Шъхьэлэхъо Абу къызыхъугъэр илъэс 90-рэ хъущт
ТигъашIэ ренэу хэтыщт
Абу тIозэ тэ ащ ренэу теджэщтыгъ, ежьыри ицIыкIугъом къыщегъэжьагъэу ар ыштагъэу игъашIэ къыхьыгъ.
Ау мары зыщымыIэжьыр илъэс хъугъэп, тигукъао джыри мыIэсагъэу тыхэт. Тщызымыгъэгъупшэн лъэуж ин, лъэуж гъэшIэгъон иIэшIагъэхэмкIэ, итхыгъэхэмкIэ, игупшысэ куукIэ тищыIакIэ къыхинагъ. ИIофшIагъэхэм, игъэхъагъэхэм къакIэкIуагъэхэу щытхъуцIэ зэфэшъхьафхэр, шIухьафтын инхэр иIагъэх.
Шъхьэлэхъо Абу филологие шIэныгъэхэмкIэ докторыгъ, профессорыгъ, гуманитар шIэныгъэхэмкIэ Адыгэ республикэ институтэу КIэрэщэ Тембот ыцIэкIэ щытым литературэмкIэ иотдел илъэсыбэрэ ипэщагъ, нэужым ишIэныгъэлэжь шъхьаIэу щытыгъ, шIэныгъэхэмкIэ Дунэе Адыгэ академием иакадемикыгъ, Адыгэ Республикэми Урысые Федерациеми шIэныгъэхэмкIэ яIофышIэшхуагъ, Урысыем итхакIохэм я Союз хэтыгъ, Адыгеим шIэныгъэхэмкIэ и Къэралыгъо премие илауреатыгъ. Адыгэ хэку хасэми, Дунэе Адыгэ Хасэми язэхэщакIохэм, япащэхэм ренэу ахэтыгъ, бэрэ апэ итэу къыхэкIыгъ. Къызщыхъугъэ къуаджэу Очэпщыий, ар зэрыт Теуцожь районми, Адыгэкъали, Щынджыий яцIыф гъэшIуагъэу щытыгъ, «Адыгеим и Щытхъузехь» зыфиIорэ медалыр къызфагъэшъошагъэхэм ащыщыгъ. Ахэм афэдэу джыри къэплъытэн плъэкIыщтыр макIэп.
Илъэс тIокIи ымыныбжьэу ригъэжьагъэу егъэджэн-пIуныгъэ Iофым лъэпсэ пытэ щидзыгъэу егъашIэм хэтыгъ. Къызщыхъугъэ Очэпщыий, нэмыкI къуаджэхэми ащыкIэлэегъэджагъ. Анахьэу а лъэныкъомкIэ иIэпэIэсэныгъэ къызщылъэгъуагъэр Адыгэ къэралыгъо кIэлэегъэджэ институтыр ары. Иаужырэ илъэсхэм къанэсыжьэу ащ щылэжьагъ. НыбжьыкIэмэ гъэсэныгъэу аригъэгъотырэм, егъэджэн Iофым ишъэфыпIэхэу аригъашIэхэрэм адакIоу, ахэр зэребгъэджэщтхэм фэгъэхьыгъэуи, гурыт еджапIэм ищыкIэгъэ тхылъ зэфэшъхьафхэуи ытхыгъэр бэ. Студентхэр зэребгъэджэщтхэ методическэ тхылъхэм, гурыт еджапIэм ищыкIэгъэ программэхэм, тхылъ IэпыIэгъу зэфэшъхьафхэм, учебникхэм ар яавтор.
А пстэуми адакIоу иныбжьыкIэгъум къыщегъэжьагъэу общественнэ-политическэ Iофхэм, ихэку, нэужым иреспубликэ, зэкIэ адыгэ лъэпкъым ягумэкIхэм ахэщагъэу, бэри ягупчэ итэу къыхьыгъ. ВЛКСМ-м и Теуцожь райком ипэщагъ, комсомолым, партием яхэку комитетхэм ащылэжьагъ, Теуцожь районым, Мыекъопэ къэлэ Советым ядепутатэуи щытыгъ.
