ЯорэдкIи, якъашъокIи узыIэпащэ
Адыгэ къэралыгъо университетым студентхэм яфестиваль щыкIуагъ. Республикэм иапшъэрэ еджапIэхэм, колледжхэм ястудентхэм ясэнаущыгъэ искусствэм къыщагъэлъэгъуагъ.
Мыекъопэ къэралыгъо технологическэ университетым, медицинэмкIэ колледжым, кIэлэегъэджэ колледжэу Хъ. Андырхъуаем ыцIэ зыхьырэм, физкультурэмкIэ ыкIи дзюдомкIэ Институтым, юридическэ, тарихъ, филологие, нэмыкI факультетхэм ащеджэхэрэм орэдхэр къаIуагъэх, къэшъуагъэх, усэхэм къяджагъэх, театрализованнэ едзыгъохэр къашIыгъэх.
ОсэшI купым хэтхэу Мурэтэ Лидие, Кушъэкъо Симэ, Шъхьаплъэкъо Фатимэ, Ирина Сергеевам, Зыхьэ Мэлайчэт, Шагудж Казбек, фэшъхьафхэм язэфэхьысыжьхэм къащыхагъэщыгъэм уегъэгушхо.
— «Студентхэм ягъатх» зыфиIорэ зэнэкъокъур илъэс 20 хъугъэу зэхащэ, — къеIуатэ Адыгэ Республикэм инароднэ артисткэу, Абхъазым изаслуженнэ артисткэу Кушъэкъо Симэ. — Мыгъэ театрэм и Илъэс. Ащ фэгъэхьыгъэу студентхэм язэнэкъокъу Адыгэ къэралыгъо университетым щэкIо. Орэд къэзыIохэрэм, къэшъуакIохэм ясэнаущыгъэ къызэрэзэIуахырэр фестивалым щытлъэгъугъ. Филологым, технологым, юристым орэд къыIоныр тшIогъэшIэгъон.
— Студентхэм якъэшIыгъохэм сигуапэу сяплъыгъ, — зэдэгущыIэгъур лъегъэкIуатэ Урысыем изаслуженнэ артисткэу, Адыгэ Республикэм инароднэ артисткэу ХъокIо Сусанэ. — Лъэпкъ искусствэм ишъэфхэр зэрагъашIэх, адыгэ шъуашэр зыщыплъэныр зы Iоф, ау ар зепхьаным, сценэм укъыщышъоным афэшI бэмэ зафэбгъэсэн фаеу тэлъытэ. Студентхэр ныбжьыкIэх, яшIэныгъэхэм ахагъэхъонэу сэгугъэ.
Мыекъопэ къэралыгъо гуманитар-техническэ колледжым икъэшъокIо ансамблэ осэшI купым къыхигъэщыгъэмэ ащыщ. ЭкономикэмкIэ ыкIи правэмкIэ икъутамэ ипащэу КIыкI Руслъан художественнэ Iофыгъохэри зэшIуихыгъэх. КIалэхэри, пшъашъэхэри адыгэ къашъохэм афегъасэх.
— Адыгэ шъуашэр къякIоу ащыгъэу пчэгум щыуджыхэ зыхъукIэ, лъэпкъ шэн-хабзэхэм ямэхьани къыхэогъэщы, — зэдэгущыIэгъур лъегъэкIуатэ Адыгэ Республикэм культурэмкIэ изаслуженнэ IофышIэу Шагудж Казбек. — ТиныбжьыкIэхэр дахэу къэшъох.
Колледжым истудентхэм къытаIуагъ фестивалым дэгъоу зыфагъэхьазырыным фэшI кIэлэегъаджэхэр IэпыIэгъу къазэрафэхъугъэхэр.
— «Студентхэм ягъатх» зыфиIорэ фестивалым урысхэр, адыгэхэр, Гурыт Азием илъэпкъхэр, нэмыкIхэри хэлэжьагъэх, — къеIуатэ МГГТК-м ипащэу Тепсае Заремэ.
— Искусствэм ныбжьыкIэхэр зэфещэх, яшIэныгъэ къыщагъэлъагъо. Ны-тыхэр къызэрэкIохэрэр лъэшэу тигуапэ.
Студентхэм ягъатхэ фэгъэхьыгъэ кIэух пчыхьэзэхахьэр мэлылъфэгъум и 15-м Адыгэ къэралыгъо университетым щыкIонэу щыт.