ШIушIагъэр щыIэныгъэм къыщятэжьы
Лъэпкъхэр зэфэзыщэрэ Iофтхьабзэм ухэлэжьэныр сыдигъокIи гуапэ. Адыгэ-абхъаз театрэхэм я Дунэе фестивалэу «Кавказский меловой круг» зыфиIорэм Къыблэм, Темыр Кавказым ятеатрэхэр щызэIукIагъэх.
Мыекъуапэ щыкIорэ Дунэе фестивалым Щэрджэскъалэ ыкIи Налщык къарыкIыгъэхэ къэралыгъо театрэхэм мэлылъфэгъум и 23-м спектаклэхэр къыщагъэлъэгъуагъэх. Абазин драматическэ театрэм «Страна ашуя» зыфиIорэ спектаклэр къышIыгъ. Тарихъым, диным, щыIэныгъэм афэгъэхьыгъэ къэгъэлъэгъоныр республикэм и Камернэ музыкальнэ театрэу А. Хьанэхъум ыцIэ зыхьырэм щыкIуагъ. ТIысыпIэ нэкI залым имыIэжьэу искусствэр зышIогъэшIэгъонхэр спектаклэм еплъыгъэх.
ШIулъэгъу мыгощыгъэм инэпсхэр
Къэбэртэе къэралыгъо драматическэ театрэу А. ШэуджэнцIыкIум ыцIэ зыхьырэм А. Островскэм ипьесэ техыгъэу «Таланты и поклонники» зыфиIорэр къыгъэлъэгъуагъ. Республикэм и Къэралыгъо филармоние щызэIукIагъэхэм абхъазхэр, адыгэхэр апэу къахэдгъэщыгъэх.
Урысыем, Адыгеим янароднэ артистэу, Абхъазым изаслуженнэ артистэу Кукэнэ Мурат филармонием къэкIогъэ ныбжьыкIэхэм гущыIэгъу афэхъугъ. Лъэпкъхэр зэфэзыщэрэ Iофтхьабзэм анахьэу къыщыхигъэщыгъэр искусствэм ыбзэкIэ яеплъыкIэхэр къызэфаIотэн зэралъэкIырэр ары.
Урысыем итеатрэхэм яIофышIэхэм я Союз икъутамэу Адыгэ Республикэм щыIэм ипащэу, зэлъашIэрэ артистэу Зыхьэ Заурбый Абхъазым итеатрэхэм ялIыкIохэм зэдэгущыIэгъу гъэшIэгъон адыриIагъ.
— Искусствэр лъэмыдж пытэу щыт, — къыIуагъ З. Зыхьэм. — Тэ, артистхэм, нэIуасэ тызэфэхъугъ, фестивалым тыхэлажьэзэ нахьышIоу тызэрэшIагъ.
Къэбэртэе къэралыгъо театрэм артистхэм яныдэлъфыбзэкIэ спектаклэр къыгъэлъэгъуагъ. Адыгабзэр зэрэбаир бэрэ къэтэIоми, ащ фэдэ зэхахьэхэм гукIэ къафэтэгъэзэжьы.
ШIулъэгъум, сэнаущыгъэ зыхэлъхэм язекIуакIэ, щыIэкIэ-псэукIэр мылъку зыIэкIэлъхэм зэрагъэIорышIэрэм, цIыфхэр шIулъэгъум зэрэзэпигъэуцухэрэм яхьылIэгъэ къэгъэлъэгъоныр артистхэм IупкIэу къытлъагъэIэсы.
Бэгъ Иннэ ироль къызэIуихызэ, бзэр дэгъоу егъэфедэ. Нэщх-гущхэу зэрэщытым дакIоу, шIулъэгъу къабзэм ытамэхэр зэкIищынхэ ымылъэкIэу чIыпIэ зэжъу зэрифагъэр къегъэлъагъо. Артисткэм инэплъэгъу, игущыIэхэм зэпыугъоу афишIырэр Iэдэб хэлъэу зэригъэфедэрэр гум рехьы.
Урысыем изаслуженнэ артистэу Шыбзыхъо Басир икъашъокIи, игущыIэ щэрыохэмкIи, исэмэркъэукIи зыкъыуегъаштэ. Шъон пытэхэм апыщагъэхэм ярольхэр къызэрашIыхэрэм искусствэ лъагэм уфащэ. ШIулъэгъу къабзэр ешъуакIом къыухъумэщтэп. Пшъашъэри ипсэлъыхъо фэшъыпкъэ шIоигъу, ау щыIэныгъэм зэхъокIыныгъэу фэхъухэрэм дахьыхы.
«Къысфэгъэгъу, къысфэгъэгъу», — еIо пшъашъэм. Ау псэлъыхъо кIалэм ыгу ихъыкIырэр сыдэущтэу къызыпкъырихыщта?
ЕплъыкIэхэр
Республикэм и Лъэпкъ театрэу И. Цэим ыцIэ зыхьырэм ихудожественнэ пащэу ХьакIэгъогъу Къэсэй, артистхэу Зыхьэ Заурбый, Зыхьэ Мэлайчэт, Кукэнэ Мурат, Уайкъокъо Асыет, Къэбэхьэ Анзор, нэмыкIхэри спектаклэр къызаухым къэбэртэе артистхэм аIукIагъэх, зэфэгушIуагъэх. Ныбджэгъуныгъэ зэдызиIэхэм язэдэгущыIэгъухэр уахътэм дештэх.
— Сигуапэу мыщ фэдэ зэIукIэгъум сыхэлажьэ, — къытиIуагъ Адыгэ Республикэм искусствэхэмкIэ изаслуженнэ IофышIэшхоу Шъхьаплъэкъо Къэсэй. — Республикэ зэфэшъхьафхэм къарыкIыгъэхэ артистхэр упчIэжьэгъу зэфэхъух. Зыр зым кIырэплъыжьы. Непэ нэIуасэ зэфэхъугъэхэ артистхэр телефонкIэ зэфытеонхэу зэзэгъыгъэхэр бэ мэхъух.
Театрэм цIыфхэр зэфищагъэх. 2019-рэ илъэсыр театрэм и Илъэс. Артистхэм опытэу яIэ хъугъэр щыIэныгъэм нахьышIоу щагъэфедэн ямурад.
Шъурагъэблагъэ
Абхъазым, Къыблэ Осетием ятеатрэхэм яспектаклэхэр непэ Мыекъуапэ къыщагъэлъэгъощтых. Фестивалыр мэлылъфэгъум и 28-м зэфашIыжьыщт. ЗэхэщакIохэм театрэр зышIогъэшIэгъонхэр рагъэблагъэх.
Сурэтхэр зэхахьэм къыщытетхыгъэх.