Илъэпкъ зэхашIэ, илъэпкъ гупшысэ нахь куоу, игъэкIотыгъэу къызщылъэгъуагъэр икIыгъэ лIэшIэгъум ия 80-рэ илъэсхэм хэгъэгум зэхъокIыныгъэшхохэр къызщежьэхэр ары. Адыгэ Хасэм иапэрэ зэхэщакIоу, итхьаматэу, нэужым итхьамэтэ гъэшIуагъэу илъэсыбэ къызэпичыгъ. Дунэе Щэрджэс ЗэIукIэм (МЧА) иапэрэ зэфэсэу 1991-рэ илъэсым Налщык щыкIуагъэм хэлэжьагъ, нэужым и Тхьаматэ игуадзэу, илъэсищым къыкIоцI Тхьаматэуи щытыгъ, зэIукIи, зэфэси, нэмыкI Iофыгъо инэу МЧА-м зэшIуихыхэрэм ишъыпкъэу ахэлажьэзэ къыхьыгъ. Адыгэ Республикэ ныбжьыкIэм изэхэщэни, ар ылъакъо пытэу тегъэуцогъэнми зиIахьышхо хэзылъхьагъэмэ ащыщ. Апшъэрэ Советэу апэу ащ щызэхащэгъагъэми идепутатыгъ. «Шъхьэлэхъо Абу шIэныгъэлэжь, кIэлэегъадж, тхакIо» тIоу къэтлъытэмэ, зэкIэ идгъэкъугъэу къытщэхъу. Ащ ишIэныгъи изэхашIи гъунэнчъэхэу зэрэщытыгъэхэр икъоу къэтымыубытэу къыхэкIы. Ары шъхьае, тхылъ зэфэшъхьафыбэу къыдигъэкIыгъэхэр лъэныкъуабэу зэхэлъых. ЛIэшIэгъу минхэм къакIоцI лъэпкъым къыкIугъэ тарихъ гъогур, щыIэкIэ-псэукIэу, шэн-зэхэтыкIэу къыхихыгъэхэр зэкIэ кIэрылъхьагъэх.
Нахьыпэм нэмыкIыбзэкIэ атхыгъэ, нэужым тэ тыбзэкIэ тиIэ хъугъэ адыгэ литературэм ылъапсэхэр а фольклор баим зэрэхэлъхэр иIофшIагъэхэм, итхылъхэм ащызэхэфыгъ, ащыкIэгъэтхъыгъ. АщкIи укъикIымэ, Шъхьэлэхьо Абу адыгэ литературэм итарихълэжьышхуагъ.
КъежьапIэхэм ынаIэ атетэу апэрэ лъэбэкъухэу, хъугъэ-шIагъэхэу, усэхэу, рассказхэу нэмыкI хьарыфылъэхэм лъэпкъыр арылажьэ зэхъум атхыгъэхэу гъожьы хъужьыгъэ гъэзет, журнал нэкIубгъохэм къарынэжьыгъэхэм якъыхэгъэщыжьын, кIэзыгъэнчъэу ахэр угъоижьыгъэнхэм дэмышъхьахэу ар къыгъэшIагъэм пылъыгъ. Ащи изакъоп. КъежьапIэхэм аIутыгъэхэу е нэужым литературэм къыхэуцуагъэхэу, ау зэряфэшъуашэу зыцIэ рамыIуагъэхэр къэIэтыжьыгъэнхэр, ятхыгъэхэр хэутыжьыгъэнхэр ипшъэрылъ шъхьаIэу ылъытэщтыгъэ. А лъэныкъомкIэ зэшIуихыгъэри бэ. Цэй Ибрахьимэ, Кобл Билъэустэн ятхыгъэхэр тхылъ шъхьафхэу къыдигъэкIыжьыгъэх. Меркицкэ Рэщыдэ, Натхъо Долэтхъан, Уджыхъу Адылджэрые, Уджыхъу Хъалидэ, Тыгъужъ ДышъэкI афэгъэхьыгъэу ытхыжьыгъэри макIэп.
