ТхакIоу Лъэустэн Юсыф непэ къызыхъугъэ маф
ТиблэкIыгъэ итарихъIотэкIуагъ
Адыгэ лъэпкъ литературэм ипрозэ икъежьапIэ Iутыгъэхэу, блыпкъ пытэ фэхъугъэхэм Лъэустэн Юсыф ащыщыгъ. КъыгъэшIэгъэ илъэс 85-м щыщэу лIэшIэгъуныкъом нахьыбэм ар чанэу литературэм хэтыгъ.
«Ыгу изэу щыIэныгъэм хэтыгъ» зыфаIорэм фэдагъ. Еджэгъэ-гъэсэгъагъ: агроном сэнэхьатымкIэ мэкъумэщ-хъызмэт техникумыр къыухыгъагъ. 1933 — 1935-рэ илъэсхэм Москва дэт Полиграфическэ институтым щеджагъ.
1935 — 1938-рэ илъэсхэм хэку гъэзетхэу «Колхоз быракъым», «Социалистическэ Адыгеим» яредакцие, 1938 — 1942-рэ илъэсхэм Адыгэ научнэ-ушэтыпIэ институтым Iоф ащишIагъ. 1942-рэ илъэсым, мэкъуогъум ыкIэм къыщегъэжьагъэу 1946-рэ илъэсым нэс дзэ къулыкъур Юсыф ыхьыгъ. Хэгъэгу зэошхом апэ батальон комиссарэу, ащ ыужым фронт гъэзетым икорреспондентэу хэлэжьагъ. Ипшъэрылъ дэгъоу зэригъэцакIэщтыгъэм ишыхьатых Жъогъо Плъыжьым иорден, Хэгъэгу зэошхом иорденэу я II-рэ шъуашэ зиIэр къызэрэфагъэшъошагъэхэр.
Зэо ужым Адыгэ хэкум къэкIожьыгъ, 1946 — 1949-рэ илъэсхэм Адыгэ научнэ-ушэтыпIэ институтым, ащ пыдза-гъэу илъэсищэ хэку гъэзетэу «Социалистическэ Адыгеим» иредакцие иотдел ипащэу Iоф ышIагъ. Илъэси 10-рэ, 1952 — 1962-рэ илъэсхэм, Лъэустэныр адыгэ тхакIохэм я Союз ипэщагъ.
Лъэустэн Юсыф Ибрахьимэ ыкъор Теуцожь районым итыгъэ къуаджэу Шыхьанчэрыехьаблэ мэлылъфэгъум и 25-м, 1913-рэ илъэсым къыщыхъугъ.
1930-рэ илъэсым къыщыублагъэу ытхыхэрэр къыхиутыщтыгъэх. Тхылъ 25-рэ фэдиз къыдигъэкIыгъ. АдыгабзэкIэ къыдэкIыгъэх тхылъхэу «Аминэт» (1936), «Гъогур Iухыгъ» (1938), «Адыгэ новеллэхэр», «Къушъхьэр къэнэфы», «Ожъубанэкъохэр», «Зы бын итхыд», «Пшъашъэмэ янэфылъ», «ХэшыпыкIыгъэ тхыгъэхэр», тхылъитIу хъоу, нэмыкIхэри. Мыхэм ащыщхэр урысыбзэкIэ къыхаутыгъэх.
Лъэустэн Юсыф ипьесэхэу «Налмэс», «Нэфсэт игъогухэр», «Ожъубанэкъо Асхьад» зыфиIохэрэр илъэс зэфэшъхьафхэм Адыгэ драмтеатрэм исценэ щагъэуцугъэх. ТхакIом иповестхэмкIэ, ироманхэмкIэ адыгэ лъэпкъым итарихъ блэкIыгъэ — революциер, граждан, Хэгъэгу зэошхохэр ыкIи мамырныгъэр зыгъотыжьыгъэхэ цIыфхэм щыIэкIэ-псэукIэм гуетыныгъэу фыряIагъэр къыриIотыкIыгъэх; адыгэ бзылъфыгъэм Октябрэшхом ыпэкIэ къинэу, хьазабэу ыщэчыгъэри ипроизведениехэм къащыригъэлъэгъукIыгъ. Зэо илъэс шIуцIэхэри нэмыкI цIыф лъэпкъхэм афэдэхэу адыгэхэм къызэрашъхьамысыгъэхэр, ау лIыгъэкIэ апшъэ укIонэу щытхэпти, псэр атызэ, лъэпкъ макIэу, ау лIыбланэу, лIыхъужъэу адыгэм ТекIоныгъэр къызэригъэблэгъагъэр икъу фэдизэу итхыгъэхэм ащыкIигъэтхъыгъ.
Хэгъэгур заом къыкIэрызыжьи, зэоуж лъэхъаным щыIакIэу зэтезыпагъэм изэтегъэуцожьын фежьэгъагъ. Адыгэ хэкуми джа пшъэрылъ инхэр зэшIуихыхэзэ ыпэкIэ лъыкIотэныр, зыкъиIэтыныр фызэшIокIыгъ. ЦIыфыр анахь кIочIэшIу лъэшэу обществэмкIэ зэрэщытыр къыхигъэщэу, лэжьэкIо Iапшъэхэм ящытхъу пIотэныр зэряпэсыгъэр зэхишIэу мы уахътэми Юсыф чанэу Iоф ешIэ, очеркхэр зыдэт тхылъэу «ШIум илъэгъохэщхэр» зыфиIорэр етхы, къыдегъэкIы. Мы тхылъым пае Теуцожь Цыгъо ыцIэкIэ агъэнэфэгъэ литературнэ премиер Ю. Лъэустэным къыфагъэшъошагъ.
Общественнэ щыIэкIэ-псэукIэм тхакIор ипчэгу итэу сыд фэдэрэ Iофи чанэу хэлажьэщтыгъ. Джащ пае «Щытхъум Итамыгъ» зыфиIорэ орденыр тIогъогогъо ыкIи медальхэр къыратыгъэх.
Лъэустэн Юсыф адыгэ пшысэхэм якъыдэгъэкIын хэлэжьагъ, адыгэ гущыIэжъхэр дэтхэу тхылъи 3 къыдигъэкIыгъ.
ЗэдзэкIын Iофми иIахьышхо хэлъ. Лев Толстоим иповестэу «Хаджи-Мурат», М. Островскэм ироманэу «Как закалялась сталь» (гъусэхэр иIэхэу), А. Фадеевым ироманэу «Молодая гвардия» (Д. Кэстанэр игъусэу) Лъэустэным адыгабзэкIэ зэридзэкIыгъэх.
Лъэустэн Юсыф гъашIэр дэгъоу зышIэу, зылъэгъоу, а зэкIэ художественнэ шъуашэм дэгъоу езыгъэкIун зылъэкIыщтыгъэ тхакIу.
1939-рэ илъэсым къыщегъэжьагъэу Юсыф СССР-м итхакIохэм я Cоюз хэтыгъ. ШъхьэкIэфэ-лъытэныгъэ фашIыщтыгъ, хэкумкIи, къалэмкIи лъэпкъ депутатэу хадзыгъагъ. Лъэустэн Юсыф Адыгэ Республикэм инароднэ тхакIу, Украинэм ит селоу Дьяковрэ къалэу Мыекъуапэрэ яцIыф гъэшIуагъ.
Мамырыкъо Нуриет.