ТхакIомрэ щыIэныгъэмрэ
Адыгеир къахегъэщы
Адыгэ Республикэм икъэралыгъо гъэпсыкIэ, лъэпкъ Iофхэм афэгъэхьыгъэ тхылъыр Цурмыт Эльдар къалэу Анкара къыщыдигъэкIыгъ.
ТыркубзэкIэ къыхаутыгъэ тхылъым Октябрэ революцием ыпэкIэ адыгэмэ щыIакIэу яIагъэр къеIуатэ. Адыгэ автоном хэкур гъэпсыгъэ зэрэхъугъэм, Совет хабзэм илъэхъан Адыгеим къырыкIуагъэм, Краснодар краим Адыгеир къыхэкIыжьи, хэбзэ шапхъэхэм атетэу республикэ зэрэхъугъэм ыкIи къэралыгъо гъэпсыкIэ иIэу зэрэпытагъэм, политикэ Iофхэм, адыгэхэм ящыIакIэ, демографием, лъэпкъ Iофхэм афэгъэхьыгъэ тхылъыр 2016-рэ илъэсым тыркубзэкIэ къыхаутыгъ. Зэфэхьысыжьхэр авторым ышIыхэзэ Адыгеим иполитикэ итарихъ ехьылIэгъэ апэрэ тхылъэу тыркуем къыщыдэкIыгъэм уегъэгъуазэ.
Цурмыт Эльдар 2018-рэ илъэсым иящэнэрэ тхылъ Тыркуем къыщыдигъэкIыгъ. Дунэе лъэпкъ зэфыщытыкIэхэм ыкIи дунэе политикэм ар афэгъэхьыгъ. ТхакIор мы мафэхэм Мыекъуапэ къэкIуагъэу гущыIэгъу тыфэхъугъ.
Апшъэрэ еджапIэр, магистратурэр Цурмыт Эльдар Тыркуем къыщиухыгъэх, иIахьылхэм Мыекъуапэ къагъэзэжьыгъ.
— Илъэс 40 сыныбжь, сэри Адыгеим сыкъэкIожьы сшIоигъу. СишIэныгъэ хэзгъэхъон симурад, — къытиIуагъ тхакIоу, шIэныгъэлэжьэу Цурмыт Эльдар.
Республикэм щыпсэу зыхъукIэ, адыгабзэри нахьышIоу зэригъэшIэн гухэлъ зэри- Iэм тыщигъэгъозагъ.
Сурэтым итыр: Цурмыт Эльдар.
ЕМТIЫЛЪ Нурбый.