АдыгабзэкIэ тхыгъэ адыгэ литературэ ныбжьыкIэу я ХХ-рэ лIэшIэгъум къежьагъэм итарихъ ахэр зэкIэ хэгъэщагъэхэу зэхифыгъэх. А лъэныкъом фэбгъазэми, Шъхьэлэхъо Абу адыгэ литературэм иIофыгъо инхэр ренэу инэплъэгъу итыгъэх. Ащ лъапсэу фэхъугъэ, ар лъызыгъэкIотэгъэ, зыгъэдэхэгъэ тхэкIо нахьыжъхэуи нахьыкIэхэуи Т. КIэращэм, Ц. Теуцожьым, Хъ. Андырхъуаем, Д. Кэстанэм, Къ. Жанэм, С. ЯхъулIэм, А. ХьэдэгъалIэм, И. МэщбашIэм, нэмыкIхэми афэгъэхьыгъэу ащ ытхыгъэр макIэп. Иапэрэ статья инхэм ащыщэу «Адыгэ бзылъфыгъэр адыгэ советскэ литературэм къызэригъэлъагъорэр» зыфиIорэр «Социалистическэ Адыгеим» 1959-рэ илъэсым щылэ мазэм и 17-м къыхиутыгъ. А шъхьэ дэдэр иIэу 1963-рэ илъэсым тхылъ шъхьафэуи къыдигъэкIыгъ. Ащ ыпэкIи ыужырэ илъэсхэми статья зэфэшъхьафхэр къызэкIэлъыкIуагъэх. Джаущтэу идиссертацие IофшIагъэу «Адыгэ литературэм ихэхъоныгъэ гъогухэр» зыфиIорэр игъорыгъозэ ыгъэхьазырыгъ, ау ащ ипхырыгъэкIын кIыхьэ-лыхьэ къышIуашIыгъ.
НэмыкIхэм зэрашIырэм фэмыдэ екIолIакIэхэу адыгэ литературэ ныбжьыкIэм икъэхъунрэ ихэхъонрэ афэгъэхьыгъэхэу А. Шъхьэлахъом ыгъэфедэхэрэр зыгу римыхьынхэр къэхъугъэх. Ахэм афэдэх, гущыIэм пае, адыгэ тхэкIо-просветительхэу я XIX-рэ лIэшIэгъум щыIагъэхэр, я ХХ-рэ лIэшIэгъум ия 30 — 40-рэ илъэсхэм культурэм лъэпсэ пытэкIэ хэуцуагъэхэу, ау лъэпкъ гупшысэм «дихьыхыщэу» алъытэгъэ С. Сихъур, Б. Коблыр, нэмыкI зырызхэр кIэгъэтхъыгъэу къызэрэхигъэщыхэрэм пэуцужьыгъэхэр. Анахьэу aгy римыхьыщтыгъэр Цэй Ибрахьимэ фэгъэхьыгъэ тхыгъэ иныр шъхьафэу диссертацием зэрэхэуцуагъэр арыгъэ.
Сыд аIуагъэми, адыгэ литературэм икъэхъукIэ-къежьакIэ, ихэхъоныгъэ афэгъэхьыгъэ апэрэ IофшIэгъэ-зэфэхьысыжь куур диссертацие зэрэхъугъэм уебгъукIон плъэкIынэу щытыгъэп. 1968-рэ илъэсым ар Тбилиси щыпхырыкIыгъ. Нэужым Шъхьэлэхъо Абу иушэтын-зэхэфын Iофхэр джыри нахь куоу, игъэкIотыгъэу, лъэныкъо зэфэшъхьафхэр къызэлъаубытхэу ыпэкIэ лъыкIотагъэх. Я 70-рэ илъэсхэм къыдэкIыгъэ тхылъхэм ар къаушыхьаты.
