Мыекъуапэ щыкIощт
Мэлылъфэгъум и 22 — 28-м адыгэ-абхъаз театрэхэм я Дунэе фестивалэу «Кавказский меловой круг» зыфиIорэр Мыекъуапэ щыкIощт.
Урысыемрэ Адыгэ Республикэмрэ культурэмкIэ яминистерствэхэм, Урысыем итеатрэхэм яIофышIэхэм я Союз, Адыгэ Республикэм итеатрэхэм яIофышIэхэм я Союз фестивалыр зэхащэ.
Хэлэжьэщтхэр
Къэбэртэе къэралыгъо драматическэ театрэу А. ШэуджэнцIыкIум ыцIэ зыхьырэр, Абазин республикэ къэралыгъо театрэр, Щэрджэс драматическэ театрэу М. Акъэм ыцIэ зыхьырэр, Ингуш къэралыгъо драматическэ театрэу И. Базоркиным ыцIэ зыхьырэр, Къыблэ Осетием и Къэралыгъо драматическэ театрэу К. Хетагуровым ыцIэ зыхьырэр, Авар музыкальнэ драматическэ театрэу Г. Цадасэ ыцIэ зыхьырэр, Абхъаз къэралыгъо драматическэ театрэу С. Чанбэ ыцIэ зыхьырэр, Абхъаз къэралыгъо драматическэ ныбжьыкIэ театрэр, Чэчэн къэралыгъо драматическэ театрэу Х. Нурадиловым ыцIэ зыхьырэр, Темыр Осетием — Аланием икъэралыгъо академическэ театрэу В. Тхапсаевым ыцIэ зыхьырэр, Тыркуем итеатральнэ купэу «Гугъэр», Адыгэ Республикэм и Лъэпкъ театрэу И. Цэим ыцIэ зыхьырэр театрэхэм я Дунэе фестиваль хэлэжьэщтых.
Драматургием фэгъэхьыгъ
Драматургием, сценографием афэгъэхьыгъэ егъэджэн зэхахьэхэр фестивалым щыкIощтых. СурэтышIхэм, литературэм Iоф дэзышIэхэрэм, драматург ныбжьыкIэхэм, театрэм пае тхэхэрэм яшIэныгъэ хагъэхъонымкIэ Москва, Санкт-Петербург къарыкIыгъэхэу опыт зиIэхэр фестивалым хэлажьэхэрэм аIукIэщтых.
— Къыблэм, Темыр Кавказым ятеатрэхэм фестивалым мэхьэнэ ин раты, — къытиIуагъ Адыгэ Республикэм и Лъэпкъ театрэу И. Цэим ыцIэ зыхьырэм ихудожественнэ пащэу ХьакIэгъогъу Къэсэй. — Театрэм и Илъэс IофшIэгъэ дэгъухэмкIэ хэдгъэунэфыкIыщт.
Спектаклэхэр Лъэпкъ театрэм, филармонием, «Налмэсым» и Унэ ащыкIощтых, искусствэр зышIогъэшIэгъонхэр ыпкIэ хэмылъэу къэгъэлъэгъонхэм яплъыщтых.
ЕМТIЫЛЪ Нурбый.