ШIэхэу Адыгеим щатIупщыщт
УрысыемкIэ анахь электростанцие инэу жьыкIэ Iоф зышIэщтым игъэпсын Адыгеим шIэхэу щаухыщт.
МВти 150-рэ ащ илъэшыгъэщт. Зигугъу къэтшIырэ электростанциер Шэуджэн, Джэджэ районхэм ащагъэпсыщт, кВт 220-рэ зилъэшыгъэщт подстанциехэри ащ хэтыщтых. ПстэумкIи квадрат метрэ 163913,00-рэ ащ зэлъиубытыщт.
Адыгэ Республикэм и ЛIышъхьэу КъумпIыл Мурат мызэу, мытIоу зэрэхигъэунэфыкIыгъэмкIэ, мы проектым Адыгеим иэкономикэ зыкъыригъэIэтыщт, Урысыем иветроэнергетики хэхъоныгъэ ригъэшIыщт.
МВти 2,5-рэ зырыз зилъэшыгъэщт башнэ 60 ветропаркым хэхьащт. Проектым Iоф дэзышIэрэр акционер обществэу «НоваВинд» ары. Ащ игенеральнэ директорэу Александр Корчагиныр я ХI-рэ Дунэе форумэу «Атомэкспо» зыфиIоу мы мафэхэм Шъачэ щыкIуагъэм жьыкIэ Iоф зышIэщт электростанциер Адыгеим зэрэщагъэпсырэм къыщытегущыIагъ. Ащ зэрэхигъэунэфыкIыгъэмкIэ, псэуалъэр затынэу щытыгъэ пIалъэр зэкIахьан фаеу хъугъэ. АщкIэ зизэрар къэкIуагъэр гъэрекIо ичъэпыогъу щыIагъэхэ ощхышхохэр ары. Метри 100 зилъэгэгъэщт башнэхэм алъапсэхэм азыныкъо джыдэдэм агъэчъыгъах, жъоныгъуакIэм ахэм язэхэгъэуцон фежьэщтых. Мы илъэсым ишышъхьэIу- иIоныгъо мазэхэм жьыкIэ Iоф зышIэщт электростанциер Адыгеим щатIупщын ямурад. Ащ хэлъыщт пкъыгъохэр джыдэдэм къызIэкIагъахьэх. ТАСС-м къызэритыгъэмкIэ, жьыкIэ Iоф зышIэщтхэ установкэ 60-мэ апылъыщтхэ жьыфышхохэр компанием къыщэфыгъахэх.
Электростанцием тыкъэзыуцухьэрэ дунаим зэрар зэрэримыхыщтыр, непэрэ мафэхэм адиштэрэ оборудование нэмыкI зэрамыгъэфедэщтыр Александр Корчагиным къыхигъэщыгъ. Компаниер къэралыгъо экспертизэ зашIым нафэ къэхъугъ проект документациер техническэ регламентхэмкIэ, санитар-эпидемиологиемкIэ, экологиемкIэ, машIом зыкъимыштэнымкIэ, проект документациемкIэ шапхъэхэу Урысые Федерацием къэлэгъэпсынымкIэ и Кодекс къыщыдэлъытагъэхэм зэрадиштэрэр.
Илъэсым къыкIоцI зигугъу къэтшIыгъэ электростанцием кВт/cыхь. миллион 354-рэ энергиеу къытыщт. Адыгэ Республикэр энергиеу зыфыщыкIэрэм ипроцент 20 ащ къыригъэкъужьыщт. Ащ нэмыкIэу IофшIэпIэ чIыпIакIэхэр зэхэщагъэхэ хъущт, бюджетми хэбзэIахьэу къихьэрэм хэхъощт.