Шъхьэлэхъо Абу иушэтын Iофхэм нахь защыхэхъуагъэр илъэс 17-рэ Адыгэ кIэлэегъэджэ институтым зыщылэжьэгъэ нэуж 1977-рэ илъэсым Адыгэ шIэныгъэ-ушэтэкIо институтым — джы АРИГИ-м зызегъэзэжьыр ары. Мыщ литературэмрэ фольклорымрэ ясектор пащэ щыфэхъугъ, институтым щызэшIуахырэ IофшIэнхэм пытэу ахэуцуагъ. Анахь Iоф шъхьаIэу джыри мыщ щылъигъэкIуатэщтыгъэр адыгэ литературэм итарихъ изэгъэфэн, итхын арыгъэ.
«Адыгэ литературэм итхыдэ иIофыгъохэр» зыфиIорэ тхылъитIур 1979 — 1980-рэ илъэсхэм къыдагъэкIыгъэх. Ащ дакIоу мы секторым адыгэ IорIуатэхэм ащыдэлэжьэрэ А. ХьэдэгъалIэмрэ Щ. Хъутымрэ зэхагъэуцогъэ тхылъитIоу «Адыгэ фольклор» зыфиIорэр Абу иIахьышхо хэлъэу къыдэкIыгъ. Ежь иушэтын Iофхэри зэпигъэущтыгъэхэп. Анахь къахэщыгъэмэ ащыщыгъ «Сатырхэм якъэхъукI» зыфиIорэ тхылъэу 1981-рэ илъэсым къыдигъэкIыгъэр. Ащ ипэублэ гущыIэ мырэущтэу щитхыщтыгъэ: «Литературэм ихэхъоныгъэ гъогу нафэ зыхъущтыр, ащ проблемэу зэшIуихын фаехэр, тенденциеу иIэхэр бгъэунэфын зыплъэкIыщтыр, зэфэхьысыжь тэрэзхэр шIыгъэ зыхъущтыр художественнэ творчествэм иявление пэпчъ куоу зэгъэшIагъэ зыхъукIэ ары». Ежь игупшысэхэри джащ фэдэу тхылъым щызэгъэфагъэх. А гъунапкъэм илъэу Хъ. Андырхъуаем, Ц. Теуцожьым М. Пэрэныкъом, А. ХьэдэгъалIэм, Хь. Шъхьаплъэкъом ятхыгъэ хэушъхьафыкIыгъэхэр е ятворчествэ зэрэпсаоу зэхефых. Анахь унаIэ зытеудзэрэмэ ащыщ жэрыIо усэкIо Iазэщтыгъэу Абрэдж Юсыф икъэбарэу къыIуатэрэр.
Ыпэрэ IофшIагъэхэри зэрахэтхэу а пстэури доктор хъуным пае ыгъэхьазырыгъэ диссертацием пкъынэ-лынэхэу хэуцуагъэх. УрысыбзэкIэ зэритхыгъэм фэдэу ышъхьи къэтIон: «Национальная специфика идейно-художественного становления адыгейской литературы (1830 — 1980 гг.)». 1986-рэ илъэсым ари Тбилиси щыпхыригъэкIыгъ. Ар ылъапсэу, ау нахь зегъэушъомбгъугъэу «Идейно-художественное становление адыгейской литературы» зыфиIорэ монографие иныр 1988-рэ илъэсым къыдигъэкIыгъ. Диссертациеми, тхылъыр къызыдэкIыми уасэ афэзышIыгъэхэм Абу игупшысэ зэфэхьысыжьхэр къыхагъэщыгъэх, илъэс пчъагъэхэм ыугъоигъэр, зэригъэфагъэр адыгэ литературэ шIэныгъэм ихэхъоныгъэшхоу зэрэщытыр хагъэунэфыкIыгъ.
