Тарихъыр кIэлэцIыкIухэм къаIотэжьы
Театрэм и Илъэс фэгъэхьыгъэ апэрэ зэIухыгъэ зэнэкъокъур Мыекъуапэ культурэмкIэ и Унэу «Гигантым» щыкIуагъ. Къалэм икIэлэеджакIохэр зэIукIэгъухэм ахэлэжьагъэх.
Мыекъуапэ иадминистрацие культурэмкIэ и ГъэIорышIапIэ ипащэу Цэй Розэ къызэрэтиIуагъэу, кIэлэцIыкIухэмрэ ныбжьыкIэхэмрэ театральнэ искусствэм нахьышIоу фэгъэсэгъэнхэм, яшIэныгъэкIэ къахэщыхэрэм IэпыIэгъу афэхъунхэм афэшI зэнэкъокъур зэхащагъ.
Нысхъапэхэр, джэгуалъэхэр, нэмыкIхэри кIэлэеджакIохэм агъэфедэхэзэ, ярольхэр нахь гъэшIэгъонэу къызэрашIыщтым пылъыгъэх. Едзыгъохэм къашъохэр ащытлъэгъугъэх, орэдхэр ащызэхэтхыгъэх. Анахьэу къахэдгъэщырэр кIэлэцIыкIу театрэу «Аншлагым» Ленинград блокадэм фэгъэхьыгъэ едзыгъоу къыгъэлъэгъуагъэр ары.
«Заом икIэлэцIыкIухэр» зыфиIорэ пычыгъом тарихъым инэкIубгъохэр хэолъагъох. ЦIыфхэм гъомылапхъэр афикъурэп, унагъохэм сымаджэу арысхэм гумэкIыгъуабэ яI. Сабыйхэм ятэхэр, ашыпхъухэр заом имашIо хэтых, пыим пэуцужьыгъэх. Ленинград къаухъумэ, ТекIоныгъэм фэбанэх…
КIэлэцIыкIухэр зэо лъэхъаным диштэу фэпагъэх. ЖэжъыехэмкIэ унагъом ищыкIэгъэщтхэр къащэ, хьалыгъу бзыгъэу нэбгырэ пэпчъ тефэрэр къыраты, фашист самолетхэр къашъхьэрыбыбагъэхэу бомбэхэр мамыр цIыфхэм къатырадзэх, машIом кIагъэсты…
Заом имэфэ къинхэр къызэранэкIыхи, пыир зэкIадзэжьыгъ. КIэлэцIыкIухэм ярольхэр дэгъоу къашIыгъэх, илъэс чыжьэхэу кинофильмэхэмкIэ алъэгъугъэхэр нэгум къыкIагъэуцох.
ЖъоныгъуакIэм иапэрэ мафэхэм осэшI купым зэфэхьысыжьхэр ышIыщтых, анахь дэгъухэм ацIэхэр къыриIощтых.
Сурэтыр зэнэкъокъум къыщытетхыгъ.
ЕМТIЫЛЪ Нурбый