Мы аужырэ илъэс зытфы-зыхым Урысыем зэфэдэкIэ мэхьанэ зиIэ Iофтхьабзэу «Библиочэщ-2019» зыфиIорэр щызэхащэ. Адыгеими мэфэкIым кIуачIэ щыриIэ хъугъэ.

Мэлылъфэгъум и 19-м Адыгэ республикэ кIэлэцIыкIу тхылъ­еджапIэм еджэкIо цIыкIухэр, ны-тыхэр, кIэлэегъаджэхэр зы­хэлэжьэгъэ Iофтхьабзэу «Биб­лиопчыхьэшъхьап» зыфиIорэр щыIагъ. «Зэрэдунаеу — театр» зыфиIорэ темэу мэлылъфэ­гъум фестивалэу хэгъэгум ит тхылъеджапIэхэр зыхэлажьэ­хэрэм дыригъаштэу ар гъэпсыгъагъэ.

Тхылъеджэ ныбжьыкIэхэр литературнэ пшысэм хэщэгъэнхэр, гушIуагъор агукIэ зэхашIэу, театрэ зыкъэшIын-зыкъэгъэ­лъэгъонхэм, джэгукIэ зэфэ­шъхьафхэм, мастер-классхэм ахэгъэлэжьэгъэнхэр ащ къыди­лъытэщтыгъ.

Iофтхьабзэм гухэлъэу иIагъэр: кIэлэцIыкIу тхылъыр зэлъягъэшIэгъэныр, шIыкIакIэхэр къызфагъэфедэхэзэ, кIэлэцIыкIухэм еджэныр апэблагъэ шIыгъэныр. Библиопчыхьэшъхьапэу «Театрэ чэщдэс» зыфиIорэр нэм къыкIагъэуцоу тхылъ къэгъэлъэ­гъон кIэракIэхэм, зэлъашIэрэ артистхэм ыкIи режиссерхэм ясурэт галерее узыфащэщтыгъ.

Театрэ мэфэкIым ипрограммэ баигъ: нысхъапхэм ятеатрэу «Дышъэ къошын» зыфи­Iорэм иартистхэм кIэлэцIыкIу­хэм зэ­IукIэгъу адыряIагъ, ежьхэми ак­тер сэнэхьатыр зыфэдэр ауплъэкIугъ.

ЯкIасэхэ тхылъхэм ялIыхъужъ­хэмкIэ театрэ зыкъэшIыгъохэр къагъэлъэгъуагъэх.

Театрэ хьакIэщэу «Волшебный мир кулис» зыфиIорэм искусствэхэмкIэ Адыгэ респуб­ликэ колледжэу У. Тхьабысымым ыцIэкIэ щытым щеджэхэрэм музыкальнэ спектаклэу «Колобок, или Я ищу свою пе­сенку» зыфиIорэр къафагъэ­лъэгъуагъ.

МэфэкIым къыщызэхэ­хьэгъэ пстэури дахэу шIыгъагъэ, фэпэ­гъагъэ.

Музыкальнэ хьакIэщэу «Многоликий мир театра» зыфиIорэр викторинэ чэфхэмкIэ, джэгу­кIэхэмкIэ ыкIи зэнэкъокъу­хэмкIэ зэлъыпкIэгъагъ.

«Театрэ чэщдэсыр» Адыгэ республикэ кIэлэцIыкIу тхылъеджапIэм гум къинэжьэу щызэгъэкIугъагъ, ащ хэлэжьагъэ пэпчъ джыри тхылъым зы лъэ­бэкъукIэ нахь пэблагъэ зэ­рэ­хъугъэр нафэ.

Дзэукъожь Нуриет.