Мы IофшIагъэхэм къызэлъаубытырэ илъэс гъунапкъэхэм унаIэ атемыдзэн плъэкIырэп — я XIX-рэ лIэшIэгъум ия 30-рэ илъэсхэм къащежьэ: Хъан- Джэрые, Нэгумэ Шорэ, Къаз- Джэрые ялъэхъан. АщкIэ Шъхьэлахъом пшъэрылъышхо зыфишIыжьыгъагъ: адыгэ литературэр илъэси 150-м къыриубытэу зы идейнэ-эстетическэ пкъынэ-лынэ зэикIэу зэхифынэу 1917-рэ илъэсым ыпэкIэ щыIэгъэ адыгэ гушъхьэлэжьыгъэмрэ (фольклори жэрыIо литератури зэрэхэтэу) адыгэ литературэ ныбжьыкIэмрэ зэпыпчын умылъэкIын гъунапкъэ азыфагу зэрэдэмытыр къыгъэшъыпкъагъ.
Мы IофшIагъэхэм нэрылъэгъу къашIыгъ адыгэ жэрыIо литературэ лъэпкъым зэриIагъэри. Ар зэхэзылъхьэгъэ усэкIо-орэдыIо цIэрыIохэм ащыщыбэхэри Шъхьэлэхъо Абу къыхигъэщыжьыгъэх: Шапсыгъэ Осмэн, Лилыхъу Нэшъу, Цэй Тэтэршъау, Джэнчэтэ Къуйнэшъу, Сэлэчэрыекъо Дэгур, Хьаджэбыекъо (Абрэдж) Юсыф, Хьамакокъо ХьапытI (Бэчый Хъусен), Аулъэ Тхьайшъау, Тыу Щэрабыку, Теуцожь Цыгъу, нэмыкIыбэхэри. Ахэм ежь абзэкIэ тхэкIэ-еджакIэ ашIэщтыгъэп, ащ фэдэ амали ащыгъум щыIагъэп. Ау къакIэныжьыгъэ произведениехэу «Щынджые быгъужъым иорэд», «Емзэщ иорэд», «ПцэнтхьалIэм ыкъуитIу», «Цырац», «Мэзгуащ», нэмыкIыбэхэми непэ уяджэжьы зыхъукIэ, умыгъэшIэгъон, урамыгушхон умылъэкIэу IэпэIэсэныгъэшхо зэрахэлъыгъэр нафэ къыпфэхъу. Ахэр зэкIэ иIэубытыпIэхэу адыгэ литературэ ныбжьыкIэм икъэхъукIэ, ихэхъуакIэ, игъогухэр зэхефых. Зы лъэныкъомкIэ, лъэпкъым ихудожественнэ гупшысакIэ, ащ усэ-пшысэ зэхэлъхьэкIэ, къэгъэлъэгъокIэ амалхэу зэригъэуIугъэхэр, адрэмкIэ, литературэ нахьыжъхэм, анахьэу урыс литературэм ящысэ мэхьанэу иIэр джыри зэ нэрылъэгъу къешIы. А пстэуми адакIоу лъэпкъ литературэм изэгъэшIэн-зэхэфынкIэ джыри шIэгъэн фаехэри хеушъхьафыкIых.
1990-рэ илъэсым къыдигъэкIыгъэ тхылъыкIэу «Шъыпкъагъэр — шэтапкъ» зыфиIорэм а гупшысэр зэрэпсаоу пхырыщыгъ. Мыр лъэныкъо хэхыгъэ горэхэмкIэ ыпэрэ тхылъхэм атекIы. Ар хъугъэ-шIэгъэ лъапсэу тхылъым иIэми, фольклорым, орэдыжъхэм, анахьэу адыгэ лIыхъужъхэм афэгъэхьыгъэхэм, зэхэфыкIэ- екIолIакIэу апигъохырэми къахэщыгъ.
