Емыжэ МулиIэт: «…Сэ сIэкIэлъышъ усэм ыбзэ, сыкIэхъопсырэп ащ нахь пшысэ»
Адыгэ лъэпкъ поэзием мэкъэмэ шъэф гуапэр ыгъотынымкIэ анахь зишIуагъэ къэкIуагъэр бзылъфыгъэ гупшысэр ащ къызэрэхэуцуагъэр ары.
ИжъыкIи адыгэхэм бзылъфыгъэ Iуш акъылышIохэр агъашIоу, алъытэу яIагъэх. Непи гулъытэ-гупшысэр, акъыл-къулаир къызэшIэкIыгъэ бзылъфыгъэхэр къахэщых. Ахэм ащыщэу сэлъытэ усэкIо IэпэIасэу, тхакIоу, драматургэу, зэдзэкIакIоу Емыжэ МулиIэт.
МулиIэт мэлылъфэгъум и 4-м, 1951-рэ илъэсым къэхъугъ. Зэчый гъэшIэгъонкIэ Тхьэр къетагъ: игущыIэ сыдигъуи шъуашIо, зафэ; игупшысэ тынч уеубыты ыкIи узылъещэ.
Я 70 – 90-рэ илъэсхэм адыгэ литературэм кIочIакIэу къыхэхьагъэхэм МулиIэт ащыщ, лъэгъо зэныбжь дахэ литературэм щыриI, усэныр ныдэлъф сэнэхьатэу хэлъэу къызэрэхъугъэр гъуащэрэп, иусэ макъэ уедэIу зэпытыгъэкIи уезэщырэп: куу, шъхьафит, кIочIэшIу хэлъ.
Акъылым итIокIэ зэжъумэ уащыгъощагъэу ЛъэгапIэр бгъотрэп. Щэнджыщэм итхъэгъо макIэ укъезэщыгъ, ау КуупIэр бгъотрэп.
Куунэу плъапсэ, лъэгэнэу пшъхьапэ уфаешъ, Гури гъэлажьэ, А закъор ары къашъхьапэжьыщтыр мэфаем, Адрэхэр – яжьэ.
МулиIэт усэн-гупшысэныр пасэу къыздиштагъ, 1967-рэ илъэсым къыщыублагъэу, илъэс 16 ыныбжьэу, ытхыхэрэр къыхиутыхэ мэхъу. Ащ къыщегъэжьагъэу бзылъфыгъэм ежь игупшысэ дунай зэригъэпэшыгъ, лIэшIэгъуныкъо хъугъэу творческэ гъогушхом илъэгъо нэфынэ пхырещы, гур шъхьамысэу егъэлажьэ, гушъхьэгъомылэр егъэбагъо.
ТхьэлъэIумэ усэныр къатекIыгъ, МыкIэпIэу ядэхагъэ тилIэшIэгъумэ ЗэрэкIочIэшхоу усэхэр алъэгъух, АкIуачIи тхьэм илэгъумэ къахэкIыгъ. Бзый цыпэм уигупшысэ къыпымыч, Псыр лъэпсэ пакIэм чыжьэу зэриIэтэу Нэфынэ псыгъом ыкIоцI шъыпкъэ уитэу Удихьыещт уиусэ емылыч…
ТхьэлъэIумэ усэныр къатекIыгъ… Псэм итехьагъу, мэзахэм итекIыгъу.
Емыжэ МулиIэт ныдэлъфыбзэ-адыгабзэр ыIэтынэу, ыгъэбзэрэбзэнэу, лъэпкъ гупшысэ куур ыухъумэнэу мы чIым къызэрэтехъуагъэм ишыхьатышIух иусэ сатырхэр, игупшысэ чъэпхъыгъэхэр.
