъэпсэ пытэ зиIэ зэпхыныгъэхэм зягъэушъомбгъу­гъэным мэхьанэшхо зэриIэр Мустафа Шентоп къыхигъэщыгъ. Лъэпкъ ЗэIукIэшхом испикер зэрэхигъэунэфыкIыгъэмкIэ, хэ­гъэ­­гуитIуми яполитикэ зэфыщытыкIэхэм зыпкъ итэу зарагъэ­ушъомб­гъу. ХэгъэгуитIуми япащэхэу Владимир Путинымрэ Реджеп Эрдоганрэ мэлылъфэгъум и 8-м зэIукIэгъагъэх.

«МПС-м ия 140-рэ Ассамблей къыдыхэлъытагъэу Урысыем и Къэралыгъо Думэ и Тхьаматэу Вячеслав Володиным сыIукIэ­гъагъ. Урысые Федерацием ФедерациемкIэ и Совет и Тхьаматэу Валентина Матвиенкэм Тыркуем къэкIонэу зегъэхьазыры. Тэ тигуапэу ащ тыпэгъо­кIыщт, зэдэлэжьэныгъэ дытиIэным тыфэхьазыр. Урысыемрэ Тыркуемрэ язэфыщытыкIэхэм зягъэ­ушъомбгъугъэнымкIэ шъо­лъырхэм Iоф зэрэзэдашIэрэм мэхьанэшхо етэты. Кавказым щып­сэущтыгъэ лъэпкъхэм къатекIыжьыгъэ нэбгырабэ тихэ­гъэгу ис. Ахэм тихэгъэгу ищыIэныгъэ илъэныкъо пстэуми яIа­хьышIу хашIыхьэ. Шъо тадэжь шъукъызэрэкIуагъэм адыгэ хэ­хэс­хэм язэпхыныгъэхэм зызэра­рагъэушъомбгъущтым имыза­къоу, Урысыемрэ Тыркуемрэ язэпхыныгъэ гъэпытэгъэнми фэ­IорышIэщт», — къыIуагъ Тыр­куем и Лъэпкъ ЗэIукIэшхо испикер.

Джащ фэдэу Мустафа Шентоп сатыу-экономикэ зэфыщытыкIэхэм зягъэушъомбгъугъэным мэхьанэшхо зэриIэр хигъэунэфыкIыгъ, Адыгеим илIыкIо куп хэтхэм зэзэгъыныгъэ къадашIы зэрашIоигъор зэригуапэр къы­Iуагъ, Тыркуемрэ Адыгеимрэ якъалэхэм азыфагу зэкъош зэ­фы­щытыкIэ дэгъу илъэу ылъытагъ.

Адыгеим и ЛIышъхьэ дахэу парламентым къазэращыпэгъо­кIыгъэхэмкIэ зэрафэразэр, Лъэпкъ ЗэIукIэшхом идепутатхэм адыряIэгъэ зэIукIэгъум зэрэщызэгурыIуагъэхэр къыхигъэщыгъ. Джащ фэдэу Адыгеим и ЛIышъхьэ Тыркуем и Президент гущыIэ фабэхэр зэрэфиIуагъэм, бизнесымкIэ, гъэсэныгъэмкIэ, культурэмкIэ тилIыкIо куп гъэхъагъэ­хэр ышIынхэу къызэрэфэлъэ­Iуагъэм фэшI зэрэфэразэр къы­­­Iуагъ. КъумпIыл Мурат зэрилъы­тэрэмкIэ, хэгъэгухэм яполитикэ зэфыщытыкIэхэр лъэгэпIэшхом зэрэнэсыгъэхэм, лъэныкъуитIуми яфедэ зыхэлъыщт зэдэлэжьэныгъэ зэдыряIэ зэрашIоигъом гъэ­хъагъэхэм афаузэнкIыщтых.

«Парламентхэм алъэныкъо­кIи хэгъэгухэм зэпхыныгъэу зэдыряIэр нахь мэпытэ. Тихэ­гъэгу­хэм япащэхэми ащкIэ мэ­хьанэшхо яI. Лъэныкъо пстэумкIи тизэпхыныгъэхэм зядгъэу­шъомбгъунымкIэ тэ къытэлъы­ты­гъэр зэкIэ тшIэным тыфэхьазыр. Лъэпкъ ЗэIу­кIэшхом испикерэу лъытэныгъэ зыфэсшIырэр, зэдэлэжьэныгъэ къыд­дыуиIэным узэрэфэхьазырым фэшI «тхьауегъэпсэу» осэIо. Уры­сыем и ЛIыкIохэу Тыркуем щыIэхэми мыщкIэ Iэпы­Iэгъу къытфэхъунхэу тыкъа­гъэгу­гъагъ. Непэ мыщ тыкъы­зэрэ­кIуагъэм проектыкIэхэр къыкIэлъыкIонхэу сэгугъэ», — хигъэунэфыкIыгъ КъумпIыл Мурат.

Адыгеим и ЛIышъхьэ Тыркуем исхэр республикэм къэкIонхэу, ащ нэIуасэ зыфашIынэу къыригъэблэгъагъэх.

Адыгэ Республикэм и ЛIышъхьэ ипресс-къулыкъу