А тарихъ-лIыхъужъ орэдхэм якъэхъукIэ-зэхэлъхьакIэ, къэгъэлъэгъокIэ амалхэу агъэфедэхэрэр ащ фэдэу куоу нахьыпэкIэ зыми зэхифыгъэп. Ащ фэд «ПсынэкIэчъ мычъакъу» зыфиIорэ статьяу нарт эпосым ехьылIэгъэ гурышэ-гупшысэхэр зыпхырыщыгъэри. Ахэм адакIоу лъэхъаныкIэм ижьыкъащэ тхылъым зэрэпсаоу къыхэщы. Нахьыпэм тхакIуи, шIэныгъэлэжьи зэрэфаехэу зылъыIэсын амылъэкIыщтыгъэ фактыбэмэ мыщ уащыIукIэщт. Ахэр титхэкIэ-еджакIэ къызэрежьагъэм, тихьарыфылъэхэм язэхэгъэуцон пылъыгъэхэм, тхэкIо, гупшысэкIо, зэхэщэкIо гъэшIэгъонхэу тарихъым хэкIокIэжьынхэу ежьэгъагъэхэм —Сихъу Сэфэрбый, Кобл Билъэустэн, Ащкъэнэ Исмахьил, МэщфэшIу Шъалихь, Пэнэшъу Исхьакъ, КIубэ Щэбан, нэмыкIхэми япхыгъэх.
Мы тхылъым джыри зэ нэрылъэгъу къешIыжьы Шъхьэлэхъо Абу ынаIэ лъэпкъ жэрыIо псалъэм, духовнэ кIэныжъ баим ренэу зэратетыгъэр. Ар къызхэкIыгъэ лъэныкъохэм ягугъу тшIэу хъугъэ. ИкIэлэцIыкIугъом къыщыублагъэу адыгэ пшысэжъ- тхыдэжъ-орэдыжъхэр дэгъоу зэришIэщтыгъэхэми, егъэджэн- пIуныгъэ Iофышхоу кIэлэегъэджэ институтым адыгэ студентхэм ащыдызэрихьэщтыгъэми, литературэ ныбжьыкIэм икъежьэпIэ лъапсэхэр шIокIыпIэ имыIэу фольклорым зэрэхэлъхэр зэриушэтырэми пытэу ар япхыгъагъ. Ахэм къапкъырыкIыгъ къыкIэлъыкIогъэ тхылъэу «МыкIосэрэ жъуагъохэр» (1994) зыфиIорэр. Мыщ «Адыгэ лIыхъужъхэр» ыIоу шъхьэ фишIынэуи тефэщтыгъэ. Къэугупшысыгъэуи, щыIэгъэ шъыпкъэу тарихъ чыжьи, тарихъ благъи къахэнэжьыгъэхэуи дэтыр бэ. Нарт эпосымкIэ къежьэшъ, лIэшIэгъухэм къакIоцI Мысыр (Египет) хэгъэгум пачъыхьэгъур щызыIыгъыгъэ адыгэ мамлюкхэмкIэ къырэкIошъ, адыгэ чIынэлъэжъым къыщыхъугъэ-къыщышIагъэхэм ягупчэ итыгъэхэмкIэ кIэкIыжьэу мыщ Абу щызэрищэлIэжьыгъэр бэдэд.
А пстэуми къакIэкIогъэ шIогъэшхом уасэ фэшIыгъуай. Адыгэ къэралыгъо университетым илъэпкъ факультет истудентхэр реджэнхэу тхылъитIу хъурэ учебник ытхыгъ, 2014-рэ илъэсым къыдигъэкIыгъ.