МулиIэт зэлъашIэрэ усакIу. Аскъэлэе гурыт еджапIэм джыри щеджэщтыгъ иапэрэ усэхэр район гъэзетым, журналэу «Зэкъошныгъэм» къащыхиутыхэ зэхъум. 1970-рэ илъэсым ныбжьыкIэ тхэкIо куп ятхылъ зэхэтэу «Гъэтхэ къэгъагъэхэр» ыIоу къыдэкIыгъагъ, МулиIэт иусэхэри ащ апэрэу къыдэхьэгъагъэх. Ежь иусэхэр зыдэт тхылъ шъхьафхэри къыдигъэкIыгъэх: «Къэзыгъэзэжьыгъэ орэдхэр», «Тамыгъэ шъэф», «Нэфынэ лъаг», «Къэгъэгъэ шIуцI», «ТхьэлъэIу», 1984-рэ илъэсым «Горное озеро» зыцIэ тхылъыр урысыбзэкIэ Москва къыщыхиутыгъ, «Тыгъэм иадырабгъу», «ХэшыпыкIыгъэ тхыгъэхэр», нэмыкIхэри.
Гупшысэ гъунэнчъэм ахэтэу къехьы усакIом игъашIэ. МулиIэт гурыгъозэ куурэ гузэхэшIэ лъэшхэмрэкIэ зэхэхъытагъ ыпсэ; ежь фэдабэм амылъэгъурэр елъэгъу, къафэмыIорэр усэу къегъэчъы:
Зы кIэлъэныкъор мылэу, зы кIэлъэныкъор машIоу Сыдэу дунаим бэрэ сытебгъэтыгъ! Сыфэмыежьэу уидахи, сыфэмыежьэу уиIэшIуи, Сыдэу бэрэ сыгу цIыкIоу сыхэбгъэтыгъ! Симые машIом зезгъэоу дунаим сыкъытебгъани, Сэ симыещтыр шIу слъэгъоу чэщ куумэ сакъыхэбгъани, О унэтIэгу итхагъэм чэфынчъэу ыуж уихьагъ. Сыдэу бэрэ уикъини фыртынэу сызэрихьагъ. Сыгу пыкIэу усэтIупщыжьы, бэшIагъэу усфэлъэкIыжьрэп. СиныбжьыкIэгъу фэдэу, укъыздикIыгъэм кIожь. Спсэ иуIэгъэ куухэр цIыкIу— цIыкIоу, жъажъэу мэкIыжьых, МэпкIыжьых сигукъэкIыжьхэр. Згъэбылъырэ шIулъэгъу чыжьэм Ижъуагъо сашъхьагъы ит. Адэ сыды уфит… («Къэгъэгъэ шIуцI»)
ТхьэкъэгъэшIыгъэ Дунэешхор куоу изышIыкIырэ усакIу МулиIэт, изэчый ялыекIэ, гукIэ, псэкIэ ыщэчырэ пстэур усэкIэ шъхьафитэу, зафэу къыIоныр фызэшIокIы. Акъыл гъэшIэгъон, шIэныгъэ дэгъу зэриIэр мыгъуащэу, щыIэныгъэм ижьыкъэщэ цIыкIужъые пэпчъи зэхишIэу, къыфыригъашIэу гум нэсэу мэусэ, усэкIо иным, усэкIо шъыпкъэм ары ишIыкIэр.
МулиIэт драматургиеми гъэшIэгъонэу дэлажьэ, ипьесэхэри классикэм щыщэу зэридзэкIыгъэхэри Адыгэ драмтеатрэм исценэ бэрэ щагъэуцух. Адыгэ пшъэшъэжъыеу илъэси 4 зыныбжьэу атыгъуи, тырку бэдзэрым щащэфи, Францием арагъащи щапIугъэу Шарлотта–Айщэт идунае къырыкIуагъэр ылъапсэу МулиIэт кинороман ытхыгъ «Невольник чести» ыIоу.
Москва къыщыдэкIырэ гъэзетхэм, журналхэм иусэхэр, киносценариехэр къарыхьагъэх. МулиIэт Урысые Федерацием итхакIохэм, театрэ IофышIэхэм ыкIи журналистхэм ясоюзхэм ахэт.
Щэч зыхэмылъыр тхьэтын лъапIэу усэныр дахэу къызэрэдэхъурэр ыкIи щыIэныгъэ шъыпкъэ зэрэфэхъугъэр ары. ПсынэкIэчъ псы IэшIум фэдэхэу иусэ сатыр жъыухэм уяджэ зэпытыгъэкIи уязэщырэп, кIочIакIэ къыпхалъхьэ.
Джа зэкIэми апаекIэ усакIоу Емыжэ МулиIэт псауныгъэ пытэкIэ тыфэлъаIозэ, «Опсэу!» етэIо.
Мамырыкъо Нуриет.