Мэлылъфэгъум и 12-м къэлэ культурэм и Унэу «Гигантым» я VIII-рэ ЗэIухыгъэ къэлэ литературнэ зэнэкъокъоу «Мы — дети России» зыфиIорэр щыкIуагъ.

Ащ кIэщакIо фэхъугъэр муни­ципальнэ гъэпсыкIэ зиIэ «Къа­лэу Мыекъуапэ» культурэмкIэ и ГъэIорышIапI.

Зэнэкъокъум хэлэжьагъэх илъэси 6 — 7-м къыщыублагъэу 18-м нэс зыныбжьхэр.

Пшъэрылъ шъхьаIэу Iофтхьабзэм иIагъ кIэлэцIыкIухэр ыкIи ныбжьыкIэхэр тхылъым пэблагъэ шIыгъэнхэр, литературэм ижанрэ зэфэшъхьафхэм афэ­гъэнэIосэгъэнхэр, ныдэлъфы­бзэм изэгъэшIэнкIэ нахь гуетыныгъэ ахэлъхьэгъэныр, автор ныбжьыкIэхэр къыхэгъэщыгъэнхэр ыкIи ахэм IэпыIэгъу афэ­хъугъэныр.

Зэнэкъокъум нэбгырэ 72-рэ хэлэжьагъ ыкIи литературнэ тхы­гъэ зэфэшъхьафхэм къяджа­гъэх, литературнэ-музыкальнэ композициер къагъэхьазырыгъ.

МэфэкI зэнэкъокъур театрэм и Илъэс ыкIи ТекIоныгъэм и Мафэу къэблагъэрэм афэгъэ­хьыгъагъ.

Адыгэ Республикэм икъэлэ шъхьаIэу Мыекъуапэ икIэлэ­цIы­кIу IыгъыпIэхэу N 3-м, N 9-м, N 16-м, N 23-м, къалэм иеджапIэхэу N 15-м, N 16-м, Адыгэ республикэ гимназием, Адыгэ республикэ еджэпIэ-интернатэу сэкъатныгъэ зиIэ еджакIохэр зыщеджэхэрэм къарыкIыгъэхэр, къэлэ тхылъеджапIэхэм яеджэкIо чанхэр, творческэ кол­лективхэм, кружокхэм, клубхэм ахэтхэр зэнэкъокъум хэлэжьагъэх. Ахэм лъэныкъуихыкIэ гъэзагъэу зыкъаушыхьатыгъ.

«Звучащие строки» зыфиIорэ музыкальнэ-литературнэ композициер кIэлэцIыкIу IыгъыпIэу N 3-у «Одуванчик» зыфиIорэм чIэсхэм къагъэхьазырыгъ, Артем Воробьевыр усэхэм къяджагъ.

«Планета детства» зыфиIо­рэмкIэ сабыйхэу илъэси 6 — 7 зыныбжьхэр кIэлэцIыкIу усэ зэфэшъхьафхэм — Зыхьэ Ас­лъан усэу «Мы — друзья», Ку­пеева Лизэ «Наши ветераны» — къя­джагъэх.

Зэнэкъокъум чIыпIэ авторхэм япроизведениехэм адыгабзэкIэ къыщяджагъэх. Ар «Родник моей земли» зыфиIорэр ары.

Пшъэшъэжъые цIыкIоу Теуцожь Саидэ усэу «Сыдэу дахэ сиадыгабзэ», Тхьабысым Джамболэт (кIэлэцIыкIу IыгъыпIэу N 9-р) Жэнэ Къырымызэ иусэу «ОшIэ­жьа, синыбджэ­гъужъ», Бэрэчэт Ислъам Мэщ­бэшIэ Исхьакъ иусэу «Адыгэ­хэр» IупкIэу къя­джагъэх.

ТекIоныгъэм и Мафэ ипэгъо­кIэу лъэныкъоу «Живет Победа в поколениях» зыфиIорэр гъэпсыгъагъэ. Ини, цIыкIуи заом зи дэгъугъэ зэрэхэмы-лъыр зэхашIапэу усэхэм къя­джагъэх. Ситымэ Бэлэ усэу «Баллада о матери», Валерия Лебединскаяр «Письмо маме», К. Симоновым иусэу «Жди ме­ня», Муса Джалиль, МэщбэшIэ Исхьакъ, Римма Казаковам, нэмыкIхэми яехэм къяджагъэх.

Анахь цIыкIухэми, еджакIохэми, нахь чъэпхъыгъэхэми литературнэ мэфэкIыр зэфэдэу агу пхыращын алъэкIыгъ. Ахэм зэкIэ ягъэпсыкIэ-шIыкIэкIи, ятеплъэ-шъуашэкIи, яусэ къеджа­кIэкIи заом нэлат зэрэрахырэр ыкIи мамырныгъэм илъэпIагъэ зэхашIэу ащ къызэрэфаджэхэрэр икъу фэдизэу зэ­нэкъокъум къыхэщыгъ. КIэлэцIыкIу IыгъыпIэхэм къарыкIы­гъэхэри, еджакIохэри кIэрэ­кIагъэх: цIыкIуи, нахь такъыри зэфэдэу зэнэкъокъум итемэ диштэу, дзэ щыгъын-шъуашэр къякIоу, афэшIукъабзэу ащы­гъыгъ; блэкIыгъэ зэошхом иорэд мэкъамэхэри щыIугъэх мэфэ­кIым, зыкъэшIын-зыкъэгъэлъэгъон амалэу аIэкIэлъыри къэ­нэфагъ.

Я VIII-рэ къэлэ литературнэ зэнэкъокъум жюрим уасэ фэсакъэу фишIыгъ, кIэух зэфэ­хьысыжьхэр жъоныгъуакIэм и 1-м, къэлэ паркым изы унэ щэджагъом къыщаIожьыщтых.

Сабыигъор, ныбжьыкIэгъур рэхьатынхэм, мамырныгъэ огур сыдигъуи хэткIи къэргъоным тегъэпсыхьэгъагъ зэнэкъокъур.

(Тикорр.). Сурэтхэр Iэшъынэ Аслъан мэфэкIым щытырихыгъэх.