IорIуатэм ренэу ынаIэ тетыгъэми, адыгабзэкIэ тхыгъэ литературэм фэгъэхьыгъэ шIэныгъэлэжьын Iофыр Шъхьэлэхъо Абу зыкIи IэкIыб ышIыгъэп. Ар апэрэ гъомылэу иIэзэпытыгъ. Аужырэ илъэс 20-у къыгъэшIэжьыгъэм Iофышхоу ышIагъэми ар нэрылъэгъу къыпфишIыщт. Ежь ышъхьэкIэ иехэми, нэмыкIмэ атхыгъэхэу къыугъоижьи зэхиугъэуцуагъэхэми, тхылъ зыбгъупшI къыдигъэкIыгъ, нахьыпэрэм фэдэу гъэзет, журнал нэкIубгъохэми къащыхиутыгъэр бэ, нэмыкI IофшIагъэхэми ахэлэжьагъ. Ахэр ягъэпсыкIэ-зэхэтыкIэкIэ купищэу бгощынхэ плъэкIыщт. Апэу зигугъу къэпшIыщтхэм ащыщ «Адыгэ литературэ учебникэу я 10-рэ классым пае» ыIуи гъусэхэр иIэу ытхыгъэр а уахътэм тIогъогогъо къызэрэтырадзэжьыгъэр.
Адрэ купым хэхьащтых «Лъэпкъ шIэжьым иджэныкъо машIу» (1999), «ЩыIэныгъэр. Литературэр. ПIуныгъэр» (2002), «На пути творческого поиска» (2002), «Псалъэм илъэкI, уахътэм ижьыкъащ» (2009), «Лъэпкъым идунай псалъэм ылъапс» (2009) зыфиIохэрэр. Мыхэр тхылъ зэикIхэу монографием фэдэхэп, илъэс зэфэшъхьафыбэхэм ытхыгъэ, къыхиутыгъэ статья, очерк, эссе зэхэугъоягъэх. Аущтэу зэрэщытми шIуагъэ хэлъ. — Абу зыгъэгумэкIыщтыгъэ щыIэныгъэ, литературэ Iофыгъуабэхэр зэхэубытагъэхэу уапашъхьэ къырагъэуцох. Мы зигугъу къэтшIыгъэмэ ахэпхъагъэу ящэнэрэ тхылъ купэу къыдигъэкIыгъэр «хэкIокIэжьынкIэ ежьэгъагъэх» зыфэтIогъэ тхакIомэ ащыщхэм япроизведение угъоигъэх.
«Адыгэ литературэм итхыдэ» тхылъищ АРИГИ-м урысыбзэкIэ къыщыдагъэкIы зэхъуми Абу ишъыпкъэу хэлэжьагъ. Ар 1999 — 2006-рэ илъэсхэр арых. Iофыр ащ къыщыуцугъэп. Адыгэ литературэм итарихъ адыгабзэкIэ тхыгъэн фаеу Абу зиIощтыгъэр бэшIагъэ. А Iофми ежь кIэщакIо фэхъугъ. Iоф дэзышIэщтыгъэ шIэныгъэлэжь куп игъусэу ащи ублапIэ фишIыгъ. Апэрэ томыр изакъоу ытхыгъ пIоми хъунэу (Шъхьэлэхъо Дарикорэ Агъырджаныкъо Симхъанрэ шъхьэ зырыз атхыгъ) ыгъэхьазыри, 2008-рэ илъэсым къыдигъэкIыгъ. ЯтIонэрэ томри хьазырэу щылъ. Ау ахъщэ имыкъум къызэтыреIажэ.
Ащи изакъоп. 2014-рэ илъэсым Абу итхыгъэ зэхэугъоягъэхэу тхылъищ нэкIубгъо 1866-м къехъоу къыдэкIыгъ.
