Театрэхэм я Дунэе фестиваль
Джэныкъо машIом тызэфещэ
Адыгэ-абхъаз театрэхэм я Дунэе фестивалэу «Кавказский меловой круг» зыфиIорэр мэлылъфэгъум и 22-м Мыекъуапэ къыщызэIуахыгъ.
Пресс-зэIукIэр
Фестивалым фэгъэхьыгъэ пресс-зэIукIэр Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм щыкIуагъ. Театрэм литературнэ-драматическэ IофхэмкIэ ипащэу Къуижъ Нэфсэт зэхахьэр зэрищагъ.
Республикэм культурэмкIэ иминистрэу Аулъэ Юрэ фестивалыр 2005-рэ илъэсым къыщыублагъэу зэрэзэхащэрэр къыIуагъ. Шъолъыр фестивалыр Дунэе фестиваль зэрэхъугъэм министрэм мэхьэнэ ин ритыгъ. Театрэр зычIэт унэм гъэцэкIэжьын IофшIэнхэр зэрэщызэшIуахыгъэхэм, залым тIысыпIэхэр зэрэщызэблахъугъэхэм ямызакъоу, цIыфхэр культурэм нахь куоу хэщэгъэнхэмкIэ егъэжьэпIэшIухэу ашIыгъэхэр Ю. Аулъэм къыхигъэщыгъэх.
Ти ЛIышъхьэу КъумпIыл Мурат ишIуагъэкIэ Лъэпкъ театрэр зэтырагъэпсыхьажьын алъэкIыгъ. Урысыем театрэм и Илъэс щэкIо. Фестивалым изэхэщакIохэм ар къыдалъытэзэ, Дунэе фестивалым зырагъэушъомбгъугъ.
Адыгэ Республикэм иныбджэгъушIоу, тхакIоу, драматургэу, общественнэ IофышIэшхоу Геннадий Аламие фестивалыр лъэпкъхэм язэIукIэшхоу ылъытагъ.
— ТизэфыщытыкIэхэр мыщ фэдэ зэхахьэхэм ащэпытэх, — къыIуагъ Геннадий Алание. — Фестивалыр тиеджапIэуи щыт. Хъугъэ-шIагъэхэм япхыгъэу спектаклэхэр агъэуцух, щыIэныгъэр нахь гъэшIэгъон зэрэхъущтым зэхэщакIохэр пылъых.
ОсэшI купым хэтэу Татьяна Спасоломскаяр сценографиемкIэ кIэлэегъадж, Борис Щукиным ыцIэ зыхьырэ театральнэ институтым иIофышI, Урысыем итеатрэхэм яIофышIэхэм я Союз хэт.
Татьяна Спасоломскаям пресс-зэIукIэм къыщыхигъэщыгъ лъэпкъхэм ятеатрэхэм хэхъоныгъэ ашIынымкIэ тарихъым нахь куоу зыфагъэзэн зэрэфаер.
Абхъаз, Къэрэщэе-Щэрджэс театрэхэм яIофышIэхэр, нэмыкIхэри зэхахьэм къыщыгущыIагъэх. Фестивалым икIэщакIоу, Адыгэ Республикэм и Лъэпкъ театрэу И. Цэим ыцIэ зыхьырэм ихудожественнэ пащэу, режиссер цIэрыIоу ХьакIэгъогъу Къэсэй пресс-зэIукIэм къыщиIуагъэр щыIэныгъэм къыпкъырэкIы. Фестивалэу лъэпкъхэр зэфэзыщэрэм инеущрэ мафэ нахьышIу зэрэхъущтым ащ ицыхьэ телъ.
КъызэIуахыгъ
Адыгэ Республикэм культурэмкIэ иминистрэу Аулъэ Юрэ пчыхьэзэхахьэм хэлажьэхэрэм ти ЛIышъхьэу КъумпIыл Мурат ыцIэкIэ къафэгушIуагъ, Дунэе фестивалым хэхъоныгъэхэр ышIынхэу фиIуагъ.
Урысыем итеатрэхэм яIофышIэхэм я Союз икъутамэу Адыгэ Республикэм щыIэм ипащэу, зэлъашIэрэ артистэу Зыхьэ Заурбый Урысыем инароднэ артистэу, Урысыем итеатрэхэм яIофышIэхэм я Союз итхьаматэу Александр Калягиным ыцIэкIэ Дунэе фестивалым хэлажьэхэрэм шIуфэc къарихыгъ, фестивалым лъэпкъхэр зэрэзэфищэхэрэр хигъэунэфыкIыгъ.
Къэгъэлъэгъоныр
Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм спектаклэу «Кавказский меловой кругыр» пчыхьэзэхахьэм къыщигъэлъэгъуагъ. Адыгеим иартистхэу Уджыхъу Марыет, Уайкъокъо Асыет, Хьакъуй Андзаур, Ордэн Фатимэ, ХьатхьакIумэ Аскэрбый, Исуп Тимур, Мурэтэ Рустам, Ахъмэт Артур, нэмыкIхэри ащ хэлэжьагъэх. Абхъазым иартистхэми рольхэр къашIыгъэх. АдыгабзэкIэ, урысыбзэкIэ, абхъазыбзэкIэ артистхэр къызэрэгущыIэхэрэм къэгъэлъэгъоныр къыгъэбаигъ.
Уджыхъу Марыет кIэух едзыгъом IупкIэу къызэрэщиIуагъэу, уцугъэп уахътэм исыхьат, джэныкъо машIор кIосэщтэп.
Тыбзэ, тишэн-хабзэхэр къэтыухъумэхэзэ тапэкIэ тылъыкIотэным фэшI амалышIухэр щыIэх. Орэпсэу театрэр!
Къэбэртэе-Бэлъкъарым, Абхъазым, Къэрэщэе-Щэрджэсым, Тыркуем, нэмыкIхэм ятеатрэхэм яспектаклэхэр мэлылъфэгъум и 28-м нэс Мыекъуапэ къыщагъэлъэгъощтых. Искусствэр зышIогъэшIэгъонхэр ыпкIэ амытэу ахэм яплъыщтых.