Шъхьэлэхъо Абу адыгэ тхэкIо IэпэIасэхэм зэу ащыщ зэрэтIогъагъэми къыфэдгъэзэжьын. Лъэпкъым иIорыIуатэхэм, итхыдэжъ-орэдыжъхэм, игушъхьэлэжьыгъэ байхэм афэгъэхьыгъэу ытхыгъэхэм, зэригъэфэгъэ IофшIагъэхэм уяджэ зыхъукIэ, шIокIыпIэ имыIэу ар уапашъхьэ къеуцо. Тхэн Iофыр ащ зыригъэжьэгъагъэри бэшIагъэ. Лые хъунэпщтын иапэрэ тхыгъэ цIыкIоу къоджэдэсхэм гъэзетхэр игъом къазэрафамыхьхэрэм игумэкI зыхэлъыр илъэс 11 нахь ымыныбжьэу, джыри къоджэ еджапIэм чIэсызэ 1940-рэ илъэсым мэкъуогъум и 27-м хэку гъэзетэу «Социалистическэ Адыгеим» къызэрэхиутыгъагъэм игугъу къэпшIыныр. Джаущтэу публицистэу рагъэжьэгъагъ. Ащ къыщыублагъэу тхыгъэ-хэутыгъэу ащ иIэр цIыкIуми иными, ацIэхэмкIэ къэплъытэн хъумэ, 500-ми шъхьарыкIыгъ. Ахэм бэрэ къахафэщтыгъэх рассказхэр, тхыдэ кIэкIхэр, художественнэ-образнэ гупшысэкIэ-тхакIэм зэлъиIыгъхэу нэмыкI тхыгъэхэр.
КIэмыгъэтхъын плъэкIыщтэп Шъхьэлэхъо Абу матхэми мэгущыIэми иадыгэбзэ-ныдэлъфыбзэ идэхагъи, иIэшIугъи зэриIэрылъхьэр. Мы тхылъхэм ар джыри зэ къаушыхьатыжьыгъ. КъызтегущыIэрэр IупкIэу, сурэт шIыгъэм фэдэу уапашъхьэ къырегъэуцо, игущыIэ щэрыокIэ анахь зэхэфыгъое зэхашIэри, гупшысэри къыплъегъэIэсых. ЗыфэIэзэ дэдэр зэгъэпшэн Iофыр ары. Хъугъэ-шIагъэм, гупшысэм, анахьэу цIыфым ыгу ихъыкIырэ-ишIыкIыхэрэм уахищэн зыхъукIэ, а зэгъэпшэныр иIэрылъхьэ шъыпкъ. УебгъукIон умылъэкIынэу анахьыбэрэ ыгъэфедэу ащкIэ зы щысэ. Ар машIор, мэшIо тхъуабзэр, мэшIо топыр, мэшIо жъокур, ахэм укъастыныр, укъажъэныр, цIыф зэхашIэр, гуихъыкIыр ахэмкIэ къытыныр ары. Апэрэ тхылъым «ЛIыхъужъ машIу» ыIуи зэреджагъэри аукъодые Iофэп. Тхыдэу «БорэкъогупчэIуашъхьэм» мырэущтэу хэт: «Бгъэм мэшIо жъокур щэжъэражъэ, гур мэсты, мажъэ, зэгочы». ЦIыфмэ къяхъулIэгъэ тхьамыкIэгъошхор, нысащэр хьадагъэкIэ зэблахъун фаеу зэрэхъугъэр джаущтэу къегъэлъагъо.
Ежь Шъхьэлэхъо Абуи джащ фэдагъ. Лъэпкъ гумэкIхэм, Iоф зэшIомыкIхэм зарихьылIэкIэ ыгу щышIэрэр джа ежь къызэритхыжьыщтыгъэм фэд. Ар укъэзыгъэфэбэрэ джэныкъо машIоуи хъущтыгъэ. БэшIагъэ ар зызэкIигъэнэгъагъэри, кIуасэщтыгъэп, кIосэщтэп ыкIи итхыгъэ-IэшIагъэхэр щэIэфэхэ.
Мамый Руслъан. Филологие шIэныгъэхэмкIэ доктор.